Yokana 4 - Baibuli I Leb Kumam 2013

Yesu kede Dako me Samaria

¹ Kakame Yesu ongeo kede be Iparisayon oudo owinyo be en etie batiso kede loko jo doko josiao mege lono Yokana

² (bed bala Yesu kikome likame obatiso ngatamoro, kwanyo josiao mege en kame oudo batiso jo),

³ en eko yai ki Yudea di eko dok Galilaya.

⁴ Oudo miero ebei ki Samaria.

⁵ En eko tuno i bomba me Samaria kame kolwongo be Saikar, kame iyapiyapi kede poto kame bin Yakobo omio wode Yosepu.

⁶ Atan ka Yakobo oudo tie kunono. Aso, kite kame Yesu oudo ool kede ot, omio en eko bedo piny i nget atan nono. Oudo esawa do oyapuno romo kanyape me i ceng.

⁷ Dako moro me Samaria oko bino pi twomo pii. Yesu oko waco ne be, “Mia pii amati.”

⁸ Josiao mege oudo ooto wilo cam i bomba.

⁹ Dako Ngasamaria nono oko penye be, “Twerere benyo in Ngayudaya penyo pii me amata kibut ango dako me Samaria?” Pien bin Iyudayan likame nywako kede Josamaria.

¹⁰ Yesu oko dwoko ne be, “Koto oudo ingeo giamia ka Rubanga kede ngat kame tie waco ni be, ‘Mia pi amati,’ oudo koto ipenye di en eko mini pii me kuo.”

¹¹ Dako nono oko dwoko ne Yesu be, “Adwong, in ili kede gi me twomo pii, doko atan noni tut, in ibino udo pii me kuo nono ki tuai?

¹² Iparo be in idwong kalamo kwaru wan Yakobo, kame bin omio wan atan noni, doko di eda bin emato pii mere karacel kede awobe mege, kiton doke mege da?”

¹³ Yesu oko waco ne be, “Ngat acelacel kame mato pii ni, orio bobo pwodi bino neke;

¹⁴ do ngat kame mato pii kame ango abino mine, likame orio bino neke; pii kame ango abino mine bino doko ne atan me pii kame mol tuno i kuo kame bedo nakanaka.”

¹⁵ Dako nono oko kwano Yesu be, “Adwong, mia pii nono wek kur orio neka bobo, di do ako weko bino kan twomo pii.”

¹⁶ Yesu oko dwoko ne be, “Ot ilwong cwari, ibinunu kede kan.”

¹⁷ Dako nono oko dwoko ne be, “Ango ali kede cwara.” Yesu oko waco ne be, “Idwoko kakare be ili kede cwari;

¹⁸ pien in itieko bedo kede cuo kany, mano kame nan itie bedo kede no likame en cwari, iwaco kop me ateni.”

¹⁹ Dako nono oko waco ne be, “Adwong, atieko neno be in enabi.

²⁰ Joakwari wan bin woro Rubanga ki wi moru noni, do wun iwacunu be Yerusalem en kakame jo poore woro kiye Rubanga.”

²¹ Yesu oko waco ne be, “Dako ni, yei gikame ango atie waco ni, kare tie bino kalikame ibinunu woro kede Rubanga ki wi moru noni akadi ki Yerusalem da.

²² Wun iworunu ngat kalikame ingeunu; do wan oworo ngat kame ongeo, pien alako owok kibut Iyudayan.

²³ Do esawa tie bino, doko nataman en inononi da, kame jo kame woro Rubanga i ateni bino woro Papa i twer me Tipo Kacil kede ateni. Pien epone me jo nogi en kame Papa mo pi mine wor.

²⁴ Rubanga en Tipo, doko jo kame wore miero wore i twer me Tipo kede ateni.”

²⁵ Dako nono oko dwoko ne be, “Ango angeo be Mesia tie bino” (en ngat kame kolwongo be Kirisito). “Ka en etuno, ebino nyuto ne wa gi dedede.”

²⁶ Yesu oko waco ne be, “Ango inononi kame atie yamo kedi.”

²⁷ Esawa nono josiao ka Yesu oko tuno. Gin kiko uro pien Yesu oudo tie yamo kede dako, do likame tie da ngatamoro kame oko penyo dako nono be, “Imito nyo?” Arabo kame oko penyo Yesu be, “Pinyo komio itie yamo kede dako no?”

