2 Abakai 1 - Baibuli I Leb Kumam 2013

Elia kede Abaka Akasia

¹ Ingei to ka Akab, lobo me Moab oko jemo ne Isirael.

² Abaka Akasia oudo opoto piny ki dirisa me goropa mere i Samaria di eko wanakin kirac. Aso en eko cwano jo mogo be, “Otunu kong ipenyunu Baalsebub, rubanga me bomba me Ekuron i Pilistia, ka abino sobolo cango ki awanon noni.”

³ Do malaika ka Rwot oko waco ne Elia enabi me Tisibe pi yai ot riamo kede jo kame abaka me Samaria ooro di eko waco negi be, “Mam pien Rubanga likame tie i Isirael en komio itienu ot penyo Baalsebub, rubanga me Ekuron?

⁴ Pi manono, nan otunu iwacenu abaka be Rwot owaco be, ‘Likame ibino yai ki apien, do ateteni ibino to.’ ” Elia oko ot timo kamanono.

⁵ Jo kame abaka oudo ooro nogo oko dok bute, en eko penyo gi be, “Idwogunu pinyo?”

⁶ Gin kiko dwoko ne be, “Icuo moro oriamo kede wa di eko waco ne wa be odwog buti di oko waco ni be Rwot tie waco ni be, ‘Mam pien Rubanga likame tie Isirael en komio in icwao jo ot penyo Baalsebub, rubanga me Ekuron? Pi manono, likame ibino yai ki apien kanataman itie iye, do ateteni ibino to.’ ”

⁷ Abaka oko penyo gi be, “Icuo nono cal nadi?”

⁸ Gin kiko dwoko be, “Oudo engapo egoe ayeyer di etweo piere kede rakoba me del.” En eko waco be, “Elia dano me Tisibe inonono.”

⁹ Abaka oko cwano ngadwong me isirikalen kede isirikalen ot kany but Elia. Gin kiko ot di kiko udo Elia di etie bedo i wi bie, di eko waco ne be, “Dano ka Rubanga, abaka owaco be iwok piny.”

¹⁰ Elia oko dwoko ne ngadwong me isirikalen nono be, “Ka ango dano ka Rubanga, akwao be mac wok ki malo di eko wangi karacel kede jo ni ot kany.” Di mac oko wok ki malo di eko wango ngadwong me isirikalen nono kede isirikalen mege ot kany.

¹¹ Abaka oko bobo cwano ngadwong ace me isirikalen kede isirikalen ot kany but Elia. En eko waco ne be, “Dano ka Rubanga, abaka owaco be bubunyo wok piny!”

¹² Do Elia oko dwoko negi be, “Ka ango dano ka Rubanga, akwao be mac wok ki malo di eko wangi karacel kede jo ni ot kany.” Di mac oko wok ki malo di eko wango ngadwong me isirikalen nono kede isirikalen mege ot kany.

¹³ Abaka bobo oko cwano ngadwong me isirikalen me adek mere kede isirikalen ot kany but Elia. En eko ot di eko riondiko i nyim Elia di eko kwane be, “Dano ka Rubanga, akwai ibed kede kisa buta kede but jotic ni ot kany gi; wek kuo wa.

¹⁴ Neningo mac owok ki malo di eko neko jodongo are me isirikalen kocako bino nango kan, gin karacel kede ikodeta me isirikalen gi me ot kany ot kany. Do nan akwai bed kede kisa buta di iko weko kuo na.”

¹⁵ Di malaika ka Rwot oko waco ne Elia be, “Upere iotunu kede en, kur ibed kede lworo bute.” Aso, Elia oko yai di eko upere kede en ot but Abaka.

¹⁶ Kakame Elia otuno kede, en eko waco ne Abaka Akasia be Rwot owaco be, “Pi kite kame in icwao kede jo ot penyo kop kibut Baalsebub, rubanga me Ekuron, ineno bala Rubanga kame in itwero penyo kop kibute likame tie i Isirael, pi manono, likame ibino yai ki apien kanataman itie iye nono, do ateteni ibino to.”

¹⁷ Aso, Akasia oko to, bala kame Rwot oudo owaco kede i dog Elia. Pi kite kame en oudo eli kede wode, omin mere Yoram oko lunyo kawange bala abaka i mwaka me are me apugan ka Abaka Yekoram wot ka Yekosapat me Yuda.

¹⁸ Tice ace apat kame Akasia otimo kowandiko gi i Itabu me Itatam amako Abakai me Isirael.