1 Samuel 29 - Baibuli I Leb Kumam 2013

Jo me Pilistia Odagi Daudi

¹ Jo me Pilistia oko coko isirikalen gi dedede i bomba me Apek, do jo me Isirael oudo oko gero kimere gi i nget atan kame oudo tie Jeserel.

² Di bin abakai me Pilistia tie sirito kede isirikalen gin kame oudo tie i ikodeta me toli kede me tutumian, di Daudi da kede jo mege oudo tie sirito ki cen kede Akis,

³ jotel me isirikalen me Pilistia oko penyere be, “Nyo kame jo me Eburania gi tie timo kan?” Akis oko waco ne jotel me isirikalen me Pilistia be, “Daudi inononi, ngat kame oudo obedo ngatic ka Abaka Saulo me Isirael, kame nataman otieko bedo keda odoko kare alac. Cako en lwi bino buta kan, ango tuno tin likame pwodi audo raco moro bute.”

⁴ Do jotel me isirikalen me Pilistia oko doko ger ne Akis di kiko waco ne be, “Dwok icuo no cen, me wek edok kabedo kame in itieko mine; en likame ebino upere kede wan ot i yi. Pien cengemogo esawa me yi en eromo lokere di eko doko ngakwor wa. Pien epone mene kame loni romo dok kede i nywak kede ngadwong mere? Mam ka elokere ne wa di eko ngongolo wi wa?

⁵ Mam Daudi inononi, kame bin gin kimielo di kiwero wer i kome be, ‘Saulo otieko neko mege tutumia, do Daudi oneko mege tutumian kede tutumian’?”

⁶ Di do Akis oko lwongo Daudi di eko waco ne be, “Ango alairo i nying Rwot kakuo me Isirael be, in dano agenere, doko kibuta oudo poore in ot keda i yi di oko dwogo karacel; pien cako i ceng kame in ibino kede buta tuno tin, ango likame audo raco moro i komi. Do akadi kamanono da, abakai icegun likame yei nin upere kede wa.

⁷ Pi mano, in dok cen; doko ot kede anapakin; kur itim gimoro kame wango cung abakai me Pilistia.”

⁸ Di Daudi oko penyo Akis be, “Kara nyo arac kame ango atimo? Nyo arac kame in iudo but ngatic ni cako i ceng kame ango ageo tic kede buti tuno tin, amio ango likame apoore ot yi kede jokwor me abaka ngadwong na?”

⁹ Akis oko dwoko ne Daudi be, “Ango angeo be in iber i nyima bala malaika ka Rubanga; do jotel me isirikalen me Pilistia otieko waco be in likame ibino upere kede wa ot i yi.

¹⁰ Nataman do in yai odiko sek, in karacel kede jotic me adwong ni kobino kedi, di ikounu ot kabedo kame ango amio wu. Kur imak kop arac kame owaco no i cunyi, piento in lem ibedo kede ango kiber. Yaunu odiko sek di ikounu cako ot di pwodi ceng wok awoka.”

¹¹ Aso, odiko sek di Daudi oko yai kede jo mege pi dok Pilistia. Do jo me Pilistia oko ot kiton Jeserel.