1 Samuel 4 - Baibuli I Leb Kumam 2013

Komao Sanduku me Isikan

¹ I kare nono jo me Pilistia oko cokere pi ot yi kede jo me Isirael, di jo me Isirael da oko yai pi ot yi kede gi. Jo me Isirael oko gero kimere gi Ebenesa, do jo me Pilistia oko gero mergi Apek.

² Jo me Pilistia oko teere cako yi kede jo me Isirael; kakame yi do oko dop kede, jo me Pilistia oko bwono jo me Isirael, di kiko neko cuo aromo bala tutumia ongwon (4,000) i ebar me yi.

³ Kakame isirikalen kobwot mege odwogo kede kabedo kame kigero iye kimere, joadongo me Isirael oko waco be, “Pinyo komio tin Rwot ojalo jo me Pilistia obwono wa? Ootunu okelunu kan Sanduku me Isikan ka Rwot ki Silo, tetekeny Rwot bed tie i diere wa di eko lako wa ki cing jokwor wa.”

⁴ Aso, gin kiko cwano jo Silo, di gin kiko kelo ki kuno Sanduku me Isikan ka Rwot me jo yi, ngat kame kocibo kom mere me ajakanut i wi cerubim. Awobe ka Eli are, Kopuni kede Pinekasi, oko bino karacel kede Sanduku me Isikan ka Rwot.

⁵ Kakame Sanduku me Isikan ka Rwot otuno kede kakame kimere gi oudo tie iye, jo me Isirael oko woo kitek paka piny yangere.

⁶ Kakame jo me Pilistia owinyo kede woo atek, gin kiko penyere be, “Woo adwong atie i kimere me Iburanian no obedo menyo?” Kakame kiko niang kede be Sanduku me Isikan ka Rwot oudo otuno i kimere me Iburanian,

⁷ lworo oko mako gi di kiko waco be, “Rubanga moro otieko bino i kimere gi. Wan otiekunu nyono can! Lem likame pwodi gimoro otimere ne wan kacal kaman!

⁸ Otiekunu nyono can! Ngai kame sobolo lako wa ki cing rubangan atek nogo? Magonogo en rubangan kame bin ojwato jo me Misiri kede can me epone dedede i wi tim.

⁹ Okweunu jo me Pilistia, diunu cunyu ikounu yi cuo cuo, me wek kur odokunu ipasoi but Iburanian, bala kame gin oudo kibedo kede ipasoi but wa; yiunu cuo cuo.”

¹⁰ Aso, jo me Pilistia oko yi kitek di kiko bwono jo me Isirael, di ngat acelacel oko ringo odok ture. Bin oko neko jo atot twatwal i yi nono, pien koneko isirikalen me Isirael aoto kede tien gi tutumia ot adek (30,000).

¹¹ Di oko mano Sanduku me Isikan, doko da oko neko awobe ka Eli are, Kopuni kede Pinekasi.

To ka Eli

¹² Icuo moro me ekeko ka Benjamin oko ringo ki kakame yi oudo tie iye paka tuno Silo i ceng nono. En oudo enyinyilo igoen mege di lobo me ejuk kede tie i wie, pi nyuto cwercuny.

¹³ Kakame etuno kede, Eli oudo tie bedo i nget yongayo di wange tie i yongayo, pien cunye oudo opoto pi Sanduku me Isikan ka Rubanga. Kakame icuo nono otuno kede i bomba di eko tatamo gikame otimere, jo dedede me bomba oko woo kede koko.

¹⁴ Kakame Eli owinyo kede dwan jo akok, en eko penyere be, “Woo no menyo?” Di icuo nono oko bino awakawaka pi waco ne Eli gikame otimere.

¹⁵ I kare nono Eli oudo mwaka me dongo mere oromo ot kanyangon kiwie kanyauni, doko wange da oudo odoko mwadamwada.

¹⁶ Icuo nono oko waco ne Eli be, “Ango awokun ki yi tin, aringino aringin ki yi.” Eli oko penye be, “Woda, nyo otimere?”

¹⁷ Aor nono oko dwoko be, “Isirikalen me Isirael oringo tenge kibut isirikalen me Pilistia; koneko isirikalen atot me Isirael ribo kiton awobe ni are da, Kopuni kede Pinekasi, doko da komao Sanduku me Isikan ka Rubanga.”

¹⁸ Kakame en ewaco kede nying Sanduku me Isikan ka Rubanga, Eli oko poto ataru ki kom kame oudo etie bedo iye i nget erute; kite kame oudo etieko ti kede di doko oudo ecwe, ngute oko tur di eko to. En oudo ebedo ngatel i Isirael pi mwakini ot ongwon.

To ka Apuserut ka Pinekasi

¹⁹ Ci wot ka Eli, dako ka Pinekasi, oudo oyac doko kare oudo onoko me en nywal. Kakame en ewinyo kede be komao Sanduku me Isikan ka Rubanga, kede doko da be papa me cware kede cware da otieko to, en eko riondiko di eko nywal, pien aramo me nywal oudo obwone.

²⁰ Kakame oudo eyapuno to kede, mon kame oudo tie cole oko waco ne be, “Kur ibed kede lworo, inywalo atin awobi.” Do likame en edwoko kop moro amoto keto iye tam mere da.

²¹ En eko cako nying atin nono Ikabod, kame dwong mere be, “Deyo ka Rubanga otieko weko Isirael,” pien oudo kotieko mano Sanduku me Isikan ka Rubanga, kede doko da pi to ka papa me cware karacel kede me ka cware.

²² En ewaco be, “Deyo ka Rubanga otieko weko Isirael, pien kotieko mano Sanduku me Isikan ka Rubanga.”