Yosua 22 - Baibuli I Leb Kumam 2013

Jo me Ikekon me Bad tetu Kide Odok i Lobo gi

¹ Di do Yosua oko coko jo me ikekon ka Ruben, Gad kede dul me jo me ekeko ka Manase kame oudo tie i bad tetu kide.

² En eko waco negi be, “Wun itiekunu timo gi dedede kame Musa ngatic ka Rwot oudo ociko ne wu, doko wun ikounu lubo cik na dedede.

³ Tuno tin, wun likame ikounu weko imiegu wu me Isirael akadi tien acel, pi kare noni dedede. Wun ibedunu gwokere kitek lubo cik ka Rwot Rubanga wu.

⁴ Aso, nataman Rwot Rubanga wu otieko mino imiegu wu anapakin, bala kame en bin ecikere kede. Pi mano, dokunu paco i lobo kame bin wun imaunu, lobo kame Musa ngatic ka Rwot bin omio wu i loka tetu kide me ecilet me Yorodan.

⁵ Poore igwokerenu kitek lubo cik kede iswil kame Musa ngatic ka Rwot oudo ociko ne wu: marunu Rwot Rubanga wu, timunu gikame en emito, lubunu cik mege, mokunu i kome, di ikounu timo ne tic kede cunyu dedede kede kuo wu lung.”

⁶ Di do Yosua oko lamo negi winyo di eko peruno gi, di gin kiko ot i miere gi.

⁷ Musa oudo omio dul me jo me ekeko ka Manase me lobo Basan pi bedo mergi; do dul ocelu Yosua oudo oko mino lobo i nget me jo me Isirael wad gi i bad tetu tim me Yorodan. Kakame Yosua bin oko dwoko gi kede paco, en elamo negi winyo

⁸ di ewaco be, “Dokunu i miere wu kede abar adwong, dokunu kede doke atot, siliba, saabu, buronsi, ayon, kede igoen atot twatwal. Nywakunu kede imiegu wu jamini kame iyakunu kibut jokwor.” Di do gin kiko yai dok paco.

⁹ Aso, jo me ikekon ka Ruben, Gad, kede me ka Manase kame oudo tie i bad tetu kide oko dok paco. Gin kiweko jo icegun me Isirael odong Silo, kame tie i lobo me Kanan, di gin kiko ot Gilead, i lobo gi kame oudo gin kimao oko doko mergi bala kame oudo Rwot ociko negi kede kibut Musa.

Alutari kame Kogero i nget Ecilet me Yorodan

¹⁰ Kakame jo me ikekon ka Ruben, Gad, kede dul me jo me ekeko ka Manase me bad tetu kide otuno kede Gelilot, kame oudo tie i nget ecilet me Yorodan i lobo me Kanan, gin kiko gero alutari ati kunono, di pwodi likame kingolo ecilet.

¹¹ Kakame jo icegun me Isirael oko winyo kede be gin oudo kigero alutari Gelilot i ikor me lobo me Kanan, i nget ecilet me Yorodan i bad me jo me Isirael,

¹² jo dedede me Isirael oko cokere Silo pi ot yi kede gi.

¹³ Di do jo me Isirael oko cwano Pinekasi wot ka Eleasar but jo ka Ruben kede Gad kede dul me jo me ekeko ka Manase, i lobo me Gilead.

¹⁴ Gin kicwae kede cuo tomon kame oudo koworo. Buli ekeko acelacel me ateker me Isirael kame oudo tie i bad tetu tim oko cwano buli dano kame oudo obedo ngatel me diakal kikom me jo me Isirael.

¹⁵ Gin kiko ot i lobo me Gilead, but jo ka Ruben, Gad, kede Manase me bad tetu kide, di gin kiko waco negi

¹⁶ dwan kame jo dedede me Isirael ocwao gi kede be, “Pinyo komio itimunu gikarac karom kan but Rubanga me Isirael? Gero alutari piru nyuto be wun itiekunu jemo ne Rwot! Itiekunu lokere tenge iwekunu lube!

¹⁷ Benyo, dub kame bin otimunu i Peor pwodi likame oroma wa? Yutununu alola me aumpuli kame bin Rwot oko mino jo mege. Tuno tin wan pwodi otienu neno can pi dub nono.

¹⁸ Benyo, nataman do wun itiekunu dagi lubo Rwot? Ka tin wun ijemunu ne Rwot, diki en eyaro lilo ne jo dedede me Isirael.

