Yosua 5 - Baibuli I Leb Kumam 2013

¹ Kakame abakai me jo Amor kame tie i bad tetu tim me ecilet me Yorodan, kede abakai dedede me jo Kanan kame tie i dog nam adwong me Mediterania owinyo kede be Rwot omio ecilet me Yorodan otuo, paka tuno di jo me Isirael oudo otieko ngolo loka, cuny gi oko nyote, di kom gi oko to pi jo me Isirael.

Akepo Kotimere Giligal

² I kare nono Rwot oko waco ne Yosua be, “Tet pale me nyonyo atek di iko bobo kepo jo me Isirael.”

³ Aso, Yosua oko teto pale me nyonyo atek di eko kepo jo me Isirael i kabedo kame kolwongo be Emukura me Akepo.

^4-6 Kakame jo me Isirael oyai kede ki Misiri, oudo cuo dedede otieko kepere. Do pi kare me mwakini ot ongwon kame jo oudo tie ngolo kede wi tim, bin likame oko kepo atin awobi moro. Doko da i atiekini me kare nono, cuo dedede kame oudo obedo jo yi kakame kiyai kede ki Misiri oudo otieko totoun, pien oudo likame kilubo kop ka Rwot. Rwot oudo okwongere be jo nogo likame bino neno lobo alac di emio, kame bin en ecikere pi mino joakwari gi.

⁷ Aso, idwe gin kame Rubanga oketo pi lunyo wang gi en kame Yosua oko kepo, pien oudo likame kokepo gi i kare kame oudo kitie ot kede ki wi tim.

⁸ Kakame oudo kotieko kepo kede jo, ateker me Isirael dedede oko dong bedo kakame oudo gin kigero iye kimere gi tuno gin cango.

⁹ Rwot oudo oko waco ne Yosua be, “Tin ango akwanyo kibutu lewic me bedo ipasoi i lobo me Misiri.” Manono en komio kolwongo kanono be Giligal tuno tin.

¹⁰ Kakame jo me Isirael ogero kede kimere gi Giligal, i ebar kame iyapi kede Jeriko, gin oudo kiko lubo itok amako Ebaga me Kalamo, di kiko camo ebaga nono cako otieno kame ru i ceng me tomon kiwie ongwon me duwe.

¹¹ Ceng kolubo mere gin di kiko camo cam kame oudo kopuro i lobo me Kanan. Kicamo engano kame kocelo i mac kede mugati kame kotimo abongo arup.

¹² Iceng nono emana oko jiko cwei negi di likame doko kiko bedo tie kede emana; gin kiko donyo do camo cam kame kopuro apura i lobo me Kanan.

Yosua kede Icuo Amako Epima

¹³ Kakame Yosua onoko kede Jeriko, en eko neno icuo kowoto epima etie mako i cinge. Yosua oko ot bute di oko penye be, “In dano wa arabo ngat acel kikom jokwor wa?”

¹⁴ Icuo nono oko dwoko be, “Li, do ango nan abino kan bala ngadwong me isirikalen ka Rwot.” Yosua oko riebere piny i lobo pi mine wor, di eko waco ne be, “Adwong, ango ngatic ni, nyo kame itie ciko na pi timo?”

¹⁵ Ngadwong me isirikalen ka Rwot oko waco ne be, “Gony amuka ki tieni, pien itie cungo kabedo kacil.” Yosua oko timo kamanono.