Yosua 8 - Baibuli I Leb Kumam 2013

Mako kede Dudubo Bomba me Ai

¹ Rwot oko waco ne Yosua be, “Kur ibed kede lworo amoto potocuny; kwany isirikalen dedede iko ot tuno i bomba me Ai. Neningo ango abino mino i cingu abaka me Ai kede jo mege, bomba mere kede lobo mere dedede.

² Ibinunu timo ne Ai kede abaka mere gikame itimunu ne bomba me Jeriko kede abaka mere; do ibinunu tero jamini kame iyakunu kede leini pi bedo megu. Iikerenu ikounu ngeso sure ki cen ngee.”

³ Aso, Yosua kede isirikalen dedede oko yai ot suro bomba me Ai. En eyero jo yi tutumia ot adek (30,000) eko cwano gi iwor

⁴ di ewaco negi be, “Wun ibinunu ot di ikounu buto kiire cen ngei bomba, do kur ikatunu kakabor twatwal, doko miero ibedunu di ikapakina pi sure.

⁵ Ango kede jo na wan obino beo ki anyim ot iye. Kame gin kiko wok suro wa, wan obino ringo tenge kibut gi bala ngoce bobo.

⁶ Gin kibino wapo wa tuno wan tero gi kakabor kede bomba, pien gin kibino paro be wan otie ringo gi bala ngoce bobo. Kakame wan otie ringo kede,

⁷ wun ibinunu motun di ikounu mako bomba. Rwot Rubanga wu bino mine i cing wu.

⁸ Kame itiekunu mano bomba nono, wangenu bala kame Rwot ociko; nenunu, manoni en cik kame ango atieko mino wu.”

⁹ Aso, Yosua oko cwano gin kioto di kiko buto kipwono, di kiko donyo kuro ki kunono, i bad tetu tim me Ai, dierediere me Betel kede Ai. Do iwor nono Yosua oko dong kakame kimere gi oudo tie iye.

¹⁰ Yosua oko dilo yai odiko sek di eko lwongo isirikalen dedede karacel, di en karacel kede jotel me Isirael kiko telo isirikalen ot Ai.

¹¹ En karacel kede isirikalen kiko ot kidok i bad tetu erute adwong me bomba, di kiko sipo kimere gi i bad tetu malo, di aditot en kame poko kakame gin kitie iye kede bomba me Ai.

¹² En eko cibo isirikalen aromo bala tutumia kany opwono kiire dierediere me Betel kede Ai, i bad tetu tim me bomba.

¹³ Aso, bin gin kiko cibo isirikalen atot mege i bad tetu malo me bomba, kede anok mege oko bedo i cen ngee i bad tetu tim. Do Yosua oko bedo i aditot iwor nono dedede.

¹⁴ Kakame abaka me Ai oneno kede kamanono, en karacel kede jo me bomba kiko dilo wok ki bomba awakawaka di kiko ot tetu aditot me Yorodan pi yi kede jo me Isirael, kabedo kame oudo ber kicako riamo iye sek. En oudo likame engeo be isirikalen mogo oudo opwono cen ngei bomba pi sure.

¹⁵ Yosua kede jo mege oko cuko ringo tenge bala kobwono gi, di kiko dok tetu wi tim.

¹⁶ Gin oudo kilwongo jo dedede me bomba ocokere di kiko donyo wapo jo me Isirael. Kakame oudo gin kitie wapo gi kede, kiko lanyo bomba kakabor.

¹⁷ Jo dedede me bomba me Ai kede Betel oudo owok kioto wapo jo me Isirael, di kiko weko bomba odong twolo abongo ngatamoro adare.

¹⁸ Rwot oko waco ne Yosua be, “Cim epima kame tie i cingi tetu bomba me Ai, pien ango ayaro mine i cingu.” Yosua oko cimo epima kame oudo tie i cinge tetu bomba me Ai.

¹⁹ Cucuto di en erieo cinge di eko cimo epima tetu bomba, isirikalen kame oudo opwono ingei bomba oko yai awakawaka ki kapwono gi, di kiko ringo i bomba di kiko make. Cucuto gin kiko wango bomba nono.

²⁰ Aso kakame jo me bomba me Ai ongoloro kede cen, gin kiko neno di yiro swiridido malo. Likame oudo kitie kede karingo, pien jo me Isirael koudo ongalo ringo i wi tim da oko lokere dwogo suro gi.

²¹ Kakame Yosua kede jo mege oneno kede be isirikalen koudo opwono ingei bomba otieko mako kede bomba, doko oudo etie wang, gin kiko lokere dwogo cen di kiko donyo neko jo me Ai.

²² Jo ace me Isirael koudo tie wango bomba da oko wok ne jo me Ai, di do jo dedede me Isirael oko luko jo me Ai di kiko neko gin dedede,

²³ kwanyo kenekene abaka me Ai, kame gin kiko mako di kiko tere but Yosua.

²⁴ Kakame jo me Isirael otieko neko kede jo me Ai i wi tim kakame oudo jo nogo owapo gi iye, gin kiko dok i bomba me Ai di kiko neko jo dedede koudo tie kunono.

²⁵ Wel me jo me Ai kame oko neko cenge nono, cuo karacel kede mon, oudo tie tutumia tomon kiwie are.

²⁶ Yosua oudo odong adonga cimo epima mere tetu bomba me Ai kamanono tuno kede di oudo kotieko neko jo dedede me kunono.

²⁷ Kenekene gikame jo me Isirael oko tero pi doko mergi en oudo leini kede jamini kame oudo kiyako, bala kame oudo Rwot owaco ne Yosua.

²⁸ Aso, bin Yosua oko wango bomba me Ai di eko weke di epopoto, bala kame etie kede tuno tin.

²⁹ Gin bin kiko neko abaka me Ai di kiko liero kome i kor yat tuno otieno. Esawa kame ceng oudo tie donyo kede, Yosua oko mino cik be kwany kome piny; jo oko kwanyo kome di kiko uce i erute me bomba, di kiko ume kede twon atukit me kide, kame pwodi tie tuno tin.

Kosomo Iswilia ka Rwot i Moru me Ebal

³⁰ Yosua oko gero ne Rwot Rubanga me Isirael alutari i wi moru me Ebal.

³¹ En etime di lubere kede cik kame Musa ngatic ka Rwot oudo omio jo me Isirael, bala kame kowandiko i iswil ka Musa be, “alutari kame kotimo kede kide kalikame kopao, kide kalikame gipac me nyonyo ayon omulo.” Gin kiko donyo mino kiye giayala awanga kede giayala me nywak.

³² Yosua oko wandiko i kom kide nogo iswilia ka Musa, di jo dedede tie neno.

³³ Jo me Isirael kede jotel gi, kede jodongo gi, jongolkop, karacel kede jokumbor kame oudo bedo i diere gi oko cungo i bad tetuni kede i bad tetuca me Sanduku me Isikan ka Rwot, di kiloko nyim gi kakame Jolebi josaseredoti kame oudo tie yene tie iye. Dul me jo oko cungo oloko ngei gi ne moru me Gerisim, kede dul ace oko cungo kiloko ngei gi ne moru me Ebal. Musa ngatic ka Rwot oudo ociko negi pi timo kamanono kame kare otuno me mino gi winyo.

³⁴ Yosua oko somo iswilia dedede, ribo kiton winyo kede ilam, bala kame kowandiko gi kede i itabu me Iswil.

³⁵ Yosua osomo cik ka Musa dedede ne ekodet me jo koudo ocokere, kame ribo kiton mon kede idwe kede jokumbor kame oudo bedo i diere me jo me Isirael.