Yona 4 - Baibuli I Leb Kumam 2013

Gero ka Yona kede Cuny me Kisa ka Rubanga

¹ Kite kame Rubanga oloko kede tam mere oko wango cuny Yona twatwal, di eko doko ger.

² En eko lego but Rwot di ewaco be, “Okwe Rwot, mam oudo awaco ni manoni di oudo pwodi atie i piny wa? Manoni en komio oudo ango aringo Tarusi i agege. Pien ango angeo be in ibedo Rubanga angakisa kede atimo jo mwol; likame isunyo doko ger, ipong kede amara kalikame lokere, doko da nakanaka in itieko iikere pi gonyo cunyi di likame iko mino alola.

³ Nan do, Okwe Rwot, kwany kuo na, pien eber nango to akaka bedo kuo.”

⁴ Rwot oko dwoko be, “Benyo, epoore pi in doko ger?”

⁵ Yona oko ot tetu kide di eko bedo piny. En eko tagalo goga moro di eko donyo bedo i tipo mere di edaro neno gikame oudo oyaro timere Ninebe.

⁶ Rubanga oko mino yat odongo pi mino Yona tipo me kweno lieto me kome. Cuny Yona oko bedo yom twatwal pi yat nono.

⁷ Do ceng alubo obai di piny tie ru, Rwot oko mino kudiling opiro yat nono di eko tuo.

⁸ Kakame ceng owok kede, Rubanga oko mino yamo abuko di eliet owok ki tetu kide, di ceng oko rieny kitek i wi Yona paka en wile. Manono oko mino Yona oparo to. En ewaco be, “Eber nango to akaka bedo kuo.”

⁹ Do Rubanga oko penyo Yona be, “Benyo, epoore ne in doko ger pi kop amako yat no?” Yona oko dwoko be, “Eebo epoore, akadi doko ger paka gero neka da!”

¹⁰ Rwot oko waco ne be, “In itie keto cunyi i kom yat kalikame icane iye, doko kalikame in en ipito da; en edongo iwor acel di eko to da iwor acel.

¹¹ Benyo, mam ango do kur atam pi Ninebe, twon bomba adwong twatwal, kame tie iye idwe akalamo tutumia tol acel kede ot are kalikame ngeo gimoro, kede leini atot da?”