1 Petero 2 - Baibuli I Leb Kumam 2013

Kidi kame Kuo kede Ateker Kacil

¹ Pi mano, wekunu bedo kede epone dedede me cuny arac, kede ecuke, nyeko, kede dubo nying jo.

² Bala atin mukeru kame pwodi konywalo anywala, bedunu kede imue me cak kame Tipo mio, me wek emi wu idongunu ikounu udo alako,

³ ka ateteni wun itiekunu bilo bero ka Rwot.

⁴ Bianu bute, en kidi kakuo, kame jo odagi, do i nyim Rubanga ebedo kidi me wel kame en eyero.

⁵ Doko bala kide kakuo, wek kogeru kede ot me Tipo ka Rubanga, pi bedo josaseredoti kacil, pi mino giayala i twer me Tipo, giayala kame Rubanga yei gamo pi Yesu Kirisito.

⁶ Pien kowandiko i iwandik kacil be, “Nenunu, ango atie keto kidi i Sion, kidi kame pire tek me esonda, kidi me wel kame ango ayero, likame kobino mino lewic mako ngat kame yei en.”

⁷ Kibutun jo kame yei, en ebedo gi me wel; do kibut jo kalikame yei, ebino timere bala kame kowandiko be, “Kidi kame jogedo odagi olokere odoko kidi kame pire tek me esonda,”

⁸ kede doko be, “En kidi kame bino getaro jo, kidi kame bino mino gi kipopoto.” Gin kigetar pien kidagi winyo kop ka Rubanga, bala kame oudo kotieko iiko ne gi kede cako sek pi timo kamanono.

⁹ Do wun ibedunu ateker kame koyero, josaseredoti me Abaka, ateker kacil, jokacil kikome, me wek itucunu tice me aura me ngat kolwongo wu ki colo pi bino i lero mere me aura.

¹⁰ Bin i kare moro oudo likame ibedunu jokacil, do nan wun jo mege; bin oudo likame kotimo ne wu kisa, do nan kotieko timo ne wu kisa.

Bedo bala Ipasoi ka Rubanga

¹¹ Jo na kame amaro, abako doga butu bala kame nan itienu bedo i piny kan acalo wele me kumbor kame oringini kagwok, kur iyeunu donyo i mit me kom, kame nakanaka yi kede kuo me cunyu.

¹² Bedunu kede iponeso abeco i dier jo kalikame Iyudayan, tetekeny bed bala gin kiwaco kop moro i komu be wun jo kame timo tim areco, wek kikaruno neno tice wu kabeco di kiko mino Rubanga deyo i Ceng me bino mere pi ngolo kop.

¹³ Pi Rwot, jalerenu i akarunikin dedede kame jo oketo, me ngapug adwong,

¹⁴ amoto me jopug ace kame en eoro pi mino jo kame timo gikareco can, kede pi mino pwoc but jo kame timo gikaber.

¹⁵ Pien Rubanga mito be itimunu gikaber me wek imiunu jo aming kame kwia piny lingi.

¹⁶ Bedunu bala jo kotieko gonyere, do di kur imiunu gonyere wu bed gikame umo raco wu; do bedunu bala jotic ka Rubanga.

¹⁷ Worunu jo dedede. Marunu imiegu kede amiegu wu i Kirisito. Lworunu Rubanga kede worunu ngapug adwong.

Gikame Can ka Kirisito Nyuto ne wa Timo

¹⁸ Wun jotic, winyunu jodongo wu kede wor lung; weko jodongo kame jokisa kede kame mwol mege kenekene, do ager mege da.

¹⁹ Pien kopwoyo dano ka ekanyo lito, di eneno can abongo gimoro arac kame etimo, pi kite kame cunye tie kede i kom Rubanga.

²⁰ Pien bero nyo kame in iudo ka in itimo gimoro arac di oko bungi iye, di do iko kanyakino en di idio cunyi? Do ka in idio cunyi kanyakino can pi gikaber kame in itimo, mano Rubanga pwoyo.

²¹ Kolwongo wu pi kop noni, pien Kirisito da oneno can piru, di eko weko ne wu anyut me aluba, me wek ilubunu tiene.

²² En bin likame etimo dub moro; kop moro me abe da likame owok ki doge.

²³ Di bin koyeyeto en, likame en eculo kede ayet; di bin eneno can, likame etitimo jo kame oudo tie mine neno can; do en eketo gen mere i kom ngat kame ngolo kop i ateni.

²⁴ En eyeo dub wa i kome i wi musalaba, tetekeny wan ojikunu dubo di okounu bedo kede kuo kopoore. Itiekunu cango pi aporeso mege.

²⁵ Pien oudo wun iparaonu tenge bala romini, do nan itiekunu dwogo but ngakwat, en ngat kame egwoko cunyu.