1 Samuel 5 - Baibuli I Leb Kumam 2013

Sanduku me Isikan i Diere me Jo Pilistia

¹ Kakame jo me Pilistia omao kede Sanduku me Isikan ka Rubanga, gin kiko yene yai ki Ebenesa tuno i bomba me Asidod.

² Di do kiko tere i abila ka rubanga gi kame nyinge Dagon, di kiko cibe i nget cal acwea ka Dagon.

³ Kakame jo me Asidod oyai kede odiko oru mere, kiko udo di cal acwea ka Dagon opoto piny ariebacuny i nyim Sanduku me Isikan ka Rwot. Gin kiko tinge di kiko dwoke kakare.

⁴ Odiko sek oru mere, gin kiko udo di cal acwea ka Dagon opoto bobo ariebacuny i nyim Sanduku me Isikan ka Rwot, di bade kede wie otuturun tie buto kargi ken gi i dog ekeko, kome kenekene en oudo odong.

⁵ Manono en komio josaseredoti ka Dagon kede jo dedede kame donyo i abila mere i Asidod kalamo dog ekeko tuno tin.

⁶ Rwot oko mino alola atek but jo me bomba me Asidod kede adulion me kio kede. En emio buge ocore i kom jo di jo dedede oko bedo kede lworo.

⁷ Kakame jo me Asidod oneno kede gikame oudo tie timere, gin kiko waco be, “Sanduku me Isikan ka Rubanga me Isirael likame poore bedo i diere wa; piento en etie mino wa alola karacel kede rubanga wa Dagon.”

⁸ Gin kiko oro jo pi lwongo jopug kany me Pilistia pi cokere karacel, di kiko waco negi be, “Otimunu nyo kede Sanduku me Isikan ka Rubanga me Isirael?” Jo me bomba me Gat oko waco be, “Poore tero Sanduku me Isikan ka Rubanga Gat.” Di do gin kiko tero sanduku nono kuno.

⁹ Do kakame gin kitieko tere kede kuno, Rwot oko mino jo me bomba nono da alola, manono oko mino gi lworo adwong. En emio buge ocore i kom jo dedede, joatino kede joadongo rom aroma.

¹⁰ Manono oko bin mino gi kicwao Sanduku me Isikan ka Rubanga Ekuron, en bomba ace me Pilistia. Do kakame Sanduku me Isikan ka Rubanga otuno kede Ekuron, jo me Ekuron oko kok be, “Pinyo komio kikelo Sanduku me Isikan ka Rubanga me Isirael kan pi bino neko wan dedede?”

¹¹ Gin kiko oro jo pi lwongo jopug me Pilistia pi cokere karacel, di kiko waco negi be, “Terunu Sanduku me Isikan ka Rubanga me Isirael tenge; dwokenu kabedo mere, me tetekeny kur enek wan karacel kede joe wa.” Pien Rwot oudo okelo lworo adwong i bomba nono lung. En emio jo me kuno alola adwong;

¹² jo kalikame oko to, buge oko kwokwotun i kom gi, di jo me bomba oko koko but rubangan gi pi konyo gi.