Yoweri 2 - Baibuli I Leb Kumam 2013

Obonyo tie bala Ikwenyar me bino me Ceng ka Rwot

¹ Kutunu agwara; gounu duru i moru me Sion, moru kacil ka Rubanga! Mito jo me Yuda dedede bed kede mielkom, pien ceng ka Rwot tie bino, etieko doko iyapiyapi.

² Ebino bedo ceng kame colpiny mere cucucuc, ceng kame col cucucuc, di eumere kede idoun. Bala kame piny walar kede obai di lero ko nyai romo wi mori, kamanono twon isirikalen atek tie bino. Cako lem sek likame pwodi tie gikame cal kamanono, bobo likame bino bedo tie.

³ Kakame gin kibeo iye cal bala kakame mac owango. I tetu nyim gi, lobo cal bala poto me Eden, do ingei gin beo kanono, lobo doko ler bala wi tim. Likame tie gimoro kame gin kiweko.

⁴ Gin kical kede asigiran, doko kiringo bala asigiran me yi.

⁵ Gin kisosomo i wi mori, di kimor bala cabalan; gin kimor bala leb mac kame tie camo arienge. Gin kical bala twon isirikalen koteere pi yi.

⁶ Tetu kakame gin kiloko iye nyim gi, jo dedede bedo ramere arama, nyim jo dedede lokere.

⁷ Gin kiringo bala jo yi; kiyito i wi apama bala isirikalen. Ngat acelacel lubo kakame nyime opimo, gin likame kilengere tenge ki yongayo gi.

⁸ Likame tie ngat kame rio nyim ngawote, dano acelacel lubo yongayo mere; gin kimwomere kibwono jamini me yi kede gi, doko likame tie gikame karuno gengo gi.

⁹ Gin kimwomere i bomba; gin kiringo i wi apama; gin kiyito i ude, kidonyo ki dirisan bala jokuwo.

¹⁰ Ka gin kitie ot piny yangere, idoun da yayangun i malo. Ceng kede duwe doko col cucucuc, doko acer da weko rieny.

¹¹ Rwot mio cik kede cokere i anyim me isirikalen mege; Isirikalen mege tin tot benyo! Jo kame lubo cik mere likame marere. Ateteni ceng ka Rwot dwong; etie ceng me can atek; ngai kame karuno kanyakino en!

Lwongo Jo pi Iswilar

¹² Rwot waco be, “Akadi nataman da, lokerenu di ikounu dwogo buta kede cuny wu lung, di ikanyunu kec, di ikokunu, kede di itururunu.

¹³ Turerenu i cunyu do weko nyinyilo igoen wu.” Dwogunu but Rwot Rubanga wu, piento en engakisa doko emwol, en likame esunyo doko ger, doko epong kede amara kalikame lokere, en egonyo cunye di likame eko mino jo alola.

¹⁴ Ngai nat kame ngeo ka en likame ebino lokere di eko gonyo cunye, di eko mino wu winyo, me bedo tie kede alos kede giamata kame romo, di do wun ikounu bino mino giayala but Rwot Rubanga wu.

¹⁵ Kutunu agwara i wi moru me Sion; cikunu kare me kanyo kec; lwongunu cokere!

¹⁶ Cokunu jo karacel. Miunu jo lonyere; cokunu jo oti karacel; cokunu idwe, akadi imukerun kame pwodi otingo i kor. Eteran kede ateran da miero wek agola gi di gida kiko bino.

¹⁷ Josaseredoti jotic ka Rwot poore leg di kikok, i dierediere me alutari kede kakame kodonyo kede i tempulo be, “Okwe Rwot, bed kede cuny me kisa i kom jo ni. Kur imi jo ni kame maki dok gime acae, kede me anyera i diere me atekerin apat. Pinyo kame mio atekerin apat poore waco be, ‘Rubanga gin kara tie tuai?’ ”

Rubanga Odwoko Amio i Lobo

¹⁸ Di do Rwot oko paro pi lobo mere, di eko bedo kede cuny me kisa i kom jo mege.

¹⁹ Rwot oko waco ne jo mege be, “Nenunu, ango ayaro mino wu kal, bwini, kede mo, di ikounu bino yeng. Likame bobo abino mino wu ibedunu jo kame kocao i diere me atekerin apat.

²⁰ “Ango abino kwanyo jokwor nogo kowok ki bad tetu malo di ako tero gi kakabor kede wu, abino riamo gi kioto i wi tim kakotuo. Jokwor kotelo anyim bino donyo i Nam Oto, odong cen mege bino donyo i nam me Mediterania. Liele gi bino top di kiko doko ngwe. Ateteni gin kitieko timo ne wu jamini areco adongodongo!

²¹ “Okwe wun poti, kur ibedunu kede lworo, do bedunu kede yomcuny kede kilel, pien Rwot otieko timo jamini adongodongo!

²² Wun leini, kur ibedunu kede lworo, pien lum tie libaliba; yen da tie nyak, doko epigi kede olok onyak adikinicel.

²³ “Okwe wun jo me Sion, bedunu kede yomcuny, di ikounu ilel pi gikame Rwot otieko timo ne wu. En etieko mino wu kot me iporo ocwei ne wu kiber, en etieko mino kot ocwei ne wu di tot, kot me iporo kede me oro ocwei ne wu bala lem sek.

²⁴ Alos bino pong i diakale me canyo, Bure me biino bwini kede me bino mo bino pong di kiko alamar.

²⁵ “Ango abino culo wu pi mwakini kame obonyo ocamo kede cam wu. Gin en twon isirikalen kame oudo ango acwao pi suro wu.

²⁶ “Nataman do ibinunu bedo tie kede cam atot kame ibinunu camo di ikounu yeng. Di do ikounu paka, ango Rwot Rubanga wu, ngat kame otieko timo ne wu jamini me aura. Jo na likame bobo kobino mino lewic mako.

²⁷ Di wun ikounu bino ngeno be ango atie i diere wun jo me Isirael, kede be ango Rwot, en Rubanga wun doko likame tie moro apat. Jo na likame bobo kobino mino lewic mako wu.”

Ceng ka Rwot

²⁸ “Di do icen mere ango ako bino mino tipo na but jo dedede; idwe wu awobe kede anyira bino murao kop na, jo wu oti bino lek, kede jo wu atino da bino neno gianyuta.

²⁹ I kare nono ango abino mino tipo na kiton but ipasoi kede apasoi.

³⁰ “Ango abino mino gianena mogo me ceng nono nyutere i malo kede i lobo; onyo remo bino bedo tie, kede mac kede yiro kame duny swiridido malo.

³¹ Ceng bino lokere doko col cucucuc, di duwe ko lokere edoko kwar bala remo di pwodi ceng ka Rwot likame otuno, en ceng adwong me can atek.

³² Di do oko bino lako jo dedede kame bino kwano Rwot pi konyo gi. Bala kame Rwot otieko waco kede be, ‘I moru me Sion kede i Yerusalem tie jo mogo kame bino bwot; jo kame ango Rwot alwongo bino bwot.’ ”