1 Temeseo 1 - Baibuli I Leb Kumam 2013

Amot

¹ Baluwa kowok kibut Paulo, ngat kame odoko ngaor ka Kirisito Yesu pi akarunikin ka Rubanga Ngalak wa, kede me ka Kirisito Yesu ngat kame obedo gen wa.

² But Temeseo atin na me ateteni i yei. Akwao be wek kisa, mwolo, kede mulem ka Rubanga Papa kede me ka Kirisito Yesu Rwot wa bed buti.

Ikwenyar i kom Pwony me Angalo

³ Bala kame oudo akwai kede i kare kame oudo atie ot kede Makedonia, nan doko atie kwani be, in dongi Epeso, me wek igeng jo mogo kame tie pwonyo pwony mogo kame pat i kuno.

⁴ Doko wac ne gi kiwek dubo kare gi i itatam, kede wapo nying joakwari, gikame kelo piem; mage likame dongo tic ka Rubanga, gikame cungo i yei.

⁵ Gikame omio wan ociko gi kamano en amara kame wok ki cuny acil, kede ngec aber me cuny, kede yei me ateni.

⁶ Jo mogo otieko apaar tenge ki gi nogi di kiko atarasar donyo yamo kope kame kony gi li.

⁷ Gin kimito bedo jopwony me iswil ka Rubanga, di likame kiniang akadi gikame kitie yamo, arabo gikame gin kimoko be me ateni.

⁸ Wan ongeunu be iswil ber ka ngatamoro otio kede iepone kame mitere.

⁹ Man kelo niang be, likame koketo iswil pi jo abeco, do pi jo kame turo iswil kede pi jo kame dagi winyo kop, pi jo kalikame woro Rubanga kede pi jodubo, pi jo kame li kede cuny me edini kede jo kame cao Rubanga, pi jo kame neko papi gi kede jo kame neko toti gi, pi jonek,

¹⁰ pi jocaro, pi cuo kame buto kede cuo wad gi, pi jo kame mako jo di kiko cato, pi joangalo, pi jo kame kwongo atatai, pi jo kame mio ijura me angalo kede gi dedede ace kalikame upere kede pwony me ateni.

¹¹ Pwony me ateni nono upere kede ejiri me deyo, en ejiri kame Rubanga kame koworo ogena kede.

Pwoc pi Cuny me Kisa ka Rubanga

¹² Ango apwoyo Kirisito Yesu Rwot wa, ngat komia teko me timo tic noni, piento en eneno be ango agenere di eko yera timo tic mere,

¹³ akadi bed bala oudo ango ber kong acae, atidilo en, kede abedo kede gero i kome. Do Rubanga oko tima kisa pien oudo ango likame ayei, omio oudo atie timo gikame akwia.

¹⁴ Rwot wa di oko mina twon kisa mere karacel kede yei kede amara kame tie i Kirisito Yesu.

¹⁵ Man kop me ateni, kame poore agama di iko yei, be Kirisito Yesu obino i piny pi lako jodubo. Ango en kame abedo ngadubo kalamo gin dedede,

¹⁶ do Rubanga oko tima kisa tetekeny kibut ango ngat kame adubo kalamo, wek Kirisito Yesu nyut dire mere adwong, pi mino ango bedo anyut ne jo kame bino yei en di kiko udo kuo kame bedo nakanaka.

¹⁷ Wor kede deyo bed but Abaka kame pugo nakanaka, kalikame to, kalikame neeno, en Rubanga acel kenekene, ikar kede ikar. Amen.

¹⁸ Temeseo atin na, ango atie mini cik noni, di lubere kede kope kame komurao i komi, tetekeny kimii itwer yi kiber,

¹⁹ di itie kede yei kede ngec aber me cuny. Jo mogo pi dagi lubo ngec me cuny gi, omio kiko reto yei gi.

²⁰ Mogo kikom gi obedo Kumenayo kede Alekesanda, jo kame ango atieko jalo i cing Sitani, tetekeny manono pwony gi kiwek bedo kede acae but Rubanga.