Yosua 10 - Baibuli I Leb Kumam 2013

Kobwono Jo Amor

¹ Abaka Adonisedek me Yerusalem oko winyo be Yosua oudo omako bomba me Ai di eko dudubo en atwal atwala, di eko neko kiton abaka mere da, bala kame oudo etimo i bomba me Jeriko kede ne abaka mere. Doko da ewinyo be jo me Gibeon oudo otimo isikan me anapakin kede jo me Isirael, omio oudo kitie bedo karacel kede gi.

² Jo me Yerusalem oko bedo kede lworo adwong, pien Gibeon oudo obedo bomba adwong rom aroma kede bomban apat kame tie kede abakai; en oudo edwong kalamo bomba me Ai, doko jo mege oudo obedo jo yi atek.

³ Aso, Abaka Adonisedek me Yerusalem oko cwano kop but Abaka Kokam me Keburon, but Abaka Piram me Yaramut, but Abaka Yapia me Lakis kede but abaka Debir me Egilon, di ewaco negi be,

⁴ “Bianu ikonyanu di okounu suro Gibeon, piento en etieko timo isikan me anapakin kede Yosua kede jo me Isirael.”

⁵ Di abakai kany me jo Amor nogo, gin en abaka me Yerusalem, me Keburon, me Yaramut, me Lakis kede me Egilon, oko ribo isirikalen gi karacel di kiko luko Gibeon di kiko sure.

⁶ Jo me Gibeon oko cwano ne Yosua kop Giligal kakame oudo kimere me jo me Isirael tie iye, di kiwaco ne be, “Kur ijal wan jotic ni; suny bino ikony wa; pien abakai dedede me jo Amor kame bedo i piny me imukuran otieko cokere obino pi suro wa!”

⁷ Aso, Yosua oko yai ki Giligal kede jo yi dedede, ribo kiton isirikalen atek me aura.

⁸ Rwot oko waco ne Yosua be, “Kur ilworunu gi, ateteni ango abino mino gi i cingu; likame tie ngatamoro akadi acel kibut gi kame bino twero yi kede wu.”

⁹ Yosua oko ot kede isirikalen mege iwor kiakia yai ki Giligal di kiko tuno i kom jo Amor nogo, di kiko ngeso suro gi.

¹⁰ Rwot oko mino jo Amor nogo obedo kede lworo atek i kom jo me Isirael. Jo me Isirael oko neko gi i Gibeon, di kiko donyo riamere kede gi lubo yongayo ayito malo beo dierediere me mori kame tie Bet Koron, di kiko bedo neko gi aneka i yongayo kamanono tuno Aseka kede Makeda.

¹¹ Kakame oudo kitie ringo kede tenge kibut jo me Isirael, esawa kame oudo do kitie ringo lor kede piny me mori atie Bet Koron, Rwot oko mino akako adongodongo ocwei i kom gi ape ape paka tuno Aseka. Jo kame akako oko neko oko bedo tot kalamo jo kame jo me Isirael oneko.

¹² I ceng kame Rwot omio kede jo Amor i cing jo me Isirael, Yosua oko yamo kede Rwot. En eyamo di jo dedede me Isirael winyo be, “Ceng cung tir i wi Gibeon duwe, jiki i wi Aditot me Aijalon.”

¹³ Ceng oko cungo tir, di likame duwe da oko nyiko paka tuno di jo me Isirael oudo otieko bwono jokwor gi. Kowandiko kop noni i itabu ka Yasar. Ceng oudo oko cungo tir malo i edou pi ceng acel alutu di likame edonyo.

¹⁴ Cako sek di pwodi likame manono otimere, doko da cako i kare nono tuno tin, likame pwodi tie ceng moro kobedo cal kede manono, ceng kame Rubanga olubo kede gikame dano ociko ne. Rwot okonyo jo me Isirael yi.

¹⁵ Ingei manoni, Yosua kede isirikalen mege oko dok i kimere gi Giligal.

Yosua Omako Abakai Kany me Jo Amor

¹⁶ Kakame manono oudo tie timere kede, abakai kany nogo me jo Amor oudo oko ringo di kiko ot pwono i abo kame tie Makeda.

¹⁷ Di oko waco ne Yosua be koudo abakai kany nogo di kitie pwono i abo me Makeda.

¹⁸ Yosua oko waco be, “Lorunu kide adongodongo igasakinunu i dog abo nono di ikounu keto jo mogo daro kanono,

¹⁹ do wun kur ibedunu kunono. Wun meedenu ameda wapo jokwor di isurunu gi ki cen ngei gi; kur iyeunu negi donyo i bomban gi, pien Rwot Rubanga wu otieko mino gi i cingu.”

²⁰ Yosua kede jo mege me Isirael oko neko gi nek arac, do mogo kikom gi oko bwot ododonyo i bomban gi kame koluko kede apama atek.

