1 Petero 1 - Baibuli I Leb Kumam 2013

¹ Baluwa kowok kibut Petero, ngat kame obedo ngaor ka Yesu Kirisito. But jo koringo ayela kame osasarun i adulion me Pontu, Galatia, Kapadosia, Esia kede Bisinia,

² jo kame Rubanga Papa oyero bala kame en oudo eiko kede cako sek, di eko lonyo gi kede Tipo pi bedo jo kame winyo Yesu, kede di oko bino kiro gi kede remo mere pi gin doko cil. Okwao kisa kede mulem ka Rubanga bed dwong ne wu.

Gen Kakuo

³ Opwounu Rubanga Papa me Rwot wa Yesu Kirisito. Pi kisa mere kadwong, en emio konywalo wa i kuo kanyen me gen kakuo, pi iyarun ka Yesu Kirisito kikom jo oto,

⁴ kede da me wek obed jo kame bino udo gi kalikame top, kalikame pwokere kede kalikame rwenyo. Manoni en gikame kokano ne wu i malo,

⁵ wun jo kame Rubanga tie gwoko kede twer mere pi yei wu, tetekeny iudunu alako kame Rubanga otieko iikere pi nyuto i kare me ajikini.

⁶ Lelunu pi manoni, akadi bed bala nan itienu neno can me atama apapat pi kare moro acecek.

⁷ Magonogi tie timere pi nyuto ateni me yei wu. Akadi saabu da gikame karuno dubere kotame kede mac; pi mano, akadi yei wu da, gikame pire tek kalamo saabu, miero kotame kede mac, tetekeny ekaruno kanyakino. Di do ikounu bino udo pwoc, kede deyo, kede wor i Ceng kame kobino nyuto kede Yesu Kirisito.

⁸ Wun imarenu akadi bed bala likame itiekunu nene, doko iyeunu en akadi bed bala nan likame inenenu. Pi mano, itienu kede kilel kalikame wacere, kilel me deyo.

⁹ Pien itienu udo adwokini me yei wu, en alako me cunyu.

¹⁰ Inabin kame bin omurao kop i kom kisa ka Rubanga kame oudo kobino mino wu, omoo di kipepenyo kop i kom alako noni.

¹¹ Gin oudo kitamo mito ngeno ngat nono, amoto kare kame Tipo ka Kirisito kame oudo gin kitie kede tie nyuto, kakame etuco kede can kame Kirisito oudo bino kanyo, kede deyo kame bino lubo.

¹² Oudo konyuto ne gi be likame oudo kitie timo tic pirgi ken gi do piru, di lubere kede gikame nataman jo kame tuco Kop Aber owaco ne wu pi twer me Tipo Kacil kame kocwao ki malo. Gi nogi en gikame imalaikan paro pi neno.

Lwongo pi Bedo kede Kuo Kacil

¹³ Pi mano, bedunu di tam wu otieko iikere cuto, kede di wi wu tio. Ketunu gen wu atwal i kom winyo kame Yesu Kirisito bino kelo ne wu i kare kame kobino nyute iye.

¹⁴ Bala idwe kame wor, kur imiunu kuo wu lub mit kame oudo kong igeunu bedo kede pi kwina piny.

¹⁵ Do bala kame ngat kolwongo wu tie ngat kacil, wuda kikomu bedunu jokacil iekite wu lung.

¹⁶ Pien kowandiko be, “Bedunu jokacil, pien ango atie ngat kacil.”

¹⁷ Aso ka ilwongunu ngat kame ngolo kop ne dano acelacel abongo apokapoka di elubo tice mege be Papa wu, miero do ibedunu kede lworo kede wor i nyime i kare lung kame itienu kede i lobo kan, kame rom bala bedo obukui.

¹⁸ Wun ingeunu be kotimo cul me lako wu ki ikiteso kame kony gi li, kame igamunu kibut joakwari wu. Man kotimo likame kede gikame top bala siliba amoto saabu,

¹⁹ do kotime kede remo ka Kirisito, remo kame wel mere dwong, kame cal bala me katin romo kalikame tie kede gimoro arac arabo pwokere moro i kome.

²⁰ En oudo koyere sek di pwodi likame kocako cweno piny, do oko nyute piru i kare me ajikini noni.

²¹ En emio wu idokunu jo kame geno Rubanga, ngat koyaruno en kikom jo oto, di oko mine deyo tetekeny wun ibedunu kede yei kede gen i kom Rubanga.

²² Bala kame pi wun bedo kede wor i kop me ateni, omio nataman ilonyunu cunyu ikounu bedo kede amara but imiegu kede amiegu wu i Kirisito, mito do imarerenu kenu kenu kede cunyu lung.

²³ Pi kop ka Rubanga, kop kame kuo kede kame bedo nakanaka, wun kotieko nywalo wu idokunu jo kanyen, bala idwe kame nganywal gi likame to do weko kame nganywal gi to.

²⁴ Pien kowandiko be, “Kom dano cal bala lum, doko deyo mere lung cal bala ature me lum. Lum ner, di ature mege ko ony,

²⁵ do kop ka Rubanga bedo nakanaka.” Kop nono en Kop Aber kame oudo kotuco ne wu.