Yosua 23 - Baibuli I Leb Kumam 2013

Yamo ka Yosua me Ajikini but Jo me Isirael

¹ Di do oudo kare kalac otieko kato, di Rwot oudo otieko mino jo me Isirael anapakin, di likame jokwor gi kame oudo oluko gi bobo do lolo gi, doko di Yosua da oudo otieko ti twatwal,

² Yosua oko lwongo jo me Isirael dedede, joadongo, jotel, jongolkop, kede jodongo me tice, di en eko waco negi be, “Ango nataman do atieko ti twatwal.

³ Wun itiekunu neno gi dedede kame Rwot Rubanga wu otieko timo but atekerin nogi dedede piru. Rwot Rubanga wu en kobedo yi piru.

⁴ Ango atieko popoko ne ikekon wu lobere me atekerin kame pwodi odong, karacel kede me atekerin kame ango atieko bwono, cako ki ecilet me Yorodan i bad tetu kide tuno i nam me Mediterania i bad tetu tim.

⁵ Rwot Rubanga wu bino mino gin kidok cen kibut wu, di en eko riamo gi ki nyim wu. Wun ibinunu gamo lobo gi doko meru bala kame Rwot Rubanga wu otieko cikere kede butu.

⁶ Pi mano, poore igwokerenu di ikounu lubo kede timo gi dedede kame kowandiko i itabu me Iswil ka Musa abongo weko moro.

⁷ Manono bino mino likame inyalerenu kede atekerin nogi kame odong i diere wu, arabo yamo nying rubangan gi, amoto kwongere kede nying gi, arabo timo negi tic, amoto gungo i nyim gi pi woro gi.

⁸ Do wun poore imokunu baba i kom Rwot Rubanga wu, bala kame ibedunu timo tuno tin.

⁹ Rwot otieko riamo tenge i nyim wu atekerin adongodongo di kitek; likame tie ngatamoro kame pwodi okaruno bwono wu tuno tin.

¹⁰ Ngat acel kenekene kikom wun mio jo tutumia acel ringo tenge, pien Rwot Rubanga wu en kame yi piru, bala kame en oudo ecikere kede but wu.

¹¹ Pi mano, poore igwokerenu ikounu maro Rwot Rubanga wu.

¹² Ka ilokerenu tenge, di ikounu ribere kede atekerin kame pwodi odong i diere wu, ikounu nyomere kede gi,

¹³ miero ingeunu ateteni be Rwot Rubanga wu likame bino meede kede riamo atekerin nogi tenge ki nyimu; do gin kibino bedo bala owic kede obek me mako wu, del me daano ngei wu arabo okuti me cocobo wangu, tuno wun to tiek ki lobo aber noni kame Rwot Rubanga wu otieko mino wu.

¹⁴ “Nataman kare nango me to otieko tuno. Wun dedede ingeunu i cuny wu kede i kuo wu be Rwot Rubanga wu otieko mino wun jamini dedede abeco kame en oudo ecikere iye butu; gi dedede otieko cobere ne wu, likame tie cikere mere moro kopoto.

¹⁵ Do bala kame en emio kede cikere mege dedede kame oudo etimo but wu ocobere, kamanono da en ebino mino can dedede kame en ewaco poto i komu tuno en muducaro wu atwal atwala i lobo aber kame en emio wu noni.

¹⁶ Ka wun likame igwokunu isikan kame Rwot Rubanga wu ociko wu pi gwoko, kede ka wun ikounu timo tic ne rubangan apat di ilurunu piny i nyim gi pi woro gi, en ebino lilo ne wu di eko mino wu alola, di wun ikounu bino to ikounu tiek awakawaka i lobo aber kame en etieko mino wu.”