Yobu 7 - Baibuli I Leb Kumam 2013

¹ “Mam kuo ka dano i wi lobo rom aroma bala tic kame kodio iye sirikale, doko da mam ceng me kuo mere cal acala bala me epakasit?

² Kuo adano cal acala bala epasoit atie mono tipo angic, kede bala jotic atie daro cul gi;

³ aso ango kotieko mina dwete me kuo akony mere li, doko kotieko mina iwor atot me cwercuny.

⁴ Ka aoto buto, aparere be ayaro yai ki kabuto awene, doko likame piny ru na sek; ako donyo lokulokun i kabuto paka obai.

⁵ Kudilinge kede cilo omwono koma; koma tuo di eko donyo yeyecun.

⁶ Ceng acelacel me kuo na dwir twatwal, ceng acelacel kato abongo ango bedo kede gen moro me udo yoto.

⁷ “Yutuno be kuo na cal bala wei awea; ango likame bobo abino neno bero moro.

⁸ Nataman in itie nena, do likame bobo ibino nena; wangi bino ngico yora, do ango udo gira atieko doko li.

⁹ Bala kame edou sarakin kede di eko rwenyo, kamanono da jo kaoto kabedo me jo oto likame dwogo;

¹⁰ likame doko kidwogo i ude gi, doko da jo kame lem kibedo kede gi wi gi wil i kom gi.

¹¹ Pi mano, likame ango abino ling alinga! Abino yamo pien atie kede cwercuny; abino woto ingungur na pien cunya owang.

¹² “Pinyo komio ibedo dara adara esawa dedede? Iparo be ango adoko twol kiyiliyili me nam?

¹³ Ka ango awaco be, ‘Ka abuto i kabuto na, cunya ber bino kwei, ka ariere, abino ber udo alakanar moro,’

¹⁴ do in iko lokere kelo na lek areco me lworo; ilokere kelo na gianyuta kame mia lworo;

¹⁵ manono ko mino cunya paro be koto ngatamoro odea gira, cunya paro be koto ato gira akaka koma neno can iepone noni.

¹⁶ Atieko dagi bedo kuo, likame doko amito bedo kuo nakanaka. In wekango gira, pien ceng me kuo nango cal acala bala wei.

¹⁷ “Dano adano obedo nyo komio in ibedo kede tam atek ateka i kome? Pinyo komio ibedo keto cunyi i kome?

¹⁸ Pinyo komio ibedo mamano en buli odiko, di itame buli esawa?

¹⁹ Benyo, likame ber itwero weko ngoloro ango pi esawa atitidi, di ber iko weka amwony lau?

²⁰ Ka pi dub, atimo ni nyo arac, in ngat kame iciko wangi i kom jo? Pinyo komio imia adoko giri me alata? Pinyo komio ango atie nin bala yec apek?

²¹ Pinyo komio likame isasiro dub na di iko kwanyo tenge gikareco na? Aso ango ayapuno gira ot buto i ates; in ibino mona, do ango abino bedo li.”