Danieri 1 - Baibuli I Leb Kumam 2013

Itatam amako Danieri kede Jowote 1.1—6.28 Awobe kame Kotero i Tuale ka Nebukadunesa

¹ I mwaka me adek me apugan ka Abaka Yekoyakim me Yuda, Abaka Nebukadunesa me Babilon oko ot suro Yerusalem di eko luke.

² Rwot oko mino Abaka Yekoyakim me Yuda opoto i cinge, ribo kiton jamini mogo me tempulo. En eko tero gin dedede Babilon, di eko keto jamini nogo i agola me kano jamini me tempulo ka rubangan mege.

³ Abaka oko mino Asepenas en ngatic kame lo ture, pi yero kikom jo me Isirael awobe mogo me paco ka abaka me Yuda kede ace me miere adongodongo.

⁴ Oudo kipoore bedo awobe ali kede angwal moro i kom gi, di kicil, di kiriek, di kitie kede ngec atut, kede di kitwero tic i paco me abaka. Asepenas oudo poore pwonyo gi somo kede wandiko leb me Babilonia.

⁵ Abaka oko mino cik be cam gi kede bwini gi poore bedo acel kede me paco mere me abaka. Oudo kopoore pwonyo gi pi mwakini adek, tetekeny ingei kare nono gin kiko doko jotic me abaka.

⁶ Jo kame oko yero bin ribo Danieri, Kanania, Misael, kede Asaria, gin dedede bin kibedo jo me ekeko ka Yuda.

⁷ Jotic adongo bin oko mino gi nying kanyen kaman: Danieri kocako ne be Beletesasar, Kanania kocako ne be Sadurak, Misael oko cako ne be Mesak, kede Asaria oko cako ne be Abedenego.

⁸ Danieri bin oko moko tam mere pi dagi munaun kede cam kede bwini me paco ka abaka, aso en eko kwano Asepenas pi konye kede kop nono,

⁹ di Rubanga oko mino Asepenas obedo kede cuny aber but Danieri.

¹⁰ Do Asepenas oudo da tie lworo abaka, aso en eko waco ne Danieri be, “Ango atie lworo adwong na abaka, piento en etieko yero ne wu gikame ipoorenu camo kede kame ipoorenu mato. Ka en eko neno komi likame yot bala jowoti ace, cengemogo ebino neka.”

¹¹ Aso Danieri oko ot but ngadar kame Asepenas oudo omio tic me dare karacel kede jowote adek ace, di eko waco ne be,

¹² “Akwai itam wa pi ceng tomon. Mi wa ocam dek apura kede pii kenekene.

¹³ Di do in iko bino pooro cal wa kede cal me awobe apat kame camo cam kame abaka camo, di in iko bino moko gikame ibino timo di lubere kede cal wa.”

¹⁴ En eko yei pi tamo gi pi ceng tomon.

¹⁵ Ingei ceng tomon oko udo be Danieri kede jowote oudo kom gi yot di kicwe kalamo awobe apat koudo camo cam kame abaka camo.

¹⁶ Aso ngadar gi oko do jiko mino gi cam kame abaka camo kede bwini kame emato, di do eko donyo mino gi camo dek apura kenekene.

¹⁷ Rubanga oko mino awobe ongwon nogo ngec kede niang i kom epone dedede me wandiko leb, kede kope me rieko. Medo i wi manono, Danieri oudo twero gonyo dwong me lek kede gianyuta.

¹⁸ I atiekini me mwakini adek kame abaka oudo ongolo, Asepenas oko tero awobe dedede but Nebukadunesa.

¹⁹ Abaka oko yamo kede gin dedede, di likame abaka oko udo ngatamoro kikom gi kame kotwero pooro kede Danieri, Kanania, Misael, kede Asaria. Aso bin oko tero gin tic i tuale me abaka.

²⁰ I kom kope dedede amako rieko kede niang kame abaka openyo gi iye, abaka oko udo gi kibeco tien tomon kalamo wegi tangu kede jotiet atie i ajakanut mere lung.

²¹ Danieri oko dong tic kunono tuno i mwaka me agege me apugan ka Abaka Sairas.