Yosua 24 - Baibuli I Leb Kumam 2013

Yosua Oyamo kede Jo i Sekem

¹ Di do Yosua oko coko jo me Isirael dedede Sekem. En eko lwongo joadongo, jotel, kede jongolkop, kede jodongo me tice me Isirael, di gin kiko ot i nyim Rubanga.

² Yosua oko waco ne jo dedede be, “Rwot Rubanga me Isirael waco be, ‘Riki sek joakwari wu bin obedo loka tetuca me ecilet me Eupurate di kiworo rubangan apat. Ngat acel kikom gi bin en Tera, papa me Aburaam kede Nakor.

³ Di ango ako kwanyo kwaru wu Aburaam ki loka kunono, di ako tere beo i lobo me Kanan lung. Ango ako mine ikwae katot. Amie Isaka,

⁴ di ako mino Isaka Yakobo kede Esau. Ako mino Esau piny kobedo mori mori me Edom pi bedo mere, do kwaru wun Yakobo kede idwe mege oko ot Misiri.

⁵ I cen mere ango ako ooro Musa kede Aaron, di ako mino peko adwong obedo Misiri. Do ango bin ako kwanyo wun ki kuno.

⁶ I kare kame bin ango akwanyo kede joakwari wu ki Misiri, jo me Misiri bin oko wapo gi kede cabalan kede asigiran me yi. Do kakame joakwari wu oko tuno kede i Nam Akwar,

⁷ gin kiko kok buta pi mito be ango akony gi, di ango ako mino colpiny obedo tie i dierediere gin kede jo me Misiri. Ango ako mino pii me nam odipere i kom jo me Misiri di gin kiko mwony i nam. Wun ingeunu gikame ango bin atimo ne jo me Misiri. “ ‘Di do wun bin ikounu bedo i wi tim tieko kare kalac.

⁸ Ango bin ako kelo wu i lobo me jo Amor, jo kame oudo bedo loka tetu kide me Yorodan. Gin bin kiko yi kede wu do ango ako mino wun ibwonunu gi. Wun bin imuducarunu gi di ikounu mano lobo gi odoko meru.

⁹ Abaka me jo Moab, Balak wot ka Sipor, bin oko iikere pi bino yi kede wu. En kong ecwao kop di oko lwongo ne Balaam wot ka Beor. En eko kwane be elam wu.

¹⁰ Do ango ako dagi winyo kop ka Balaam; pi mano, en eko lamo ne wun winyo. Manono en kite kame ango alako wu kede ki cing Balak.

¹¹ Wun bin ikounu ngolo ecilet me Yorodan di ikounu tuno Jeriko. Jo me Jeriko bin oko yi kede wu, doko jo Amor da oko yi kede wu, akadi jo Perisi, jo Kanan, jo Kiti, jo Girigas, jo Kibi kede jo Yebu. Do ango bin amio wun ibwonunu gi.

¹² Ango bin amio mielkom atek omako gi, di ako riamo tenge ki nyim wun abakai are me jo Amor; likame ipimai arabo imalia wu en koriamo gi.

¹³ Ango bin amio wu lobo kalikame wun en oudo itimunu teko me puro, kede bomban kalikame wun en oudo igerunu. Wun nataman itienu bedo i yi gi di icamunu anyakini me olok kede me olibeti kalikame wun en ipitunu.’

¹⁴ “Pi mano, poore iworunu Rwot di ikounu timo ne tic kede ateni kede genere. Ucunu tenge rubangan kame bin joakwari wu woro ki loka tetuca me ecilet kede i Misiri, di ikounu timo tic ne Rwot en kene.

¹⁵ Ka wun likame imitunu timo tic ne Rwot, tin yerunu ngat kame wun ibinunu timo ne tic, arabo rubangan kame joakwari wu bin woro i Mesopotamia, arabo rubangan me jo Amor kame wun itienu bedo i lobo gi. Do ango kede jo me diakal na, wan obino timo ne Rwot tic.”

