Yosua 2 - Baibuli I Leb Kumam 2013

Yosua Ocwao Bega Ngingico Bomba me Jeriko

¹ Yosua wot ka Nun oko cwano cuo are i mung bala ibegai yai ki Sitim di ewaco negi be, “Otunu ingingicunu lobo nono, do singo twatwal Jeriko.” Aso, gin kiko ot di kiko donyo i ot me malaya moro anyinge Rakab di kiko buto kanono.

² Abaka me Jeriko oko winyo be jo mogo me Isirael oudo obino iwor nono bala ibegai pi ngingico lobo nono.

³ En eko cwano ne Rakab kop be, “Cuo kobino buti, kame nan tie i odi, obino kan bala ibegai, pi ngingico lobo noni dedede. Nan kel gi kan!”

⁴ Do Rakab oko kano cuo are nogo di do eko waco be, “Etie kop me ateni, cuo nogo oudo obino buta, do ango gira oudo likame angeo kakame kiwok kiye.

⁵ Aso, kakame piny odoko amumusit kede, gin di kiko yai kioto di pwodi oudo likame kocego erute me bomba. Kakame kioto iye ango likame angeo. Do ka iwapunu gi awakawaka, ibinunu udo gi.”

⁶ (Rakab oudo otero jo nogo i wi ot di eko umo gi kede pulak kame oudo emo i wi ot pi tuo.)

⁷ Aso, isirikalen ka Abaka oko wapo gi lubo yongayo aoto Yorodan tuno kakame yongayo ngolo kede ecilet. Cucuto kakame jowap nogo oudo odonyo kede ooko me bomba, oko cego erute me bomba.

⁸ Di pwodi oudo ibegai nogo likame obuto, Rakab oko yito but gi i wi ot

⁹ di eko waco negi be, “Ango angeo be Rwot otieko mino wu lobo noni. Wan dedede kom wa tie miel pi wun; jo dedede kame bedo kanoni tie kede lworo atek i komu.

¹⁰ Pien wan otieko winyo kite kame Rwot omio kede pii me Nam Akwar otuo kede i nyimu, kakame iyaunu kede ki Misiri; kede kite kame inekunu kede Sikon kede Og, gin abakai me jo Amor, jo kame oudo bedo i bad tetu kide me Yorodan.

¹¹ Kakame wan owinyo kede kop nono, cuny wa oko nyote, di do likame tie ngatamoro oko dong di etie kede nwangcuny; manoni kom otimere pi wun. Rwot Rubanga wu ateteni obedo Rubanga apugo malo kede wi lobo kan.

¹² Aso, bala kame ada nan atimo ne wu kede bero, kwongerenu buta i nyim Rwot be wuda ibinunu timo ne jo me ot ka papa na bero. Mianu gianena moro kame bino mina abedo kede gen butu be,

¹³ likame ibinunu timo gimoro arac ne papa na, kede toto na; ne imiegu na kede amiegu na, kede jo dedede me ude gin. Konyunu wa kur nek wa!”

¹⁴ Cuo nogo oko waco ne Rakab be, “Ka gimoro arac otimere ne wu, okwao be Rubanga kwany kuo wada! Ka likame in iwaco ne ngatamoro gikame wan obedo timo, wan ocikere buti be kame Rwot omio wa lobo noni, wada obino timo ni bero kede cuny me genere.”

¹⁵ En eko yololo gi piny ki dirisa kede auno, pien ode oudo tie i dierediere me apama me yie kede apama me ooko kame celo bomba.

¹⁶ En ewaco negi be, “Otunu idokunu tetu piny kobedo imukuran, tetekeny jo kame tie wapo wu kur twer udo wu. Pwonunu kunono pi ceng adek, tuno di jo kame tie wapo wu otieko dwogo; di do ingei gin dwogo wun ikounu giru dok kabedo wu.”

¹⁷ Cuo nogo oko waco ne Rakab be, “Likame wan obino turo cikere kame in itieko mino wan otimo buti noni.

¹⁸ Gikame in ibino timo ine: kame wan osuro lobo noni oko donyo iye, in ibino tweno ausi akwar noni i wang dirisa kame in iyololo wan piny kiye. Doko da iko coko i odi papa ni kede toto ni, imiegu ni kede jo dedede me ot ka papa ni.

¹⁹ Ka ngatamoro kibutu oko wok ooko ki ot di eko ot i dier gudo me bomba, udo en emo to mere kene, manono likame bino mako wa; do ka wan owanakino ngatamoroni di oudo etie kedi i ot, kop me to mere mako wan.

²⁰ Do ka in ioto waco ne jo gikame wan oudo obino kan timo, wan likame obino gwoko cikere wa buti.”

²¹ Rakab oko dwoko be, “Ango ayei kop kame wun iwacunu.” En eko peruno gi kioto. Di do eko tweno ausi akwar i dirisa nono.

²² Ibegai nogo oko ot i piny me imukuran di kiko pwono iye. Jo kame oudo tie wapo gi oko more pi ceng adek, do likame kiko twero udo cuo are nogo, di do kiko dok Jeriko.

²³ Di do ibegai are nogo oko wok ki wi imukuran, kiko ngolo ecilet di kiko dok but Yosua wot ka Nun. Gin kiko waco ne Yosua gi dedede kotimere negi.

²⁴ Gin kiwaco ne Yosua be, “Ateteni Rwot otieko mino lobo nono dedede i cing wa. Jo dedede atie kuno tie kede lworo atek i kom wa.”