Yobu 39 - Baibuli I Leb Kumam 2013

¹ “Benyo, in ingeo kare kame diegi abedo i wi mori nywal iye? Benyo, itieko neno atil di etie nywal?

² Iparo be in ingeo dwete kame gin kitieko di kiyac, kede kare me nywal gi?

³ Iparo be in ingeo esawa kame gin kinywongo kede pi nywal, di kiko nywalo idwe gi?

⁴ Idwe gin dongo i obar kuno di kom gi yot; kiyai kioto tenge di likame kiko bobo dwogo.

⁵ “Ngai koweko punda me obar ot bala kame gin kimito? Ngai en kogonyo gi?

⁶ Ango atieko mino gi wi tim pi bedo paco gi, atieko mino gi lobo kobedo munyo munyo pi doko kabedo gi.

⁷ Gin kinyero woo katie i bomba; likame kiwinyo redo moro me ngat akolo gi.

⁸ Gin kirimo wi mori mono lum me acama, doko kimoo gimoroni kenekene alulum.

⁹ “Iparo be jobi karuno yei timo ne in tic? Iparo be eyei tieko iwor acel kakame in imio kiye leini ni cam?

¹⁰ Iparo be itwero twene kede auno di iko mine puro ecuka? Arabo ikaruno mine wano kweru me loko bot di elubi?

¹¹ Iparo be ibino keto gen ni i kome piento en etek twatwal, di iko jalo ne timo tic ni?

¹² Benyo, ibino bedo kede yei be en ebino dwogo, doko en ebino kelo kal ni i diakal?

¹³ “Ekululu wawako bwome kitek, do likame ekaruno por pien yer li ki bwome.

¹⁴ En enywal piny di eko weko abeon mege iye, lieto me lobo en aobo gi.

¹⁵ En wie wil likame eparo be tien gimoro twero neko gi, doko da likame eparo be le moro me obar karuno nyonyono gi.

¹⁶ En etero idwe mege kirac ineno bala likame kibedo mege; bed bala cane mere twer bedo me nono, do en likame eparo.

¹⁷ Etie kamanono pien ango likame amie rieko, doko likame amie niang moro.

¹⁸ Ka en eyai pi ringo, en enyero anyera asigira kede ngat katie ringo kede.

¹⁹ “Benyo, in en imio asigira teko kame en etie kede? Mam in en imie yer me ngute?

²⁰ Benyo, in en imie esosomo bala obonyo, di emio jo lworo kame ekuto ume kede ewaka?

²¹ En ekukuro piny kede teko; emwomere amwoma i yi.

²² En enyero anyera kop i kom lworo di likame eparo gimoro iye; epima likame mie edok cen ki yi.

²³ Imalia me ngat aringo kede en kok ki i sau me mako gi, di tong kede macarin meny.

²⁴ En eringo anyim kitek kede gero di kome miel amiela; kame kokuto agwara, likame ecungo mot.

²⁵ Kame ewinyo koko me agwara, en eunyo; engweo yi ki kakabor, doko ewinyo redo me jotel yi ki tenge.

²⁶ “Benyo, rieko nin en kame mio ekeng por, kame eyaro bwome por i bad tetu piny?

²⁷ Iparo be in en imio acut cik me por i malo kakawiriwir, di eko gero ode malo i wi moru?

²⁸ En ebedo i wi moru doko egero paco mere i awita me moru kakame gimoro likame lole kiye.

²⁹ En engingico gimoro ki kuno pi camo ringo mere; wange nene ki kakabor.

³⁰ Idwe mege mato remo, doko kakame kom gi oto tie iye, kunono en kame acut da tie iye.”