1 Iyutun 12 - Baibuli I Leb Kumam 2013

Jo me Ekeko ka Benjamin Kogeo Lubo Daudi

¹ Magi en jo kame bin oko ot Sikilag but Daudi, i kare kame en likame oudo ekaruno ot kede karamoro akadi acel pi lworo Saulo wot ka Kis. Gin en jo ace kikom jo kame oudo tek i yi twatwal kame oko konyo Daudi yi.

² Gin oudo kibedo jo me ekeko ka Benjamin, doko Saulo da oudo obedo dano me ekeko nono. Gin oudo kikaruno gweno emal akadi lwomo aporocet me engaro kede cing gi moro ni kenekene, tetu ngodal amoto tetu cam.

^3-7 Jotel gin bin en Akieser kede Yowasi, awobe ka Sema me Gibea. Nying jo kame gin bin kitelo ige: Yesiel kede Pelet, awobe ka Asimabet Beraka kede Yeku, jo me Anatot Isamaya dano me Gibeon, en sirikale kame oudo nyinge iruo twatwal doko en oudo ngatel me isirikalen Ot Adek kame bin tek i yi twatwal, Yeremia, Yakasiel, Yokanan, kede Yosabad me Gedera Elusai, Yerimot, Bealia, Semaria, kede Sepatia me Karip Elikana, Isia, Asarel, Yoeser, kede Yasobeam me diakal ka Kora Yoela kede Sebadia, awobe ka Yerokam me Gedor.

Jo kame bin Olubo Daudi ki Ekeko ka Gad

⁸ Magi en nying isirikalen me ekeko ka Gad kame oudo ipirana i yi, gin jo kame bin oko donyo but Daudi i kare kame oudo etie kede i wi tim, kakame en oudo eguro iye. Gin oudo ipirana i yi me ibukui kede tongini; oudo kiger bala inguon di kidwir bala atil me wi mori.

^9-13 Gin oudo kilubere i ruom gi kaman: Eser en oudo ngatel, di Obadia lube, di Eliab, Misimana, Yeremia, Atai, Eliel, Yokanan, Elisabad, Yeremia, kede Makabanai.

¹⁴ Cuo me ekeko ka Gad nogi oudo obedo jodongo me isirikalen. Kikom gi, ngat kame oudo telo isirikalen atot twatwal oudo isirikalen mege tie tutumia cel, di ngat kame mege nonok twatwal ko telo isirikalen tol acel.

¹⁵ Cuo nogi en kame bin oko ngolo ecilet me Yorodan i duwe me agege, i kare kame ecilet me Yorodan pong kede di eko lamar ooko. Gin bin kiko mino jo kame oudo bedo i aditot i bad tetu kide kede tetu tim me ecilet oko ringo.

Jo me Ikekon ka Benjamin kede Yuda kolubo Daudi

¹⁶ Jo mogo me ekeko ka Benjamin kede me ka Yuda bin oko ot but Daudi, kabedo koudo obedo kateko mere.

¹⁷ Daudi oko ot riamo kede gi di en eko waco negi be, “Ka wun ibinunu bala jowota pi konya, ango agamo wu kede cuny aber. Do ka wun ibinunu pi duporo ango but jokwor na, bed bala ango likame atimo ne wu rac moro, akwao Rubanga ka joakwari wa nen manono di eko mino wu alola.”

¹⁸ Tipo ka Rubanga oko donyo i kom Amasai, ngatel me isirikalen ot adek kame ngeo yi twatwal nogo, di eko waco be, “Okwe Daudi wot ka Yese, wan obedo megi! Mulem bed buti kede but jo kame konyi! Pien Rubanga nin en kame konyi!” Di do Daudi oko gamo gi di eko mino gi kibedo jodongo me isirikalen mege.

Jo kame bin Olubo Daudi ki Ekeko ka Manase

¹⁹ Jo mogo kikom isirikalen me ekeko ka Manase oko ngolo but Daudi i kare kame en eoto kede jo Pilistia pi yi kede Abaka Saulo. Do i ateteni en likame bin eko konyo jo Pilistia, pien abakai me Pilistia oudo tie kede lworo be cengemogo eromo ngolo but Saulo ngadwong mere di eko lokere yi kede gin. Manono oko mino gin kidwoke Sikilag.

