Yobu 9 - Baibuli I Leb Kumam 2013

Kop kame Yobu Odwoko

¹ Yobu oko dwoko be,

² “Cite ango angeo be manono tie kop me ateni; do dano adana twero lono pido i nyim Rubanga benyo benyo?

³ Ka dano mito piem kede, en etwero penyo ngat nono peny tutumia acel di likame eko twero dwoko akadi acel da.

⁴ Rubanga riek twatwal doko etie kede twer; ngai kotieko timo ne epali di oko bwone?

⁵ En ngat kame enyiko mori abongo gin ngeno, en etukumaro gi ka edoko ger.

⁶ En eyayango lobo lung, di eko mino ipirin kame gango wi lobo kom gi miel.

⁷ En etwero gengo ceng wok, doko da etwero mwono wang acerin di eko gengo gi rieny.

⁸ En bin eyararo malo en kene di eko donyo pugo name.

⁹ En kame ecweo acerin kocokere me tetu malo, acerin kocokere apimere i wi wa malo, kede acerin kocokere me tetu piny.

¹⁰ En nakanaka etimo jamini adongodongo kalikame niangere, en etimo jamini me aura kalikame marere.

¹¹ “Neningo, Rubanga beo i ngeta do likame ako twero nene, eoto paka kato abongo ango ngeno.

¹² En ekwanyo gimoro abongo ngatamoro genge. Ngai kame twero penye be, ‘Itie timo nyo?’

¹³ Rubanga likame kweo gero mere; en bin emio jo kame konyo Rakab oriebere piny i nyime.

¹⁴ Nan ango atwero do dwoko doge benyo, arabo mono kope kame apoore dwoko ne?

¹⁵ Akadi bed bala ango ali kede raco moro, likame ango atwero dwoko doge; ango miero akwai ngangolkop tima kisa.

¹⁶ Akadi ka koto alwonge pi pido keda di eko yei, aparo be cengemogo likame eyaro yei winyo kop na.

¹⁷ En etoja kede twon yamo abuko di ger, di eko pongo aporeso i koma abongo tien kop moro.

¹⁸ En likame etwero mina kare me wei, do emia bedo kede wangcuny nakanaka.

¹⁹ Ka pi kop amako teko, en etek ebwona! Ka awaco be apide, ngai katwero lwonge i pido?

²⁰ Akadi bed bala ali kede raco moro, do kope awok ki doga en kame koyaro ngolo na iye kop; akadi bed bala ango ali kede raco moro, do en pwodi eyaro twero nyuto raco na.

²¹ Ango gira ali kede raco moro, do likame ango aparo. Likame kom cunya mito bala koto abed kuo da.

²² Ango awaco be, pwodi ecal acala; pien Rubanga muducaro jo ali kede raco moro karacel kede jo areco.

²³ Ka can moro ongoole neko dano moro ali kede raco, Rubanga gire dong nyero anyera i kom peko me dano ali kede raco.

²⁴ Rubanga omio lobo i cing jo areco; en eumo wang jongolkop dedede omio likame kingolo kop i ateni. Ka likame en inonono, ngai do en kotimo?

²⁵ “Ceng me kuo na dwir kalamo ngaringo; gin kiringo kikato abongo neno bero moro.

²⁶ Ceng me kuo na ringo bala yee adwir, kidwir bala ekokom atie ringini piny mako winyo me acama.

²⁷ Ka awaco be, ‘Wia ber bino wil kede koko; abino ber weko ibutur di ako bedo kede yomcuny,’

²⁸ do can kame atie iye pwodi dwogo ko dubo wia, pien ango angeo angea be Rubanga likame bino tero be ango ali kede raco moro.

²⁹ Ango angeo angea be en eyaro ngolo na kop be arac; gikame miango doko acane bako doga li.

³⁰ Akadi alwokere kede pii acil benyo, akadi alwok cinga kede sabuni acal nadi,

³¹ do en pwodi eyaro rwaka i bur me cwoto, di igoen na da ko ringa.

³² Pien likame en ebedo dano adana bala ango me wek adwok doge; me wek koto apid kede.

³³ Likame tie ngatamoro kame twero ngolo kop i diere nango kede en, ngat kame koto tie kede akarunikin i kom wan are nogi dedede.

³⁴ Ka koto en ekwanyo ebela mere tenge kibuta, di eko weko mina lworo,

³⁵ koto ango ayamo abongo bedo kede lworo bute, pien likame ango atie kede raco bala kame en eparo kede.