2 Samuel 8 - Baibuli I Leb Kumam 2013

Daudi Olo Yi Atot

¹ Kikano di do kare oudo okakato, Daudi bin oko suro jo Pilistia eko bwono gi. En emao gin Meteg Ama.

² En eko bobo bwono jo Moab, di eko mino jo kame oudo en eko mako obuto piny. En di eko neko are i kom adek me jo nogo. Jo Moab kame oko dong oko doko jotic ka Daudi di kiko donyo culo esolo bute.

³ Daudi bobo oko yi di eko bwono Abaka Kadadese wot ka Rekob me Soba, di oudo Kadadese tie ot pi dwoko adul me tetu malo me ecilet me Eupurate i loc mere.

⁴ Daudi bin oko mako isirikalen ka Kadadese tutumia acel kede tol kanyaare (1,700) kame oudo ringo kede asigiran, kede tutumia ot are (20,000) oudo aoto kede tien. Daudi bin oko tongotongo tien asigiran nogo di eko weko asigiran kame twero wano cabalan tol acel.

⁵ Kakame bin jo Siria kame oudo bedo i piny me Damasiko oko bino kede pi konyo Abaka Kadadese me Soba, Daudi oko neko jo tutumia ot are kiwie are (22,000) kikom gi.

⁶ Di do en eko keto isirikalen Damasiko kuno, di jo Siria kame bin bedo Damasiko oko doko jo kame bin Daudi pugo, doko kiko donyo culo esolo bute. Rwot bin oko mino Daudi obwono jo dedede kame en oudo eko yi kede gi.

⁷ Daudi bin oko mano ibukui kame kotimo kede saabu kame oudo jotic ka Kadadese mako, di eko tero gi Yerusalem.

⁸ En eko da bobo mano nyonyo buronsi atot twatwal ki Beta kede Berotai, bomban ka Kadadese.

⁹ Kakame bin Abaka Toi me Kamat oko winyo kede be Daudi oudo otieko bwono isirikalen ka Kadadese dedede,

¹⁰ en eko cwano wode Yoram but abaka Daudi pi mote kede pwone piento en oudo eyi kede Kadadese di eko bwone. Toi oudo obedo yi kede Kadadese tien atot. Yoram otero ne Daudi giamia me siliba, saabu kede buronsi.

¹¹ Abaka Daudi oko mino jamini nogo dedede but Rwot, karacel kede siliba kede saabu kame oudo emao kibut atekerin kame bin en eko bwono;

¹² atekerin nogo en, Edom, Moab, Amon, Pilistia kede Amalek. Doko da en eko mino Rwot dul me jamini kame bin en eyako kibut Abaka Kadadese wot ka Rekob me Soba.

¹³ Nying Daudi bin oko doko iruo twatwal i kare kame bin en edwogo kede ki neko jo Edom tutumia tomon kiwie kanyauni (18,000) i Aditot me Munyo.

¹⁴ En bin eko keto isirikalen kabedere dedede i Edom, di jo me Edom lung oko doko jo kame Daudi oudo pugo. Rwot bin oko mino Daudi obwono jo dedede kame en oudo eyi kede gi.

¹⁵ Daudi bin oko pugo Isirael lung di engolo kop i ateni doko di etero jo mege dedede kiber.

¹⁶ Joab kame nying toto mere oudo Seruya en kame oudo obedo ngatel me isirikalen; Yekosapat wot ka Akilud en kame bin wandiko kope dedede kame timere;

¹⁷ Sadoki wot ka Akitub kede Akimelek wot ka Abiata en koudo obedo josaseredoti; Seraya en oudo obedo kalani;

¹⁸ Benaya wot ka Yekoyada en kame oudo obedo ngatel me isirikalen kame bin gwoko Daudi; awobe ka Daudi oudo obedo josaseredoti.