Yosua 11 - Baibuli I Leb Kumam 2013

Yosua Obwono Jabin kede Jo Konye

¹ Kakame Abaka Jabin me Kasor owinyo kede kite kame Isirael oudo tie bwono kede yi, en eko cwano kop lwongo Abaka Yobab me Madon, abaka me Simiron, abaka me Akisap,

² kede abakai me piny me imukuran atie i bad tetu malo, kede me Aditot me Yorodan i bad tetu piny me nam me Galilaya, kede me lobo atie i bad imukuran, kede me dog nam adwong i nget Dor.

³ Ecwao kop da lwongo jo me Kanan atie i bad tetu kide kede i bad tetu tim me ecilet me Yorodan, jo Amor, jo Kiti, jo Perisi, jo Yebu atie i piny me imukuran, karacel kede jo Kibi kame bedo i dud moru me Kerimon i lobo me Misipa.

⁴ Gin kiko ot kede isirikalen gi dedede, di kiko riribun kidoko tot bala asinge me dog nam adwong. Oudo da kitie kede asigiran kede cabalan atot.

⁵ Abakai nogi dedede oko ot kede isirikalen gi di kiko gero kimere gi i dog atapar me Merom, pi yi kede jo me Isirael.

⁶ Rwot oko waco ne Yosua be, “Kur ibed kede lworo i kom gi, pien diki tetu esawa noni udo ango atieko neko gi ne wu. Ibinunu totongo amorito me tien asigiran gi di ikounu wango cabalan gi.”

⁷ Aso Yosua kede isirikalen mege oko ngeso suro gi i dog atapar me Merom.

⁸ Rwot oko mino jo me Isirael obwono gi; jo me Isirael osuro gi di oko donyo wapo gi dok i bad tetu malo paka tuno Misirepot Maim kede Sidon, kede da dok i bad tetu kide paka tuno i aditot me Misipa. Jo me Isirael oko bedo neko gi aneka kamanono tuno tieko gi pitipit.

⁹ Yosua oko timo negi gikame Rwot oudo ociko ne; en etotongo amorito me tien asigiran gi di eko wango cabalan gi.

¹⁰ Yosua oko lokere odok cen di eko mako bomba me Kasor di eko neko abaka mere. (I kare nono Kasor oudo obedo ajakanut atek kalamo ajakanuto nogo dedede.)

¹¹ Gin kiko neko jo me kunono dedede, likame tie ngatamoro oko dong kuo, doko da kiko wango bomba nono.

¹² Yosua oko mamako bomban nogo dedede, karacel kede abakai gi da, di eko neko jo dedede bala kame Musa ngatic ka Rwot oudo ociko negi.

¹³ Do bed bala kamanono da, Yosua likame oko wango bomban kame oudo kogero i wi atukito me amejeko me kare kasek, kwanyo kenekene Kasor en kame Yosua oko wango.

¹⁴ Jo me Isirael oko yako jamini abeco me bomban nogi kede leini di kiko tero, do kineko jo dedede, likame tie ngatamoro kame kiweko kuo.

¹⁵ Rwot oudo omio cik mege but ngatic mere Musa, di Musa oko mino gi but Yosua, di Yosua oko lubo gi. Yosua otimo gi dedede kame Rwot oudo ociko ne Musa.

Adul kame Yosua Omao

¹⁶ Yosua omao lobo nono dedede: piny me imukuran kede lobo atie piny i dud imukuran dedede atie i bad tetu malo kede i bad tetu piny, adul dedede me Gosen, kede lobo kotuo atie i bad tetu piny mere, karacel kiton aditot me Yorodan da.

^17-18 Adul nono riere yai ki moru me Kalak atie i bad tetu piny i nget Edom, di eko ot ape ape paka Balagad i bad tetu malo, i aditot me Lebanon i bad tetu piny me moru me Kerimon. Yosua obedo yi kede abakai me adul noni pi kare alac, do en eko mako gin dedede di eko neko gi.

¹⁹ Bomba acel kenekene kotimo isikan me anapakin kede jo me Isirael en oudo bomba me Gibeon, kakame jo Kibi mogo bedo iye. Bomban ace apat dedede jo me Isirael oyi kede gi di jo me Isirael oko bwono gi.

²⁰ Manono oudo obedo iik ka Rwot pi mino cuny gi bedo tek yi kede jo me Isirael, tetekeny dudubo gi atwal atwala di oko neko jo gi pitipit, bala kame Rwot oudo ociko ne Musa.

²¹ I kare nono, Yosua oko ot di eko muducaro itucio me jo kame kolwongo be Anakim, kame oudo bedo i piny me imukuran; manono ribo Keburon, Debir, Anab, kede kabedo dedede me imukuran atie Yuda kede Isirael. Yosua omuducaro gi atwal atwala karacel kede bomban gi.

²² Likame tie ngatamoro kikom jo Anakim moro oko dong i lobo me Isirael; do konye mogo anonok oko dong Gasa, Gat kede Asidod.

²³ Yosua oko mano lobo nono dedede, bala kame Rwot oudo ociko ne Musa. En eko mino lobo nono but jo me Isirael pi bedo mergi amako gi, di lubere kede kite kame kopoko ne kede jo me buli ekeko me anywali me Isirael. Jo di do oko wei kede kop me yi.