¹⁶ Jo oko gamo be, “Wan likame obino weko Rwot di oko ot timo tic ne rubangan apat!

¹⁷ Rwot Rubanga wa en kame bin okwanyo joakwari wa kede wada ki Misiri kakame bin otie ipasun iye, doko wan bin oneno kede wang wa gianena adongodongo kame en etimo. En ebedo gwoko wa i kabedere dedede, kede kibut atekerin dedede kame wan bin obeo i diere gi.

¹⁸ Di wan bin otie donyo i lobo noni, Rwot oko riamo tenge jo Amor dedede kame oudo tie bedo kanoni. Pi mano, wada obino timo tic ne Rwot; en ebedo Rubanga wa.”

¹⁹ Yosua oko waco ne jo be, “Do wun cengemogo likame ibinunu karuno timo tic ne Rwot piento en ebedo Rubanga kacil. En Rubanga kame nganyeko; en likame ebino sasiro wu pi turo iswil arabo pi dub wu.

²⁰ Ka wun iwekunu Rwot di ikounu donyo timo tic ne rubangan me kumbor, en ebino lokere dagi wu di eko mino wu alola. En ebino muducaro wu, bed bala oudo lem etimo ne wu bero.”

²¹ Di jo oko waco ne Yosua be, “Li ba! Wan obino timo tic ne Rwot.”

²² Yosua oko waco ne jo be, “Wun en ibedunu ijurak i komu kenu be wun itiekunu yero Rwot, pi wun timo ne tic.” Gin kiko waco be, “Eebo, wan en ijurak.”

²³ Di Yosua oko waco negi be, “Aso ucunu tenge rubangan me kumbor kame itienu kede, di ikounu loko cuny wu but Rwot, Rubanga me Isirael.”

²⁴ Jo oko waco ne Yosua be, “Wan obino timo tic ne Rwot Rubanga wa, doko wan obino lubo cik mege.”

²⁵ Aso, Yosua oko timo ne jo isikan kede Rubanga cenge nono, di eko mino gi iswilia kede cik i Sekem.

²⁶ Yosua oko wandiko cik nogi i itabu me Iswil ka Rubanga. Di en eko kwanyo kidi ati di eko sipe i dud yat oak i kabedo kacil ka Rwot.

²⁷ En eko waco ne jo be, “Nenunu, kidi noni en kame bino bedo mujura kame pido wa. En etieko winyo kope dedede kame Rwot owaco ne wa. Pi mano, en ebino bedo mujura i komu ka wun likame ibedunu kede ateni but Rubanga wu.”

²⁸ Di do Yosua oko peruno jo di gin kiko dok i adulion gi.

Yosua kede Eleasar Oto

²⁹ Ingei timo gi nogo, ngatic ka Rwot, Yosua wot ka Nun oko to di mwakini mege me dongo oudo oromo tol acel kede tomon.

³⁰ Gin kiko yike i lobo mere amake i Timunat Sera, kame oudo tie i piny kobedo mori mori me Epuraimu, i bad tetu malo me moru me Gas.

³¹ Jo me Isirael bin oko timo tic ne Rwot pi kare me kuo ka Yosua lung kede me joadongo kame bin oko dong bedo kuo kalamo Yosua, jo kame bin ngeo gi dedede kame Rwot oudo otimo ne Isirael.

³² Cogere ka Yosepu kame jo me Isirael oudo okelo ki Misiri, bin oko yiko Sekem, i lobo kame bin Yakobo owilo kibut awobe ka Kamor, papa me Sekem, pi wel me sente siliba tol acel. Lobo nono oko doko me ikwae ka Yosepu.

³³ Eleasar wot ka Aaron oko to di oko yike Gibea, bomba kame bin tie i piny kobedo mori mori me Epuraimu, kame bin komio wode Pinekasi.