²⁰ Magi en nying isirikalen me ekeko ka Manase kame bin oko ngolo but Daudi i kare kame oudo etie dok kede Sikilag: Adana, Yosabad, Yediael, Emikairi, Yosabad, Eliku, kede Siletai. Gin dedede oudo kibedo jotel me isirikalen tutumian i ekeko ka Manase.

²¹ Gin bin kiko konyo Daudi yi kede joyak, pien gin dedede oudo kibedo jo atek i yi, kede kibedo da jotel me isirikalen.

²² Jo bin obedo donyo but Daudi buli ceng, pi konye, tuno en udo twon ekodet me isirikalen kame cal bala ekodet me isirikalen ka Rubanga.

Wel me Isirikalen ka Daudi

^23-37 Magi en wel me isirikalen i ikodeta gi, kame bin omako jamini me yi di gin kiko ot donyo but Daudi i Keburon pi konye loko apugan ka Saulo i cinge, di lubere kede kop kame Rubanga owaco: Ekeko ka Yuda: isirikalen tutumia kanyape kede tol kanyauni (6,800), jo kame omako ibukui kede tongini; Ekeko ka Simeon: isirikalen tutumia kanyaare kede tol acel (7,100), gin jo yi atek; Ekeko ka Lebi: isirikalen tutumia ongwon kede tol kanyape (4,600); Jo kame bin lubo Yekoyada ngatel me ot ka Aaron: isirikalen tutumia adek kede tol kanyaare (3,700) Joawade ka Sadoki, ngayi atek kame pwodi dongo adonga: jodongo ot are kiwie are me isirikalen; Ekeko ka Benjamin (ekeko kame Saulo wok kiye): isirikalen tutumia adek (3,000), jo atot kikom jo me ekeko noni oudo oko dong bedo jo kame genere but Saulo; Ekeko ka Epuraimu: isirikalen tutumia ot are kede tol kanyauni (20,800), jo kame oudo tek i yi, doko nying gi oudo iruo twatwal i ekeko noni; Dul me ekeko ka Manase kame bin oko dong i bad tetu tim: isirikalen tutumia tomon kiwie kanyauni (18,000), gin cuo kame koyero pi ot keto Daudi bedo Abaka; Ekeko ka Isakar: jodongo me isirikalen tol are (200), karacel kede isirikalen kame gin oudo kitelo (jodongo nogi bin ngeo gikame jo Isirael poore timo kede kare aber me time); Ekeko ka Sebulun: isirikalen tutumia ot kany (50,000), isirikalen kame cuny gi nwang i yi, di kimako jamini me yi me epone dedede, di kimoko tam acel me konyo Daudi; Ekeko ka Naputali: jodongo me isirikalen tutumia acel (1,000), karacel kede isirikalen tutumia ot adek kiwie kanyaare (37,000) kame gin oudo kitelo, cuo kame oudo mako ibukui kede tongini; Ekeko ka Dan: isirikalen tutumia ot are kiwie kanyauni kede tol kanyape (28,600), koikere pi yi; Ekeko ka Aser: isirikalen tutumia ot ongwon (40,000), kopwonyere kiber doko kiikere pi yi; Jo me ekeko ka Ruben kede me ka Gad, kede dul me ekeko ka Manase kame bin oko wok i loka tetu kide me Yorodan oudo tie isirikalen tutumia tol acel kede ot are (120,000), cuo kame oudo mako jamini me yi me epone dedede.

³⁸ Isirikalen nogi dedede, cuo kame oudo oikere pi yi, bin oko ot Keburon kede tam acel me cibo Daudi bedo abaka me Isirael lung. Jo icegun dedede me Isirael da oudo otieko moko tam acel nono.

³⁹ Gin bin kiko bedo kunono kede Daudi pi ceng adek di kicamo kede kimato gikame jo Isirael wad gi oudo oiko negi.

⁴⁰ Doko jo kame bin iyapiyapi kede gi, jo me ekeko ka Isakar, Sebulun kede Naputali, oko tero negi cam di kiyeo kede pundan, aguraguran, asigiran, kede twonin. Gin kiko tero cam atot twatwal, alos, anyakini kotuo me epigi kame kolulungo, abungeta me olok kotuo, bwini, kede mo. Gin kikelo da twonin kede romini kame koneko me acama. Manoni kotimo pi nyuto ilel kame jo dedede oudo tie kede i Isirael.