Yokana 19 - Baibuli I Leb Kumam 2013

¹ Di do Pilato oko tero Yesu di eko mino kodae.

² Isirikalen oko cweno okuto aluka kiko keto i wi Yesu, di kiko rwako ne ekanso akwakwar.

³ Kiko donyo bino bute di kiwaco ne be, “Yoga, Abaka me Iyudayan,” di kibape.

⁴ Pilato bobo oko dok ooko, di eko waco ne gi be, “Nenunu, ango atie kele ooko butu, wek ingeunu be ango likame audo raco moro i kome.”

⁵ Yesu oko wok ooko, di engapo okuto aluka nono i wie kede di engapo ekanso akwakwar. Pilato oko waco ne gi be, “Nenunu, icuo nono ine.”

⁶ Kakame jodongo me josaseredoti kede isirikalen onene kede, gin kiko lelemo be, “Gure i kom musalaba, gure i kom musalaba!” Pilato oko waco ne gi be, “Terenu igurenu wun kikomu, pien ango gira likame audo raco moro i kome.”

⁷ Iyudayan oko dwoko ne be, “Wan otie kede iswil wa, iswil nono yei be neke, pien emire be en Wot ka Rubanga.”

⁸ Kakame Pilato owinyo kede kope go, lworo oko medo make.

⁹ En eko bobo donyo i ot mere me ngapug, di eko penyo Yesu be, “In iwok ki tuai?” Do Yesu likame oko dwoko ne kop moro.

¹⁰ Omio Pilato oko penye be, “Idagi yamo keda? Benyo, likame ingeo be ango atie kede akarunikin me gonyi kede me guri i kom musalaba da?”

¹¹ Yesu oko dwoko ne be, “Oudo likame iromo bedo tie kede akarunikin i koma, ka koto di oudo likame komii ki malo; pi mano, ngat omia i cingi en kame tie kede dub kame kalamo.”

¹² Man oko mino Pilato omoo epone me gonyo Yesu, do Iyudayan oko lelemo be, “Ka in igonyo icuo ni, udo likame in ngawot Kaisari; pien ngat acelacel kame waco be en ebedo abaka udo piemo kede Kaisari.”

¹³ Kakame Pilato owinyo kede kope go, en eko kelo Yesu ooko, di eko bedo i kom mere me ngolo kop, i kabedo kame kolwongo be “Kide kame Konapo.” (I leb Eburania nying nono en Gabata.)

¹⁴ Ceng nono oudo obedo ceng me iikere me camo Ebaga me Kalamo; esawa oudo romo bala kanyape me iceng. En eko waco ne Iyudayan be, “Nenunu abaka wu ine!”

¹⁵ Do gin kiko lelemo be, “Rweny kede, rweny kede, gure i kom musalaba!” Pilato oko penyo gi be, “Agur abaka wu i kom musalaba?” Jodongo me josaseredoti oko dwoko be, “Wan oli kede abaka, kwanyo kenekene Kaisari.”

¹⁶ Pilato oko mino gi Yesu i cing gi pi ot gure. Di do gin kiko tero Yesu.

Koguro Yesu i kom Musalaba

¹⁷ En eko donyo ooko di eyeo musalaba mere, di eko ot kakame kolwongo be Kabedo me Cogowic, kame kolwongo kede leb Eburania be Gologota.

¹⁸ Gin kiko gure kuno i kom musalaba karacel kede jo are apat; ngat acel tetucel kede ocelu da tetucel, di Yesu oko bedo i diere gi.

¹⁹ Di Pilato oko wandiko kop di eko keto i wi musalaba kame somere be, “Yesu me Nasaret, Abaka me Iyudayan.”

²⁰ Iyudayan atot oko somo kop noni, pien kakame koguro iye Yesu oudo tie i nget bomba; doko oudo kowandiko kop noni i leb Eburania, Latin kede Gurik.

²¹ Jodongo me josaseredoti, jo kame oudo obedo Iyudayan, oko waco ne Pilato be, “Kur iwandiko be ‘Abaka me Iyudayan’ do wandiko be, ‘Icuo ni owaco be, ango en Abaka me Iyudayan.’ ”

²² Pilato oko dwoko be, “Gikame ango awandiko, atieko wandiko.”

