Yobu 4 - Baibuli I Leb Kumam 2013

Elipasi Owaco ne Yobu pi bedo kede Gen but Rubanga

¹ Di Elipasi dano me bomba me Tema oko waco ne Yobu be,

² “Benyo, cunyi bino wang ka ayamo ni kop moro? Likame ango atwero meede ling alinga.

³ Neningo, in itieko pwonyo jo atot, doko da itieko mino jo atie kede goro oudo teko.

⁴ Kope nin okonyo jo koudo gete, doko da iko mino cong agoro odoko tek.

⁵ Do nan etuno wang meri da, di in likame iko twero dino cunyi; nan emuli da, di do in wii oko dubere.

⁶ Mam lworo kame in itie kede but Rubanga twero mini nwangcuny, doko mam bero nin da twero mini ibedo kede gen?

⁷ Yutuno kong; ngai kalikame tie kede raco, kame in itieko neno di riamo kede to? Arabo ngai kopoore kame in itieko neno di kongolo kuo mere?

⁸ Bala kame ango atieko neno kede, jo kame puro dub, kede jo kame cuo peko, gin kikao gi nogo da.

⁹ Wei ka Rubanga neko gi, mwoc me gero mere muducaro gi.

¹⁰ Gin kidorano di kingararo bala inguon ager. Do ka Rubanga otuturo lak gi,

¹¹ gin kiko totoun pi kec, di idwe gi ko sasarun.

¹² “Ango atieko winyo kop kame ngatamoro okwalere waco na, eweweo kop nono di yita oko giparo.

¹³ Ako bedo kede par i kom gianena nono i dier iwor, esawa kame dano nino di eko alelejun kede,

¹⁴ lworo adwong oko maka di koma oko cako miel teltel, di cogere na dedede oko donyo yangere.

¹⁵ Yamo moro oko kuto nyima, di yer me koma oko sangango pi lworo.

¹⁶ Gimoro oko cungo di likame eyangere, do ngeno cal mere oko bwona; oudo atie neno gi nono i wanga. Piny oudo oling titi, di ako winyo dwan kame waco be,

¹⁷ ‘Iparo be dano adana twero bedo di epoore i nyim Rubanga? Iparo be jo twero bedo di kicil i nyim Ngacwec gi?

¹⁸ Akadi ber da Rubanga likame keto gen mere i kom jotic mege me malo; imalaikan mege da en eudo raco i kom gi;

¹⁹ do ebino udo raco akalamo mago tien adi i kom jo ajoa, gikame kocweo kede elupe, gi me apua kame kotwero nyinyito bala ajekel?

²⁰ Odiko dano twero bedo kuo, do tuno otieno udo kotieko muducaro en; en eto abongo ngatamoro paro pire.

²¹ Kotwero kwanyo gi dedede kame en etie kede, di en eko to abongo rieko.’ ”