Yobu 40 - Baibuli I Leb Kumam 2013

¹ Di Rwot bobo oko waco ne Yobu be,

² “Iparo be ngat kame mo raco me jo karuno piem kede Rubanga Won Twer? Poore ngat apiemo kede Rubanga dwok peny noni.”

Kop kame Yobu Odwoko ne Rubanga

³ Di do Yobu oko gamo dog Rwot be,

⁴ “Neningo, ango kom kony na li; kop nyo kame ango abino dwoko ni? Ango aumo doga kede cinga di ako ling.

⁵ Ango atieko yamo tien acel me atwal, likame doko abino gamo dogi; Atieko yamo tien kede tien, likame abino medo yamo.”

Kop kame Rubanga Owaco ne Yobu

⁶ Di do Rwot oko gamo dog Yobu i apipiru be,

⁷ “Cungi di itieko iikere; ango ayaro penyi di iko dwoko na.

⁸ Ateteni mam in itie waco be ango atimo rac? Mam in itie ngolo raco i wia tetekeny in inyut be in dano aber?

⁹ Iparo be in itek bala ango? Iparo be in ikaruno redo kede dwan acal bala mera?

¹⁰ Aso cabo walere kede angosibib kede wor ni; nyut deyo ni kede dwongo ni.

¹¹ Bwot gero ni i kom jo dedede awakere, di iko mino gi kimwolere.

¹² Nen gi di iko dwoko wi gi piny; nyonyono jo areco i kakame kitie iye.

¹³ Yik gin dedede karacel piny i lobo; twei gi i kabedo me jo oto.

¹⁴ Di ada ako bino paki pien teko nin en komi ilo.

¹⁵ “Nen kong emiria, gikame ango acweo bala kame acwei kede; en ecamo lum bala twon,

¹⁶ do teko mere tie i piere kede i ringo me yie.

¹⁷ En eketakino yibe ko doko tek bala yat seda; amorito me amuros mege oribakin karacel.

¹⁸ Cogere mege cal bala paipon me nyonyo buronsi, tiene cal bala atekai me nyonyo ayon.

¹⁹ “En ebedo me agege kikom jamini adongodongo kame ango atimo; Ngacwene kenekene en kame karuno noke kede epima.

²⁰ Ateteni cam mere dongo i wi mori, kakame leini dedede tuko iye.

²¹ En ebuto i dud okuti, doko epwono i dud bilo kede aladoi me osamai.

²² Yen apat adongo i dog nam kede ayelo ume kede tipo gi.

²³ Akadi di pii me ecilet gunyao kitek, en likame lworo make; ebedo mot akadi di pii me ecilet me Yorodan dipere beo i doge.

²⁴ Iparo be tie dano moro kame romo kode kede golu, arabo cike di owic ko kwicakino ume?