Agole 1 - Baibuli I Leb Kumam 2013

Bero me Agole

¹ Agole ka Sulumani, wot ka Daudi abaka me Isirael.

² Agole nogi mio dano rieko kede pwony abeco, doko kikelo niang i kom kope mogo kame dwong gi tut.

³ Doko kipwonyo dano timo gi dedede i yore me rieko, kede bedo dano kopoore, kame timo ne jo gikame poore kede kame tero jo dedede di rom aroma.

⁴ Kipwonyo jo kame kwia piny bedo kede rieko, doko kipwonyo jo apwodi dongo adonga bedo kede ngec kede tam kopoore.

⁵ Jo ariek winyo gi di rieko gi ko meede, doko kimio jo aniang ngeo gikame kipoore timo,

⁶ tetekeny kiko niang kope me agole kede kame dwong gi omungere, kope kame jo ariek yamo.

Acora but Jo Atino

⁷ Lworo Rwot en acakini me bedo kede ngec. Jomingo likame paro bedo kede rieko amoto lubo pwony kame komio gi.

⁸ Atin na, winy acora kame papa ni mii, doko kur idagi winyo pwony ka toto ni,

⁹ pien pwony gin twero iiko iponeso ni doko beco, bala egoe acil me umo wic, arabo bala eriko kame dano ngapo i ngute di eko doko cil.

¹⁰ Atin na, ka jodubo obitao tam ni, kur iyei kop gi.

¹¹ Ka kiwaco ni be, “Bia oupere outunu okiunu jo di okounu neko gi; ootunu okiunu jo ali kede kop okounu suro gi abongo tien kop moro da!

¹² Ongolenu neko gi akadi di kom gi pwodi yot.

¹³ Wan obinunu udo jame me epone dedede me wel amalo di okounu pongo ude wa kede gikame oyakunu.

¹⁴ Bia idony but wa, di okounu bino nywako gikame oyakunu.”

¹⁵ Atin na, kur idonyi i tim gi. Kur ilub iponeso gi.

¹⁶ Gin tien gi dwir ot timo gikarac; kom gi miel amiela ot timo nek.

¹⁷ Kony li me ciko arama di winyo kame imito mako da tie neno;

¹⁸ do akodi jo nogo ciko obek kame lokere mako gin kikom gi; kiciko gikame kwanyo kuo gi.

¹⁹ Manoni en gikame timere ne jo kame yako jame me jo tetek; tim nono mio gi kikei kuo gi.

Rieko tie Lwongere

²⁰ Rieko tie lwongere i dier yote; en etie lwongere i atalen kede dwan amalo.

²¹ En elwongere i kakame jo opong iye kede i kacokere atie i erute me bomba be,

²² “Wun jomingo, imitunu dong bedo jomingo pi kare karom amene? Joacae cuny gi bino bedo yom bedo kede acae i kom ngec pi kare karom amene, kede jomingo da cuny gi bino dagi ngec pi kare karom amene?

²³ Cikunu yitu iwinyunu epone kame abunano wu kede; abino mino wu tam na di ako nywako kede wu kop kame tie i cunya.

²⁴ Ango abedo lwongo wu do wun ikounu dagi; arieo cinga gweto wu do likame tie dano oko yei.

²⁵ Itiekunu dagi tam dedede kame ango amio wu, di likame ikounu yei lubo epone kame arieo wu kede.

²⁶ Aso ango da abino nyero wu kame can opoto i komu; abino yamo anywar anywar kame lworo opoto ne wu,

²⁷ i kare kame lworo bino ngoole ne wu kede bala yamo me kot, di can ko poto i komu bala apipiru, kede di itienu kede lito kede cwercuny.

²⁸ Di do ikounu bino lwonga, do likame ango abino gamo dogu; ibinunu mona i kabedo dedede, do likame ibinunu wuda.

²⁹ Piento cunyu otieko dagi bedo kede ngec, doko da likame iyeunu bedo kede lworo but Rwot.

³⁰ Idagunu gamo tam kame acoro wu kede, doko da likame ilubunu epone kame arieo wu kede.

³¹ Pi manono, ibinunu udo adwogini me tice wu, di iik wu areco nogo ko bino yengo wu paka wun dagi gi.

³² Jo kame kwia piny to pi rwenyo yongayo, doko da ajajalun me jomingo neko gi;

³³ do jo kame yei lubo kope nango bino bedo abongo peko moro. Kibino bedo mulem abongo lworo can moro.”