Yosua 21 - Baibuli I Leb Kumam 2013

Bomban me Jolebi

¹ Di do jotel me diakale me Jolebi oko bino but Eleasar ngasaseredoti, Yosua wot ka Nun kede jotel dedede me diakale me jo me ikekon me Isirael,

² di kiko waco negi i Silo i lobo me Kanan be, “Rwot bin omio cik kibut Musa be poore mi wan bomban kame obino bedo iye kede da kakame obino kwano iye doke wa.”

³ Aso, jo me Isirael oko lubo cik ka Rwot di gin kiko mino Jolebi bomban mogo kede kabedo me kwano doke gi ki adulion gin.

⁴ Alulu kame bin kocako kwanyo oko mako ikwae ka Kokat. Aso, Jolebi kame oudo obedo ikwae ka Aaron ngasaseredoti bin kopoko negi bomban tomon kiwie adek kibut jo me ekeko ka Yuda, Simeon, kede Benjamin.

⁵ Ikwae ka Kokat kame oudo odong mege di oko poko ne gida bomban tomon ki adul me jo ka Epuraimu, Dan, kede Manase kame oudo tie i bad tetu tim.

⁶ Ikwae ka Gereson bin oko poko negi bomban tomon kiwie adek kibut jo me ekeko ka Isakar, Aser, Naputali, kede kibut jo me ekeko ka Manase kame oudo tie i bad tetu kide.

⁷ Diakale me ikwae ka Merari bin oko poko negi bomban tomon kiwie are ki adul me jo me ekeko ka Ruben, Gad, kede Sebulun.

⁸ Bomban nogi kede kabedere me kwat gi bin jo me Isirael oko mino Jolebi di oudo kouco alulu, bala kame oudo Rwot ociko kibut Musa.

⁹ Kibut jo me ikekon ka Yuda kede Simeon gin bin kiko poko bomban kame komaro nying gi nogi

¹⁰ but ikwae ka Kokat ngat kobedo akwar Aaron, pien alulu me agege oudo omako gin.

¹¹ Komio gi bomba me Kiriat Araba (Araba en oudo obedo papa me Anak), manono en oudo Keburon, kame oudo tie i piny kobedo mori mori me Yuda, karacel kede kakwat kame oudo oluke.

¹² Do ebar aluko bomba kede calere kame oudo oluke oudo kotieko mino Kaleb wot ka Jepune pi bedo mere.

¹³ Medo i wi Keburon, en bomba me ringo ot gwokere, bin oko mino ikwae ka Aaron ngasaseredoti bomban gi: Libina,

¹⁴ Yatir, Esitemoa,

¹⁵ Kolon, Debir,

¹⁶ Ain, Yuta, kede Bet Semes, kede lobere gi me kwat: gin bomban kanyangon kame komio gi kibut jo me ikekon ka Yuda kede Simeon.

¹⁷ Kibut jo me ekeko ka Benjamin bin komio gi bomban ongwon gi: Gibeon, Geba,

¹⁸ Anatot, kede Alumon, kede lobere gi me kwat.

¹⁹ Bomban dedede me josaseredoti, ikwae ka Aaron oudo tie tomon kiwie adek, kede da lobere gi me kwat.

²⁰ Jo apat odong mege kobedo ikwae ka Kokat, jo me ekeko ka Lebi, bin komio bomban mogo kibut jo me ekeko ka Epuraimu.

²¹ Gin bin komio gi bomban ongwon: Sekem kede lobo mere me kwat, i piny kobedo mori mori me Epuraimu (acel kikom bomban me ringo ot gwokere), Geser,

²² Kibisaim, kede Bet Koron, kede lobere gi me kwat.

²³ Kibut jo me ekeko ka Dan, bin komio gi bomban ongwon: Eliteke, Gibeton,

²⁴ Aijalon, kede Gatirimon, kede lobere gi me kwat.

²⁵ Kibut jo me ekeko ka Manase kame bin tie i bad tetu tim, bin komio gi bomban are: Tanak kede Gatirimon, kede lobere gi me kwat.

²⁶ Diakale oudo kodong nogi me ikwae ka Kokat bin oko mino bomban tomon nogi dedede, kede lobere gi me kwat.

²⁷ Ekodet ace me Jolebi, ikwae ka Gereson, bin oko mino bomban are kibut jo me ekeko ka Manase kame bin tie i bad tetu kide. Gin en, Golan kame oudo tie Basan kede lobo mere me kwat (acel kikom bomban me ringo ot gwokere), kede Besetera kede lobo mere me kwat.

²⁸ Kibut jo me ekeko ka Isakar, bin komio gi bomban ongwon: Kision, Daberat,

²⁹ Yaramut, kede Enganim, kede lobere gi me kwat.

³⁰ Kibut jo me ekeko ka Aser, bin oko mino gi bomban ongwon: Misal, Abidon,

³¹ Kelekat, kede Rekob, kede lobere gi me kwat.

³² Kibut jo me ekeko ka Naputali, bin komio gi bomban adek: Kedes i Galilaya, kede lobo mere me kwat (acel kikom bomban me ringo ot gwokere), Kamot Dor, kede Karutan, kede lobere gi me kwat.

³³ Bomban kame bin komio but diakale ikwae ka Gereson, dedede oudo tie bomban tomon kiwie adek.

³⁴ Jolebi kodong mege, ikwae ka Merari, bin komio bomban ongwon kibut jo me ekeko ka Sebulun. Bomban nogo gin en, Yokineam, Karata,

³⁵ Dimina, kede Nakalal, kede lobere gi me kwat.

³⁶ Kibut jo me ekeko ka Ruben, bin komio gi bomban ongwon: Beser, Yakas,

³⁷ Kedemot, kede Mepat, kede lobere gi me kwat.

³⁸ Kibut jo me ekeko ka Gad da, bin komio gi bomban ongwon: Ramot i Gilead kede lobo mere me kwat (acel kikom bomban me ringo ot gwokere), Makanaim,

³⁹ Kesibon, kede Yaser, kede lobere gi me kwat.

⁴⁰ Aso, bomban kame bin komio but ikwae ka Merari, diakale me Jolebi kame oudo odong, oudo dedede tie tomon kiwie are.

⁴¹ Bomban me Jolebi i adul kame bin jo me Isirael omako oudo dedede tie ot ongwon kiwie kanyauni, karacel kede lobere gi me kwat.

⁴² Bomba acelacel oudo tie kede lobo mere koluke me kwat.

Jo me Isirael Osipakin i Lobo gi

⁴³ Aso, Rwot bin oko mino jo me Isirael lobo dedede kame en oudo ekwongere iye but joakwari gi be ebino mino gi. Kakame gin do oudo kitieko game kede eko doko mergi, gin kiko donyo bedo iye.

⁴⁴ Rwot oko mino anapakin obedo tie negi i lobo gi nono lung, bala kame en oudo ecikere kede but joakwari gi. Likame bin tie ngakwor gi moro acel kame oko yi kede gi di eko bwono gi, pien Rwot oudo otieko mino jokwor gi i cing gi.

⁴⁵ Rwot bin oko cobo cikere mege dedede kame oudo en etimo but jo me Isirael.