Yobu 41 - Baibuli I Leb Kumam 20131 “Iparo be in itwero wano Lebiatan kede golu, arabo itwero tweno lebe kede tol? 2 Iparo be in itwero rwako auno iume, arabo itwero tuco itinyo mere kede golu? 3 Iparo be en ebino ngangao in pi weke? Iparo be en ebino yamo kedi di emwolere? 4 Iparo be en ebino timo kedi isikan pi in tere bala ngatic nin atwal? 5 Iparo be in ibino tuko kede bala winyo, arabo ibino twene i tol bala gi me anena akelo ne anyira ni yomcuny? 6 Iparo be jocik deknam bino patano i kome? Iparo be jocat deknam bino popoko en me acata? 7 Benyo, in ikaruno tutuco del mere kede tong dobo, arabo itwero tuco wie kede macarin? 8 Tam kong mule; wi likame bino wil kede yi nono, doko likame ibino rucakino. 9 Gen me make likame tie; dano nene anena aman di teko ko tiek i kome di eko poto piny. 10 Likame tie dano moro acunye nwang kame yei kanyakino twaruno en. Ngai karuno cungo i nyime? 11 Ngai karuno sure di eko bwot abongo udo peko? Ngai, i wi lobo lung? 12 “Ango likame ayaro ling i kom kop amako tiene, arabo i kom kop amako dwongo me teko mere, amoto bero me epone kame kocwee kede. 13 Ngai twero gonyo giangapa mere me ooko? Ngai twero tuco ekoti mere kame edokakino pi gwoko kome? 14 Ngai twero yabo doge? Lake mio jo lworo. 15 Abokoya me ngee ineno bala ibukui kame konapo i irotin, kimakakin ineno bala komwono gi amwona. 16 Kitie dicidici karacel, akadi yamo da likame twero bedo tie i diere gi. 17 Gin kiriamakin, acel oriamakin kede ocelu; kikokodun doko likame kokaruno poko gi. 18 Ka en egiro, lau awok ki doge rieny, doko wange rieny bala ceng apwodi tie wok awoka odiko. 19 Leb mac liel wok ki doge; mac kire ooko ki doge. 20 Iiro duny wok ki ume, bala eura aduny ki agulu kodop me tedo. 21 Eura me wei mere moko akuk; leb mac liel wok ki doge. 22 Ngute tek twatwal, mio jo dedede ariamo kede teko gi tiek pitipit pi lworo. 23 Kakododolun me kome oriamakin; kimakakin likame kiyangere. 24 Cunye tek bala engaro, etek bala kidi me riego. 25 Kame ekiar, akadi jo atek da doko lwor; kidok cen pi lworo. 26 Akadi epima cobe, likame epima timo ne gimoro, akadi tong, emal arabo macar. 27 Kibute, lilim cal bala arienge, doko nyonyo buronsi cal bala yat kotop. 28 En likame eringo emal; kibute, engaro kame koporosaro i kome cal bala cucung. 29 En eneno akuta bala arienge; en enyero macar kame kolate kede anyera. 30 Abokoya me yie cal bala abalatigo abitobito; etimo eos mere i cwoto ineno bala me ebao me canyo. 31 En emio pii me nam gugunyo bala pii kame kotie cwako kede agulu, emie egugunyo bala mo kame kotie cwako. 32 Eweko eos ameny kakame ebeo iye; emio nam kuao buo atar bala lwar. 33 Likame tie gimoro karom kede i wi lobo, en ebedo giacwea kalikame tie kede lworo. 34 En eneno kede acae leini dedede kawakere; en ebedo abaka kame lo gi dedede kawakere.” |
Baibuli I Leb Kumam © Bible Society of Uganda, 2013.
Bible Society of Uganda