²³ Kakame isirikalen otieko guro kede Yesu i kom musalaba, kiko tero igoen mege di kiko popoko tien ongwon, dul acelacel pi sirikale acel. Kiko tero kiton ekanso mere da. Do ekanso mere oudo likame kororopo, oudo en etie acel abor kame kokedo ausin mege cako ki malo tuno piny.

²⁴ Omio kiko waco ken gi ken gi be, “Kur onyinyilunu en, do oucunu alulu pi neno ngat kame winyo bino mako di en eko tero.” Man otimere pi mino iwandik kacil cobere kakare be, “Kipopoko giangapa na, di kiko uco alulu pi ekanso na.”

²⁵ Man en gikame isirikalen otimo. Do toto me Yesu, kede amin me toto mere, kede Maria dako ka Kulopas kede Maria Magadalina, oudo tie cungo i nget musalaba mere.

²⁶ Kakame Yesu oneno kede toto mere karacel kede ngasiao kame bin en emaro nono di kitie cungo i ngete, en eko waco ne toto mere be, “Neni, wodi ino!”

²⁷ Di en eko waco ne ngasiao nono da be, “Neni, toto ni ino.” Cako ceng no ngasiao nono oko tero toto me Yesu ture.

Yesu Oto

²⁸ Ingei mano, Yesu oko waco (pi cobo kakare iwandik kacil) be, “Orio oneka,” pien oudo engeo be gi dedede do otiek.

²⁹ Jagi oudo tie kuno kame oudo bwini awac tie iye pong. Gin kiko keto ecango kame korwako i bwini awac i wi tir, di kiko cwano ne i doge.

³⁰ Kakame Yesu otieko jwijwio kede bwini awac nono, en eko waco be, “Otiek do.” Di do eko luro wie, eko to.

Kocobo Nget Yesu

³¹ Kite kame ceng no oudo obedo kede ceng me iikere, Iyudayan oko kwano Pilato be tuturo tien jo kame oudo koguro nogo, di oko tero gi tenge pi gengo kom gi kur dong i kom musalaba i Ceng Sabato, pien Ceng Sabato nono oudo obedo ceng adwong.

³² Isirikalen oko bino di kiko tuturo tien dano me agege kede me dano ocelu, gin jo kame oudo koguro kede Yesu i kom musalaba.

³³ Do kakame kituno kede but Yesu, kiko neno be oudo etieko to, gin likame kiko turo tiene.

³⁴ Do sirikale acel oko cobo ngete kede tong; cucuto di remo kede pii oko wok kiye.

³⁵ (Ngat koneno gi kotimere en komio ijura, doko ijura mere tie me ateni, doko eda engeo be ewaco kop me ateni, me wek wuda iyeunu.)

³⁶ Pien gigi otimere tetekeny iwandik kacil cobere kakare, kame waco be, “Likame kobino turo cogo mere moro.”

³⁷ Bobo iwandik ace waco be, “Gin kibino ngino ngat kame kicobo.”

Koyiko kom Yesu i Ates

³⁸ Ingei mano, Yosepu me Arimatea, kame oudo obedo ngalub Yesu, oko penyo Pilato i mung pi lworo Iyudayan, be mie eter kom Yesu. Pilato oko mine akarunikin; di do en eko bino di eko kwanyo kom Yesu.

³⁹ Nikodemu da, dano kame oudo ber bin ogeo bino but Yesu iwor, oko bino di ekelo yat kame ngwe kur me gwoko kom ngat oto, yat no en maya kame konyalo kede aloe, kame romo bala kilo ot adek.

⁴⁰ Gin kiko kwanyo kom Yesu di kiko bone kede esuka kede yat angwe kur nono, bala kite kame itok me Iyudayan oudo tie kede.

⁴¹ Poto oudo tie kakame koguro iye Yesu; ates anyen kame likame pwodi oudo koyiko iye ngatamoro oudo tie i poto nono.

⁴² Kite kame ceng no oudo obedo kede ceng kame Iyudayan iikere kede, doko da pien ates oudo tie kakame iyapiyapi, gin kiko yiko Yesu kuno.