1 Petero 3 - Baibuli I Leb Kumam 2013

Mon kede Cwog gi

¹ Kamanono da, wun mon, iwinyunu cuog wu, tetekeny ka mogo kikom gi likame lubo kop ka Rubanga, kitwero lokere pi iponeso wu abongo wun yamo ne gi kop moro,

² pien gin kibino neno iponeso wu acil kede kuo wu me wor.

³ Kur itubusonu komu ki ooko i yore me kedo wic, ngapo mwolere me saabu, amoto i yore me ngapo igoen kabeco.

⁴ Do wek gikame tubuso wu bed kuo kokanere me cunyu, gikame cil doko kame bedo nakanaka, en kuo me mwolo kede me bedo mot, gikame obedo gi me wel i nyim Rubanga.

⁵ Pien mon kame bin obedo jokacil, kame oudo oketo gen gi i kom Rubanga oudo nare tubuso kom gi kamanoni, i yore me winyo cuog gi,

⁶ bala kame Sara oudo winyo kede Aburaam di elwonge be adwong mere. Wun itiekunu doko anyira ka Sara ka itienu timo gikaber, kede ka gimoro likame mio wu lworo.

⁷ Kamanono da, wun cuo, bedunu karacel kede mon wu di iparunu pirgi, di imiunu gi wor bala jo agoro, pien gin kinywako kede wu kuo kobedo giamia ka Rubanga. Manoni bino mino likame gimoro totolo ilega wu.

Neno Can pi Timo Gikame Poore

⁸ Me ajikini mere, wun dedede bedunu kede cuny acel, kede da cuny me isasir but jo kame tie i peko. Marerenu bala imiegu kede amiegu i Kirisito, di itienu kede cuny me kisa kede tam me mwolo.

⁹ Kur iculunu raco kede raco, arabo ayet kede ayet; do akaka manono, kwaunu winyo ne jo kame timo ne wu kamanono, pien kolwongo wu pi manoni me wek iudunu winyo.

¹⁰ Pien kowandiko be, “Jo kame maro kuo aber di kimito neno kare me bero, poore kigwok leb gi ki yamo gikarac kede dog gi wek yamo kop me abe;

¹¹ poore kiwek timo gikarac, di kiko donyo timo gikaber, poore kimoi anapakin di kiko wapo yore.

¹² pien wang Rwot bit i kom jo kopoore, doko ewinyo kwac gi. Do Rubanga dagi jo kame timo gikareco.”

¹³ Nan do ngai kame bino timo ne wu raco ka itienu kede mit me timo gikaber?

¹⁴ Do akadi bed bala itienu neno can pi timo gikame opoore, kobino mino wu winyo. Kur ilworunu gi, doko da kur cunyu poti.

¹⁵ Do worunu Kirisito i cunyu bala Rwot. Bedunu di itiekunu iikere i kare dedede pi dwoko kop ne ngatamoroni kame penyo wu pi tatamo i yore i yore gen kame itienu kede;

¹⁶ do di itimunu kamanono kede mwolo kede wor. Bedunu kede ngec aber me cuny, tetekeny kame koyeyeto wu, lewic bin mak jo kame yeto tice wu kabeco i Kirisito.

¹⁷ Pien eber neno can pi timo gikaber, ka Rubanga mito kamanono, akaka neno can pi timo gikarac.

¹⁸ Pien Kirisito da bin oneno can pi dub tien acel pi kare lung, ngat kopoore oneno can pi jo kalikame opoore, me wek ekel wa but Rubanga. En bin koneko kome do oko mine ebedo kuo i tipo.

¹⁹ I kuo mere me tipo, en riki eko ot tatamo kop ka Rubanga ne tipere kame oudo kotweo bala mabus,

²⁰ tipere me jo kalikame bin oyei lubo kop ka Rubanga i kare kame en bin edio kede cunye daro gi, kakame Nua oudo tie gero kede yee. Jo anonok, jo kanyauni kenekene en kame oko donyo i yee di pii oko mino gi kibwot.

²¹ Manoni cimo batisimu, gikame nan lako wu, likame pien elwoko tenge cilokom, do ebedo bala kwac but Rubanga pi ngec aber me cuny. En ebedo gikame lako wu pi iyarun ka Yesu Kirisito,

²² ngat kame otieko ot i malo, nan etie i bad tetu cam ka Rubanga, di imalaikan, kede akarunikin, kede twer dedede tie i loc mere.