²¹ Jo ka Yosua dedede oko dok bute i kimere gi atie Makeda abongo awanon moro. Likame tie ngatamoro i lobo nono oko jalere ngamo doge waco kop moro arac i kom jo me Isirael.

²² Yosua oko waco be, “Yabunu dog abo di ikounu woto abakai kany nogo ikelunu gi buta kan.”

²³ Gin kiko timo kamanono; kiwoto abakai kany nogo ki abo, gin en abaka me Yerusalem, abaka me Keburon, abaka me Yaramut, abaka me Lakis kede abaka me Egilon.

²⁴ Kakame kotuno kede gi but Yosua, Yosua oko lwongo jo dedede me Isirael bute di eko waco ne jodongo me isirikalen koudo ooto kede en, pi bino di kiko nyono ngut abakai nogo. Gin iko timo kamanono.

²⁵ Yosua oko waco be, “Kur ibedunu kede lworo, doko da kur cunyu dubere. Bedunu jo atek atie kede nwangcuny, pie manoni en gikame Rwot bino timo ne jokwor wu dedede.”

²⁶ Yosua oko neko abakai kany nogo di eko liero kom gi i kor yen kany, kakame kiko bedo iye tuno otieno.

²⁷ Otieno di ceng oudo tie donyo, Yosua oko mino cik di oko kwanyo kom gi tenge ki kor yen di oko ot uco gi i abo kame oudo gin kipwono iye. Gin kiko gasakino kide adongodongo i dog abo nono, kame tie tuno tin.

Yosua Omao Adulion Ace me Jo Amor

²⁸ Yosua oko suro tuno mako bomba me Makeda kede abaka mere cenge nono. En eko neko jo dedede me bomba nono, likame eweko ngatamoro odong kuo. En eko timo ne abaka me Makeda gikame etimo ne abaka me Jeriko.

²⁹ Ingei manono Yosua kede jo me Isirael dedede oko kato Libina di kiko sure.

³⁰ Rwot oko mino bomba nono da kede abaka mere i cing jo me Isirael. Gin kiko neko jo dedede koudo tie iye, likame kiweko ngatamoro odong kuo. Gin kiko timo ne abaka me bomba nono da gikame kitimo ne abaka me Jeriko.

³¹ Alubo mere Yosua kede isirikalen oko yai ki Libina di kiko kato Lakis, kiko luko bomba nono di kiko sure.

³² Rwot oko mino Lakis da i cing jo me Isirael di kiko make i ceng me are me yi. Gin kiko neko jo dedede atie iye, bala kame oudo kitimo i bomba me Libina.

³³ Abaka Koram me Geser oko ot pi konyo bomba me Lakis, do Yosua oko bwone karacel kede isirikalen mege di likame eko weko ngatamoro kibut gi di kuo.

³⁴ Ingei manono Yosua kede isirikalen mege oko yai ki Lakis di kiko ot Egilon. Gin kiko lukaro bomba nono di kiko sure.

³⁵ Gin kiko mako bomba nono i ceng nono, di kiko neko jo dedede atie iye, bala kame oudo kitimo i bomba me Lakis.

³⁶ Di Yosua oko ot kede isirikalen mege yai ki Egilon ot Keburon. Gin kiko sure,

³⁷ di kiko make. Gin kiko neko abaka mere kede jo dedede koudo tie iye, ribo kiton jo me bomban atino kame oudo kio kede, bala kame oudo kitimo Egilon. Yosua omio kodudubo bomba nono atwal atwala. Likame kiweko ngatamoro odong kuo.

³⁸ Yosua kede isirikalen mege oko lokere kioto i bomba me Debir di kiko sure,

³⁹ en eko make karacel kede abaka mere kede bomban ace kame kio kede, di gin kiko neko jo dedede kame oudo tie kuno, likame tie ngatamoro kame kiko weko di kuo. Yosua oko timo ne Debir gikame etimo ne Keburon kede ne Libina kede abaka mere.

⁴⁰ Yosua oko mano lobo nono dedede; gin kibwono abakai me piny me imukuran, kede me lobo me bad imukuran atie i bad tetu kide, kede me lobo me bad imukuran atie i bad tetu tim, kede me lobo kotuo atie i bad tetu piny. Likame tie ngatamoro kame gin kiko weko di kuo, gin kineko jo dedede. Manoni en gikame Rwot Rubanga me Isirael oudo ociko negi.

⁴¹ Yosua oko bedo yi di ebwono jokwor cako ki Kades Barenea tuno Gasa, ribo kiton adul me Gosen tuno Gibeon i bad tetu malo.

⁴² Yosua oko bwono abakai nogi kede mano lobere gi i wang yi acel nono, pien Rwot Rubanga me Isirael oudo tie yi pir jo me Isirael.

⁴³ Ingei manoni Yosua kede isirikalen mege oko dok i kimere gi Giligal.