²⁸ Di do dako nono oko weko agulu mere me pii, en eko ot i bomba, di eko waco ne jo be,

²⁹ “Bianu inenunu icuo kame otuco na gi dedede kame ango atimo cako. Benyo, iparunu be ekaruno bedo Kirisito?”

³⁰ Gin kiko yai ki bomba di kiko bino but Yesu.

³¹ Iesawa nono da, josiao oudo tie ngangao Yesu di kiwaco ne be, “Apwony, cami.”

³² Do Yesu oko dwoko ne gi be, “Ango atie kede cam na me acama, kame wun likame ingeunu.”

³³ Josiao oko donyo penyere ken gi ken gi be, “Amoto ngatamoro okelo ne cam?”

³⁴ Yesu oko waco ne gi be, “Cam nango en timo gikame ngat kame oora mito, kede pi cobo tic mere kakare.

³⁵ Mam wun itienu kede kop kame waco be, ‘Odong pwodi dwete ongwon tuno i kac?’ Awaco ne wu be, tingunu wangu malo ikounu neno poti, cam otieko cek mito do kac.

³⁶ Ngat kame kao udo egelit, doko ecoko anyakini pi kuo kame bedo nakanaka, tetekeny ngacuc kede ngakac bed kede kilel karacel.

³⁷ Kop kame waco be, ‘Ngat acel cuo di ngat ace ko kac,’ tie kop me ateni.

³⁸ Ango acwao wu ot timo tic me kac me gi kalikame wun icanenu iye; jo apat ocane iye, do wun ikounu udo gikaber ki kwok gin.”

³⁹ Jo me Samaria atot kame oudo tie i bomba nono oko yei Yesu pi ijura kame dako nono omio i kome be, “Etuco na gi dedede kame ango oudo atimo cako.”

⁴⁰ Kakame Josamaria obino kede, kiko kwano Yesu be bed kede gi; di Yesu oko bedo kuno pi ceng are.

⁴¹ Jo ace atot oko yei Yesu pi kope kame epwonyo.

⁴² Gin kiko waco ne dako nono be, “Likame wan oyei pi yamo nin, do pien wan ikom wa otieko winyo, doko ongeo be ateteni man en Ngalak me piny.”

Yesu Ocango Wot ka Ngadwong me Tic

⁴³ Di ceng are okato, Yesu oko yai di eko ot Galilaya.

⁴⁴ Pien Yesu kikome oudo owaco be, “Likame koworo enabi i piny me tur gi.”

⁴⁵ Pi mano, kakame Yesu obino kede Galilaya, Jogalilaya oko game, pien gin kineno gi dedede kame oudo Yesu otimo ki Yerusalem i kare me ebaga, pien gida oudo kioto i ebaga nono.

⁴⁶ Aso, Yesu oko bobo dwogo Kana i Galilaya, kakame oudo eloko kiye pii oko doko bwini. Oudo tie ngatel moro kame oudo wode tuwo i Kaperanaum.

⁴⁷ Kakame ewinyo kede be Yesu oudo obino Galilaya di ewok ki Yudea, en eko ot kwano Yesu pi ot cango wode, piento en oudo iyapiyapi to.

⁴⁸ Pi mano, Yesu oko waco ne icuo nono be, “In likame ibino yei, tuno di ineno gianena kede gi me isuur.”

⁴⁹ Ngatel oko waco ne Yesu be, “Adwong, bia ooti di pwodi atin na likame oto.”

⁵⁰ Yesu oko waco ne be, “In oti, wodi bino kuo.” Icuo nono oko yei kop kame Yesu owaco ne, en eko ot.

⁵¹ Kakame oudo etie lor kede i aserengete, jotic mege oko riamo kede en di kiko waco ne be wode oudo kuo;

⁵² en eko penyo gi esawa kame kome ogeo doko ber kede. Gin kiko dwoko ne be, “Nyoro en kame musuja oko weke kede iesawa kanyaare.”

⁵³ Kikano papa me awobi nono oko niang be, manono en oudo esawa kame Yesu owaco ne kede be, “Wodi bino kuo.” Di do en eko yei karacel kede jo me ode dedede.

⁵⁴ Man en oudo gianena me are kame Yesu otimo kakame en ebino kede Galilaya di ewok ki Yudea.