Yosua 9 - Baibuli I Leb Kumam 2013

Jo me Gibeon Ongalo Yosua

¹ Kop kame jo me Isirael oudo tie bwono kede jokwor gi oko tuno i yit abakai kame oudo tie i bad tetu tim me ecilet me Yorodan, i piny kobedo imukuran imukuran, kede piny i bad imukuran, kede i elet me dog nam adwong me Mediterania, tuno paka Lebanon i bad tetu malo. Gin abakai me jo Kiti, jo Amor, jo Kanan, jo Perisi, jo Kibi, kede jo Yebu;

² gin kiko coko cing gi karacel pi yi kede Yosua kede jo me Isirael.

³ Do kakame jo me Gibeon, gin jo Kibi, owinyo kede gikame Yosua otimo ne bomban me Jeriko kede Ai,

⁴ gin kiko ngolo ne rieko. Gin kiko mako cam mogo, di kiko tweno i ngei pundan gi ipukoi oti, kede isaun me launi kame kodadapo me mako bwini.

⁵ Di kiko ngapo igoen konyinyilun kede amukai oti. Mugati kame kimako oudo otuo di kipurao.

⁶ Gin kiko ot but Yosua kakame oudo kigero iye kimere Giligal, di kiko waco ne karacel kede jo me Isirael be, “Wan owok ki piny abor, nan wan omito be itimunu isikan keda wa.”

⁷ Do jo me Isirael oko waco ne jo Kibi nogo be, “Wan likame otwero timo kede wu isikan, pien cengemogo wun ibedunu kakame iyapi kede wa.”

⁸ Gin kiko waco ne Yosua be, “Wan jotic wun.” Yosua oko penyo gi be, “Wun alu? Iwokunu ki tuai?”

⁹ Gin kiko waco ne Yosua be, “Wan jotic wu owok ki piny abor, pien wan owinyo kop i kom Rwot Rubanga wu. Wan owinyo gi dedede kame en etieko timo i lobo me Misiri,

¹⁰ kede gikame en etimo ne abakai are me jo Amor atie i bad tetu kide me Yorodan, gin Abaka Sikon me Kesibon kede Abaka Og me Basan, ngat kame oudo bedo Asitarot.

¹¹ Aso jotel wa kede jo dedede me lobo wa oko waco ne wa be oik cam moro me sapali di oko bino riamo kede wu. Kiwaco ne wa be wan odok jotic wu di ikounu timo kede wa isikan.

¹² Neningo mugati wa. Kakame oyai kede ki paco pi bino riamo kede wu, oudo pwodi kiliet. Neningo, kitieko tuo doko kipurao.

¹³ Kakame opiko kede bwini i yi isaun me lau nogi, oudo pwodi kinyen, do nan kitieko mwomwocun. Igoen wa kede amukai wa da otieko ti i yongayo.”

¹⁴ Jo me Isirael oko gamo cam kibut gi abongo penyo tam kibut Rwot.

¹⁵ Yosua oko timo kede gi isikan me awotin di eko cikere pi gwoko kuo gi, di do jotel me Isirael oko kwongere pi gwoko isikan nono.

¹⁶ Do di ceng adek okato ingei gin timo isikan, jo me Isirael oko winyo be jo nogo oudo obedo jokio gi.

¹⁷ Jo me Isirael oko yai ot di kiko tuno i bomban kame jo nogo bedo iye ingei ceng adek, gin en bomban me Gibeon, Kepira, Berot, kede Kiriat Yearim.

¹⁸ Do jo me Isirael likame oko suro gi, pien jotel me Isirael oudo okwongere but gi i nying Rwot Rubanga me Isirael. Jo dedede me Isirael oko bedo kede ingungur but jotel gi pi kop noni,

¹⁹ do gin kiko dwoko be, “Wan otieko kwongere but gi i nying Rwot, Rubanga me Isirael, pi manono nataman likame otwerunu timo negi gimoro arac.

²⁰ Nan wan miero owekunu gi kibedi pi kite kame wan otieko kwongere kede but gi, aso ka li, lilo ka Rubanga bino poto i kom wa.

²¹ Wekunu gi kibedi, do gin kibino donyo mwodo ne wa yen kede weko ne wa pii.” Manoni en gikame jotel oko waco ne jo i kom kop amako jo nogo.

²² Yosua oko lwongo jo me Gibeon bute di eko penyo gi be, “Pinyo komio ingalunu wa di iwacunu be wun ibedunu kakabor kede wa, do di i ateteni itienu kom bedo karacel kede wa?

²³ Pi manono, nan wun Rubanga otieko lamo wu; pi kare dedede ibinunu bedo ipasoi, jomwod yen kede jowek pii me tempulo ka Rubanga me Isirael.”

²⁴ Gin kiko dwoko ne Yosua be, “Adwong, wan otimo kamanoni pien wan oniang kiber be Rwot Rubanga owaco ne ngatic mere Musa be wun ipoorenu neko jo dedede kame bedo kanoni, di ikounu mano lobo noni doko meru; aso, manono en omio wan obedo kede lworo pi kuo wa.

²⁵ Do nataman wan otie i cingi, in tim ne wa gikame in ineno be ber kibuti.”

²⁶ Aso gikame Yosua oko timo negi ine: en eko gwoko gi likame eyei ne jo me Isirael neko gi.

²⁷ Do i tetucel, en eko mino gi kidoko ipasoi, jomwod yen kede jowek pii ne jo me Isirael kede me alutari ka Rwot. Tuno tin gin kibedo timo tic noni i kakame Rwot oyero be wore kiye.