Yosua 1 - Baibuli I Leb Kumam 2013

Rubanga Ociko ne Yosua Mano Kanan

¹ Ingei to ka Musa ngatic ka Rwot, bin Rwot oko yamo kede ngakony Musa, en Yosua wot ka Nun.

² Rwot owaco ne be, “Ngatic na Musa otieko to, nan iikere, in karacel kede jo dedede me Isirael, pi ngolo ecilet me Yorodan donyo i lobo kame ango atie mino wu.

³ Ango atieko mino wu kabedo dedede kame tienu bino nyono, bala kame ango acikere kede but Musa.

⁴ Ango abino mino wu lobo acakere ki wi tim atie i bad tetu piny, tuno i mori me Lebanon atie i bad tetu malo; doko da ebino cakere ki ecilet adwong me Eupurate atie i bad tetu kide, beo i lobo me jo Kiti, tuno i nam adwong me Mediterania kame tie i bad tetu tim.

⁵ Yosua, likame tie dano moro kame bino sobolo bwoni i kare me kuo ni lung. Ango abino bedo tie kedi bala kame oudo abedo tie kede Musa; ango abino bedo tie kedi, likame abino jali.

⁶ Bed ngat atek di itie kede nwangcuny, pien in ibino telo jo nogi ot mano di eko doko mergi lobo kame bin ango acikere but joakwari gi be abino mino gi.

⁷ Kenekene bed dano atek di itie kede nwangcuny adwong, di igwokere lubo iswilia dedede kame ngatic na Musa omio wu. Kur iparao tenge kiye, di gi dedede ko bino cobere ni kiber i kabedo dedede kame in ioto iye.

⁸ Miero inen be isomo ne jo itabu me Iswil i kare dedede kame gin kitie wora kede; bed tamo kope mege iceng kede iwor, tetekeny ikaruno bedo di igwokere pi lubo gi dedede kame kowandiko iye. Manono bino mino ibedo kede mulem, doko gi dedede ko bino cobere ni kiber.

⁹ Nan ango aciki be, bed dano atek di itie kede nwangcuny; kur ibed kede lworo amoto potocuny, pien ango Rwot Rubanga wu atie kedi i kabedo dedede kame ioto iye.”

Yosua Omio Jo Cik me Mano Kanan

¹⁰ Yosua oko mino jotel cik pi

¹¹ ririmo kimere dedede di kiwaco ne jo be, “Ingei ceng adek ibinunu ngolo ecilet me Yorodan pi donyo i lobo kame Rwot Rubanga wu tie mino wu, di ikounu game edoko meru; pi manono, iikunu cam cuto me sapali nono.”

¹² Yosua oko waco ne jo me ekeko ka Ruben, jo me ekeko ka Gad, kede dul me jo me ekeko ka Manase be,

¹³ “Yutununu kop kame Musa ngatic ka Rwot ociko wu iye di ewaco be, ‘Rwot Rubanga wu bino mino wu lobo noni pi bedo kakame ibinunu udo kiye wei.’

¹⁴ Mon wu, idwe wu, leini wu bino dong kanoni, en lobo kame Musa omio wu, do isirikalen wu dedede bino ngolo ecilet me Yorodan loka tetuca di kimako jamini me yi. Gin kibino telo ne imiegu gi yongayo di kiko bino konyo gi yi

¹⁵ tuno gin mano lobo kame tie i bad tetu tim me ecilet me Yorodan, en lobo kame Rwot Rubanga wu tie mino gi, di gida kiko bino udo wei bala wun. Di do wun ikounu bino dwogo bedo kan i lobo wu amako wu, i bad tetu kide me ecilet me Yorodan, en lobo kame Musa ngatic ka Rwot omio wu.”

¹⁶ Gin kiko dwoko ne Yosua be, “Wan obino timo gi dedede kame Rwot owaco ne wa, doko da obino ot karamoroni kenekene kame icwao wa iye.

¹⁷ Wan obino lubo kop nin bala kame oudo obedo lubo kede kop ka Musa. Kenekene wan okwao be, koto Rwot Rubanga ni obedo tie kedi bala kame oudo ebedo tie kede Musa!

¹⁸ Ngatamoroni kame bino dagi lubo gikame in iciko, amoto lubo kop kame in iwaco kobino neke. Kenekene in bed dano atek di itie kede nwangcuny.”