2 Petero 2 - Baibuli I Leb Kumam 2013

Jopwony me Angalo

¹ Inabin me angalo da bin oneeno i dier jo, epone nono da en kame jopwony me angalo bino bedo tie kede i diere wu. Gin kibino kelo i mung pwony mogo apat kame rwenyo jo, di kidagi kiton ngadwong gi, ngat kame oculo cul me lako gi. Manoni bino mino gin kikelo i kuo gi awakawaka gikame dudubo gi.

² Jo atot bino lubo epone me caro gi, di kiko bedo kede acae i kom Yongayo me ateni pirgi.

³ Pi eranga gi, gin kiyaro kwalo tam wu kede kope me angalo. Kop kame kongolo ne gi cako sek likame omungere, doko gikame bino dudubo gi da tie cuto.

⁴ Pien Rubanga bin likame oweko aweka imalaikan i kare kame bin kidubo kede, do euco gi i mac kalikame to di eko dilo gi i bur acol cucucuc, pi daro gi ki kuno tuno i ceng me ngolo kop.

⁵ Rubanga bin likame oweko aweka lobo i kare asek. En bin ekelo ariram oko pongo lobo me jo kame bin dagi wore, bed bala elako kuo ka Nua, ngat kame opwonyo kop kame mako kite kopoore, en karacel kede jo kanyaare apat.

⁶ Doko di bin ewango bomban me Sodoma kede Gomora paka doko buru, oudo en engolo ne gi kop me tieko gi, di eko mino gi kibedo anyut me gikame bino timere ne jo kame oudo oyaro dagi wore.

⁷ Doko en bin emio Lot ngat kame kite mere opoore obwot; Lot riki cunye cwer pi caro me jo kame ekite gi reco.

⁸ (Pien kope areco kame dano kopoore nono obedo winyo kede neno buli ceng di oudo ebedo i diere gi owango cunye.)

⁹ Pi mano, Rwot ngeo epone me lako ki atama jo kame wore, kede epone me mino jo kalikame opoore alola paka tuno i ceng me ngolo kop,

¹⁰ twatwal mere jo kame donyo i mit me emuna, kede jo kame cao akarunikin ka Rubanga. Jopwony me angalo nogi cuny gi nwang, doko kitie kede mit me yeyeto wegi deyo abongo bedo kede lworo.

¹¹ Akadi imalaikan, bed bala kitie kede dwongo kede twer kame kalamo, likame yamo kope areco i kom gi i nyim Rwot.

¹² Do jogi cal kede leini kalikame tamo, kame lubo ekite me cwec gi, kame konywalo pi mako me aneka; gin kitie kede yamo areco i kom kope kame kikwia. Kobino neko gi bala leini nogo.

¹³ Gin kibino neno can pi tim gi areco. Cuny gi yom timo gikame cobo mit gi karac iceng. Gin kitie bala kakocukukao kede kopwokere kame kelo ne wu lewic. Kame gin kinywako kede wu ebaga, gin kitie kede yomcuny i ekite gi karac nono.

¹⁴ Gin kitie kede wang me adote, timo dub likame romo gi, kiyodao tam me jo kame cuny gi goro. Kitie kede cuny kotieko pwonyere bedo kede eranga. Gin jo kame kolamo.

¹⁵ Gin kitieko weko yongayo kopoore di kiko rwenyo; kitie lubo yongayo ka Balaam wot ka Beor, kame riki cunye omaro lim kame eudo pi tim areco,

¹⁶ omio oko ronkino en pi raco mege. Asigira gimoro kalikame yamo oko yamo kede dwan dano, di eko gengo tim me poi ka enabi nono.

¹⁷ Jo nogi cal bala ataneko kotuo, kede ekuna kame yamo buko; kotieko iiko ne gi kabedo acol cucucuc.

¹⁸ Gin kiyamo kope me ewaka kame kony gi li, di kiko tic kede mit kalikame beco me kom pi yodao tam me jo kame pwodi obwot abwota kibut jo kame bedo iekite me kuo arac.

¹⁹ Gin kimio jo nogo cikere kame waco be kibino bedo jo kogonyere, do di gin ikom gi kibedo ipasoi me gikame dudubo gi; pien ka gimoro bwono teko me dano, udo dano nono odoko epasoit me gi nono.

²⁰ Pien ingei gin bwot ki emuna me lobo kan pi ngec gi i kom Rwot kame obedo Ngalak wa Yesu Kirisito, kiko bobo alogorokin i ginogo, di ginogo oko bwono teko gi. Man omio nan kitie do iepone me kuo arac kalamo bin i agege.

²¹ Oudo koto ebedo ber kato ka oudo likame gin kingeo yongayo me poore, akaka gin ngeno yongayo me poore di bobo kiko lokere tenge ki cik kacil kame komio gi.

²² Man otimere ne gi bala kame agole me ateni waco kede be, “Ogwok dok nango ngok mere,” kede doko be, “Epege kame kolwoko dok bobo bam i cwoto.”