Yosua 6 - Baibuli I Leb Kumam 2013

Jo me Isirael Omao Jeriko

¹ Ceng dedede oudo kocego erute me bomba me Jeriko di oko donyo dare adara pi jokwor me Isirael. Likame tie ngatamoro kame oudo donyo iye arabo wok ooko kiye.

² Rwot oko waco ne Yosua be, “Ango abino mino i cingu bomba me Jeriko karacel kede abaka mere, kede isirikalen atek yi atie iye.

³ In karacel kede isirikalen ni ibinunu jwiao manaro bomba nono tien acel buli ceng pi ceng kanyape.

⁴ Josaseredoti kanyaare bino ot i anyim me Sanduku me Isikan; ngat acelacel kikom gi bino mako agwara me tung emerekek. I ceng me kanyaare in kede isirikalen ni ibinunu jwiao mamano bomba nono tien kanyaare di josaseredoti kuto agwara.

⁵ Gin di kiko bino kuto agwara dwan acel awao koko cutucutu, di do jo dedede ko bino woo kitek, di apama koluko bomba ko bino rwacere piny. Di do isirikalen dedede ko bino donyo i bomba.”

⁶ Aso, Yosua wot ka Nun oko lwongo josaseredoti di eko waco negi be, “Tingunu Sanduku me Isikan di jo kanyaare kibutu ko ot i anyim mere, di ngat acelacel mako agwara me tung emerekek.”

⁷ Di en eko mino jo cik pi cako jwiao manaro bomba nono, di isirikalen kame yabo yongayo en atelo anyim ne Sanduku me Isikan.

^8-9 Bala kame Yosua oudo ociko ne kede jo, isirikalen kame yabo yongayo en oko telo anyim; di josaseredoti kame oudo kuto agwara en oko lubo gi; di josaseredoti koudo riongo Sanduku me Isikan oko lubo; di do isirikalen ace oko lubo gi ki cen. I esawa nono agwara oko bedo kok akoka nakanaka.

¹⁰ Do Yosua oudo ociko ne jo be kur kiwoi akadi waco kop moro tuno i ceng kame en ebino ciko negi kede pi timo kamanono.

¹¹ Aso, jo oko riongo Sanduku me Isikan ka Rwot di kiko manaro kede bomba tien acel, di kiko dok ot buto kakame oudo kigero iye kimere gi.

¹² Oru mere odiko sek, Yosua oko yai di josaseredoti oko kwanyo Sanduku me Isikan.

¹³ Gin dedede kiko donyo jwiao manaro bomba. Me agege isirikalen ayabo yongayo en otelo anyim, di josaseredoti koudo kuto agwara nakanaka di jo jwiao oko lubo gi; di josaseredoti koudo riongo Sanduku me Isikan oko lubo; di do isirikalen aoto ki cen oko lubo.

¹⁴ I ceng me are noni gin kiko jwiao rimaro bomba tien acel, di kiko dok kakame kimere gi oudo tie iye. Gin kiko bedo timo kamanoni pi ceng kanyape.

¹⁵ I ceng me kanyaare gin kiko dilo yai obai di kiko donyo jwiao rimaro bomba iepone acel nono tien kanyaare. Ceng nono kenekene en kame gin kirimaro kede bomba tien kanyaare.

¹⁶ Kakame oudo kitie manaro kede bomba tien me kanyaare, di do josaseredoti oudo oyapuno kuto agwara, Yosua oko waco ne jo be, “Wounu! Pien Rwot otieko mino wu bomba noni.

¹⁷ Bomba kede gi dedede atie iye obedo giamia but Rwot, kopoore dudubo gi. Kenekene ibinunu weko malaya Rakab kede jo kame tie i ode, piento en oudo ekano ibegai wa kame wan ocwao.

¹⁸ Do wun miero kur iterunu gimoro kame kopoore dudubo, kur cunyu wai wu tero gimoro kikom gi; pien ka itimunu kamanono ibinunu kelo peko i kimere me jo me Isirael di oko bino dudubo gi.

¹⁹ Gi dedede kame kocweo kede siliba, saabu, kede buronsi kede ayon kobino poko gi kibedo gikame komio but Rwot, kobino keto gi i isau me kano lim ka Rwot.”

²⁰ Aso, josaseredoti oko kuto agwara. Cucuto di jo owinyo koko me agwara, jo oko woo kitek di apama koluko bomba oko poto ritirit, di do isirikalen oko pikere i bomba di kiko mane.

²¹ Di do gin kiko mino jame dedede but Rwot bala gikame kopoore dudubo; kineneko jo dedede koudo tie i bomba kede epima: cuo, mon, jo atino kede jo adongo. Kineneko da dok romini kede pundan.

²² Yosua oko waco ne cuo are koudo ooto begao bomba nono be, “Wun otunu i ot me malaya noca di ikounu wote ooko, en karacel kede jo mege dedede, bala kame oudo ikwongerenu kede bute.”

²³ Aso, cuo nogo koudo obedo ibegai oko donyo i ot ka Rakab di kiko wote ooko, en karacel kede papa mere, toto mere, imiegu mege, kede jo dedede koudo bedo kede en, kede joawade mege, di kiko tero gi i nget kimere me jo me Isirael.

²⁴ Di do isirikalen me Isirael oko wango bomba nono dopodop karacel kede gi dedede koudo tie iye. Kenekene kiko weko siliba, saabu, kede jamini kame kocweo kede buronsi kede ayon, di kiko tero gi kiketo gi i isau me kano lim i ot ka Rwot.

²⁵ Do Yosua oko weko malaya Rakab kede jo mege dedede, piento en oudo ekano ibegai koudo Yosua ocwao pi ot ngingico bomba me Jeriko. (Ikwae mege tie Isirael tuno tin.)

²⁶ Yosua oko mino ikwenyar atek di ekwongere be, “Rwot bino lamo dano moro kame bino bobo medo gero bomba me Jeriko. Ngat kame bino cibo acakini me apama mere bino kei wode kao, ngat kame bino gero irutei mege bino kei ngorit mere.”

²⁷ Aso, Rwot oko bedo tie kede Yosua, di nyinge oko doko iruo i piny nono dedede.