Yona 3 - Baibuli I Leb Kumam 2013

Yona Oyei Winyo Kop ka Rwot

¹ Rwot bobo oko medo yamo kede Yona.

² En ewaco be, “Yai ioti i bomba adwong me Ninebe iko tatamo iye kop kame ango atieko waco ni.”

³ Aso Yona oko yai eoto Ninebe di lubere kede kop kame Rwot owaco ne. Ninebe oudo obedo bomba alac twatwal, manono omio rimaro en oudo tero ceng adek.

⁴ Yona oko cako rimaro bomba; ingei ot pi ceng acel, en eko cako redo di ewaco be, “Odong ceng ot ongwon di oko bino dudubo Ninebe.”

⁵ Jo me Ninebe oko yei Rubanga; kiko moko be gin dedede kipoore kanyo kec, di do gin dedede, joadongo kede joatino, kiko ngapo ipukoi pi nyuto be kiswilaro.

⁶ Kakame abaka me Ninebe owinyo kede kop nono, en eko yai ki kom mere me ajakanut, eko gonyo ekanso mere di eko ngapo epuko, eko ot bedo i buru.

⁷ En eko mino kosarakino kop i Ninebe be, “Abaka kede jodongo mege me awora mio cik be: camo gimoro amoto mato gimoro likame tie. Kop noni mako jo dedede, leini dedede, dok kede romini dedede.

⁸ Jo dedede poore ngapo ipukoi, doko kopoore rwano ne leini dedede da ipukoi. Ngat acelacel poore bedo kede koko adwong but Rubanga. Jo dedede poore weko iponeso areco kede tim gi me gero.

⁹ Ngai ngeo? Cengemogo Rubanga twero dwodwoko cunye di eko loko tam mere; cengemogo eromo weko gero kame etie kede di okounu bino bwot.”

¹⁰ Kakame Rubanga oneno kede gikame kitimo, kite kame kilokere kede ki yote gi areco, en eko loko tam mere i kom can kame en oudo ewaco be bino poto i kom gi; likame eko timo gimoro.