Danieri 10 - Baibuli I Leb Kumam 2013

Gianyuta kame Danieri Oneno i Ecilet me Tigiris

¹ (I mwaka me adek me apugan ka Sairas bala abaka me Pasia, bin Rubanga oko mino kop mere ongere but Danieri, en ngat kame oudo kolwonge da be Beletesasar. Kop nono oudo obedo me ateni do niang iye oudo obedo cane adwong. Bin oko niange kop nono i gianyuta.)

² I kare nono, ango Danieri oudo abedo kede iturur pi sabitin adek.

³ Likame oudo acamo cam moro aber, akadi ringo, akadi bwini moro donyo i doga, doko da likame oudo abilo sut kede mo moro akadi acel.

⁴ I ceng me ot are kiwie ongwon me duwe me agege me mwaka, ango oudo atie cungo i dog ecilet adwong me Tigiris.

⁵ Ango ako ngoloro malo ako neno icuo moro koudo tie ngapo igoen ameny, di etweo piere kede rakoba kame kotimo kede saabu kame kojililo kiber.

⁶ Kome oudo meny bala kidi beril, di nyime meny bala meny me kot; wange oudo meny bala toc, bade kede tiene oudo meny bala nyonyo buronsi kame kosuto, di dwane mor bala woo me twon ekodet me jo.

⁷ Ango kena en kame aneno gianyuta nono; jo apat koudo tie keda likame onene, bed bala kom gi oko cako miel pi lworo di kiko ringo pwono.

⁸ Aso, ango ako dong kunono kena neno gianyuta me aura nono. Teko na oko tiek, di nyima oko lokere i cal me to.

⁹ Ango ako winyo dwane, kakame ango awinyo kede dwane ango ako poto piny ariebacuny, di wia oko witar.

¹⁰ Di cing dano oko mula di eko kiarao ango ariondiko di acato piny kede cinga. Do koma oudo pwodi tie miel.

¹¹ En eko waco na be, “Danieri, in Rubanga mari twatwal, cik yiti iwiny kope kame ango ayaro waco ni. Yai icungi, pien ango kocwaa buti.” Kakame ewaco kede kamanoni, ango ako cungo, do koma oudo pwodi tie miel.

¹² En eko waco na be, “Danieri, kur ibed kede lworo. Rubanga owinyo kwac nin cako i ceng me agege kame in iketo kede tam ni pi udo niang di imwolere i nyim Rubanga ni. Ango nan abino pi kelo ni adwokini me ilega ni.

¹³ Do malaika apugo ajakanut me Pasia oguro na pi ceng ot are kiwie acel, di Emikairi, en malaika acel adwong, oko bino konya, pien oudo ango adong kena Pasia kunono.

¹⁴ Ango nan abino pi mini niang gikame bino timere ne jo ni i kare me ajikini. Tie bobo gianyuta ace kame mako kare nono.”

¹⁵ Kakame en ewaco kede kop noni, ango ako luro ngino piny di likame atwero yamo kop moro.

¹⁶ Di malaika, kame oudo tie i cal me dano, oko mulo del me doga, di ango ako yabo doga cako yamo, di ako waco ne be, “Adwong na, gianyuta noni omia lito kotieko teko ki koma.

¹⁷ Ango acal bala epasoit atie cungo i nyim ngadwong mere; koma tie miel, ali kede teko, cunya da otiek.”

¹⁸ En bobo eko medo mula di eko mina teko.

¹⁹ En ewaco na be, “Kur ibed kede lworo, Rubanga mari twatwal, likame tie gimoro arac koyaro timere ni. Bed kede teko kede cuny anwang.” Kakame en eyamo na kede kamano, ango ako udo teko di ako waco be, “Adwong na, yam do gikame imito waco, pien nataman itieko mina teko.”

^20-21 En eko penya be, “Ingeo gikame omio ango abino buti? Ango abino pi mini ngeno gikame kowandiko i Itabu me Ateni. Nan ango amito dok yi kede malaika ngadar me Pasia. Ingei manono, malaika ngadar me Guris da bino bino. Likame tie ngatamoro kame tie pi konya yi kede gi kwanyo Emikairi, malaika ngadar wu me Isirael.