2 Samuel 2 - Baibuli I Leb Kumam 2013

Daudi Odoko Abaka me Yuda

¹ Kikano di mano otiek, Daudi oko penyo Rwot be, “Benyo, aoti ako donyo i bomba moro me Yuda?” Rwot oko dwoko ne be, “Ebo, oti.” Daudi oko penye be, “Abin aoti i mene?” En eko dwoko be, “Keburon.”

² Aso, Daudi oko ot Keburon, etero mon mege are, Akinoam me Jeserel, kede Abigail apuserut ka Nabal me Kamel.

³ Etero da cuo kame bin en etie kede, dano acelacel kede jo me ode; di gin kiko donyo bedo i bomban me nget Keburon.

⁴ Di do jo me Yuda oko bino, di gin kiko wiro Daudi ki kuno pi bedo abaka me Yuda. Kakame gin kiko waco ne kede Daudi be jo me Jabes Gilead en oudo oyiko Saulo,

⁵ Daudi oko ooro jo but jo me Jabes Gilead di ewaco negi be, “Akwao Rwot emi wu winyo, pien wun ikounu nyuto genere wu but Saulo ngadwong wu, di ikounu yike.

⁶ Nataman ango akwao Rwot enyut ne wu amara mere kalikame lokere kede genere mere! Ango da i koma abino tero wu kiber pi gikame itimunu.

⁷ Bedunu tek, doko bedunu kede nwangcuny; pien ngadwong wu Saulo otieko to, doko jo me Yuda otieko wira pi bedo abaka gi.”

Isiboset Odoko Abaka me Isirael

⁸ Ngatel me isirikalen ka Saulo, Abuneri wot ka Ner, oudo ongolo kede Isiboset wot ka Saulo ecilet me Yorodan kiko ot Makanaim.

⁹ Abuneri oko kete ebedo abaka kame pugo adulion me Gilead, Aser, Jeserel, Epuraimu, Benjamin, kede Isirael lung.

¹⁰ Isiboset, wot ka Saulo, oudo mwakini me dongo mere oromo ot ongwon (40) i kare kame en edoko kede abaka me Isirael, di eko pug pi mwakini are. Do jo me ekeko ka Yuda oko bedo jo kame lubo kop ka Daudi.

¹¹ Kare kame Daudi oko tieko di etie abaka kame pugo Yuda di ebedo Keburon oudo romo mwakini kanyaare kede dwete kanyape.

Isirael Oyi kede Yuda i Gibeon

¹² Abuneri wot ka Ner, kede jotic ka Isiboset wot ka Saulo, oko yai ki Makanaim di kiko ot Gibeon.

¹³ Joab wot ka Seruya, kede jotic ka Daudi, oko ot di kiko riamo kede gi i nget atapar me Gibeon. Ekodet acel oko bedo i nget atapar tetucel, di ekodet ocelu da oko bedo i tetuca.

¹⁴ Abuneri di oko waco ne Joab be, “Cwai awobe mogo, di ada ako cwano awobe mogo, di gin kiko yi i nyim wa.” Joab oko gamo be, “Cwai gi kibin anyim.”

¹⁵ Aso, awobe di oko yai ot anyim. Gin oudo kibeo di komaro wel gi, jo tomon kiwie are kame cungo pi Isiboset wot ka Saulo kede ot ka Benjamin, kede jo tomon kiwie are kikom isirikalen ka Daudi.

¹⁶ Ngat acelacel oko mako wi ngakwor mere, di eko cobe i ngete kede epima; gin dedede jo ot are kiwie ongwon kiko popoto piny kiko to. Pi mano, oko cako nying kabedo nono i Gibeon be “Poto me Ipimai”.

¹⁷ Cenge nono yi oko bedo gwai; di isirikalen ka Daudi oko bwono Abuneri kede jo me Isirael.

¹⁸ Awobe ka Seruya adek oudo tie kuno, Joab, Abisai kede Asakel. Asakel oudo dwir bala atil.

¹⁹ En di eko cako diebo kede Abuneri, emoko amoka i dude kamanono abongo lengere tetu moro.

²⁰ Abuneri oko ngoloro cen di eko penyere be, “Mam in ino, Asakel?” En di eko gamo be, “Ango cabo inononi.”

²¹ Abuneri oko waco ne be, “Wek riama, lokere tetu moro iko mako awobi acel di iko mano jamini mege.” Do Asakel oko meede diebo kede en kamanono.

²² Abuneri bobo oko waco ne Asakel be, “Wek riama, parao tenge; pinyo komio imito be aneki? Abino timo benyo ka ariamo kede omini Joab?”

²³ Do Asakel oko dagi lokere tenge. Di Abuneri oko cobe i yie kede dud tong pelepel. Eko poto piny kanono, di eko to kakame epoto iye nono. Jo dedede kame bin oko tuno kabedo kame Asakel bin opoto iye di eko to oko cungo kanono.

²⁴ Do Joab kede Abisai oko cako wapo Abuneri. Di do ceng oudo tie mito donyo, gin bin kiko tuno i emukura me Ama, kame oudo tie tetu kide me Gia, i yongayo kame oudo oto i wi tim me Gibeon.

²⁵ Jo me ekeko ka Benjamin oko cokere karacel but Abuneri di kiko ribere i ekodet acel; gin bin kiko cungo i wi moru.

²⁶ Di Abuneri oko redo lwongo Joab di ewaco ne be, “Benyo, oyaro bedo nekere nakanaka? In likame ingeo be ajikini mere bino bedo rac? Iyaro tero kare kame rom amene di likame iwaco ne jo ni weko wapo imiegu gi?”

²⁷ Joab oko waco be, “Alairo i nying Rubanga akuo be, ka koto oudo in likame iko yamo, jo na oudo koto omeede wapo imiegu gi kamanono tuno odiko.”

²⁸ Joab oko kuto agwara di jo mege dedede oko cungo; gin likame bobo kiko meede wapo jo me Isirael arabo yi kede gi.

²⁹ Abuneri kede jo mege oko ot iwor kiakia di kibeo i aditot me Yorodan; gin di kiko ngolo ecilet me Yorodan, kiko bedo ot aota cako odiko tuno i dier iceng kiton Makanaim.

³⁰ Joab oko dwogo ki wapo Abuneri; kakame en eko tieko coko kede jo karacel, eko udo be jo ka Daudi tomon kiwie kanyangon oudo li, di likame kimaro iye Asakel.

³¹ Do jo ka Daudi oudo oneko jo ka Abuneri, jo me ekeko ka Benjamin tol adek kede ot kanyape (360).

³² Joab kede jo mege oko tero kom Asakel di kiko yike i ates ka papa mere, kame oudo tie Betelem. Di do Joab kede jo mege oko bedo ot iwor kiakia, di piny oko ru negi Keburon.