¹⁹ Ka wun iparunu be lobo wu omunaun likame epoore me woro Rubanga, ngolunu loka tetuca i lobo ka Rwot, kakame taberenakol mere tie iye, di ikounu gamo lobo moro kibut wan. Kenekene kur ijemunu ne Rwot arabo imiunu wada odok jojemo pi tim wu me gero alutari piru kenu, alutari kame pat kede alutari ka Rwot Rubanga wa.

²⁰ Yutununu gikame bin Rwot otimo i kare kame bin Akan wot ka Seera odagi lubo kede cik kame mako jamini kame kopoore dudubo atwal atwala; jo me Isirael dedede bin oudo alola pi tim mere nono; likame Akan kene en kame bin oto pi dub mere.”

²¹ Di do jo me ekeko ka Ruben, Gad, kede dul me ekeko ka Manase oko dwoko ne jotel me diakale kame oudo kocwao but gi be,

²² “Won Twer en Rubanga! En ebedo Rwot! Won Twer en Rubanga! En ebedo Rwot! En engeo kop komio wan otimo gi noni, doko wan omito jo me Isirael da ngei! Ka wan oudo otimo kamanono pi jemo arabo pi turo isikan wa but Rwot, kur iwekunu wa omeede bedo kuo.

²³ Ka wan odagi lubo Rwot di oko gero alutari wa amako wa me wango giayala arabo me mino giayala me alos amoto me nywak, wan okwao Rwot en kikome emi wa alola.

²⁴ Do wan otimo kamanono pien oudo otie kede lworo be i kare me anyim ikwae wu cengemogo bino waco ne idwe wa be, ‘Likame itienu kede gimoro amakere kede Rwot, Rubanga me Isirael!

²⁵ Rwot otieko keto ecilet me Yorodan obedo ikor wa kede wu, wun jo ka Ruben kede Gad. Likame itienu kede gimoro amakere kede Rwot.’ Di do ikwae wu cengemogo ko bino mino ikwae wan weko woro Rubanga.

²⁶ Kop no en komio wan ogero alutari, do likame ogere me wango giayala arabo mino giayala moro.

²⁷ Wan ogere pi bedo gianena but jo wa kede wuda, kede but lwak kame bino lubo ngei wa, be wan ateteni oworo Rwot i Eema mere kacil di okelo bute giayala awanga wa kede giamia kede giayala me nywak. Manoni wan otimo pi gengo ikwae wu i kare me anyim waco ne ikwae wan be gin likame kitie kede gimoro amakere kede Rwot.

²⁸ Wan oudo obedo tamo be, ka gikame cal kamanono oko timere ne wan arabo ne ikwae wa i kare me anyim, wan oromo waco be, ‘Nenunu alutari noni kame bin joakwari wan otimo; en ecal kede me ka Rwot. Gin bin kitime likame pi wango giayala arabo me mino giayala apat, do me bedo ijura but wan kede wun.’

²⁹ Wan likame obino jemo ne Rwot arabo weko lube i yore me gero alutari me giayala awanga, giayala me alos, arabo giamia moro. Wan likame oromo gero alutari moro ace apat kede alutari ka Rwot Rubanga wa kame cungo i nyim taberenakol mere.”

³⁰ Pinekasi ngasaseredoti kede jo tomon kame bin tie kede en, jo kame bin koworo, jotel me diakale me Isirael, owinyo kop kame jo me ikekon ka Ruben, Gad, kede Manase me bad tetu kide oko waco di gin kiko yeng kede kop gi nono.

³¹ Pinekasi, wot ka Eleasar ngasaseredoti oko waco negi be, “Tin wan otiekunu ngeno be Rwot tie kede wa, pien wun likame oudo ijemunu ne Rwot i yore me tim noni. Pi mano, wun itiekunu lako jo me Isirael ki alola ka Rwot.”

³² Di do Pinekasi kede jotel kame bin tie kede oko weko jo ka Ruben kede me ka Gad i lobo me Gilead di gin kiko dok Kanan, but jo me Isirael, di gin kiko waco negi kop kame gin kiko udo.

³³ Kop kame gin kitero ne jo me Isirael oyomo cuny gi di gin kiko pako Rubanga. Di likame bobo do kiko donyo yamo kop amako yi kede dudubo lobo kame jo ka Ruben kede me ka Gad oudo tie bedo iye.

³⁴ Jo ka Ruben kede me ka Gad oko waco be, “Alutari noni en kobedo mujura but wanunu dedede be Rwot en Rubanga.” Di gin kiko cako nyinge “Mujura”.