Yobu 6 - Baibuli I Leb Kumam 2013

Yobu obedo kede Koko pi Can mere

¹ Yobu oko dwoko be,

² “Ka koto di oudo wangcunya twero pimere i misani, arabo ka koto di oudo can kame atie kede twero pimere,

³ koto kipek kalamo asinge me nam; manono en oko mina acoro yamo kamano.

⁴ Pien Won Twer ocoba kede imalia mege kimomoko i koma, kwir gi osarakin i koma. Rubanga otieko iikere pi sura kede gikame kelo na lworo.

⁵ “Iparo be punda me obar kok kame etie camo lum? Arabo iparo be twon romo kok kame komie cam?

⁶ Iparo be kotwero camo gi abot abongo keto munyo iye, arabo iparo be kakatar me abe twero bilere bedo mit?

⁷ Ango ali kede imue me akodi cam nogo, doko gi dedede me ango acamo mia tuwo.

⁸ “Okwe koto Rubanga omia gikame akwae, koto emia gikame cunya mito.

⁹ Koto Rubanga cunye obedo yom kwanyo kuo na, koto erieo bade di eko coto cunya!

¹⁰ Manoni koto okweo cunya; ango koto alelo akadi di atie kede lito arom nadi; pien likame ango atieko dagi kop ka Ngat Kacil.

¹¹ Teko na tie tuai me meede bedo kuo? Ajikini me kuo na bino bedo nyo me wek adire kure?

¹² Iparo be teko na rom kede teko me engaro? Arabo iparo be koma obedo nyonyo buronsi?

¹³ I ateteni likame ango atwero konyere kena, doko likame tie kakame atwero udo kiye kony.

¹⁴ “Ngat kame dagi nyuto ne ngawote kisa udo edagi bedo kede lworo but Won Twer.

¹⁵ Jowota tie kede angalo buta bala isamai, bala isamai apong di kiko tuo ka ceng orieny.

¹⁶ Isamai nogi akako yuikino pii gi, pii gi doko col pi akako aloi.

¹⁷ I kare me oro gin kidwono; kame lieto obino gin kirwenyo.

¹⁸ Jo kame ringo kede asigiran weko yongayo gi di kiko parao wapo isamai nogo; gin kiko ot paka i wi tim di kiko totoun kuno.

¹⁹ Jo kame ringo kede asigiran kowok ki Tema mo gi, jo kame wok ki Seba keto gen gi i kom gi,

²⁰ i cen mere gin kibedo kede wangcuny pi gen gi nono, pien ka kituno kunono di likame kiko udo pii, wi gi ko cungo.

²¹ Nan wun icalunu na bala isamai nogo; inenunu can na di ikounu doko lwor.

²² Benyo, oudo akwao wu be imianu giamia moro? Arabo oudo akwao wu be ikwanyunu abar wu iwilunu kede ngatamoro pi konya?

²³ Benyo, oudo akwao wu be ilakanu ki cing jokwor na? Arabo be iculunu cul moro but jo kame tidilo ango pi gin weka?

²⁴ “Aso pwonyanu, ango ayaro ciko yita, mianu aniangi gikarac kame atimo.

²⁵ Kope me ateni donyo i cuny dano tin benyo! Do itienu ronkino ango pi kop nyo?

²⁶ Iparunu be wun itwerunu riena, ineno bala kope nango kony gi li?

²⁷ Wun itwerunu da uco alulu pi tero atin kic, doko da itwerunu ipatan pi cato ngawotu.

²⁸ Nan do timunu ber inenunu wanga, ango likame abino waco ne wu kop moro me abe.

²⁹ Lokunu tam wu do, akwao be kur bobo itimunu raco moro; nan do lokunu tam wu, ango gira ali kede raco moro.

³⁰ Benyo, tie kop moro me abe kame leba owaco? Mam ada atwero ngeno poko bero kede can apoto ne dano?