Yobu 35 - Baibuli I Leb Kumam 2013

¹ Eliku oko meede kede yamo mere be,

² “Yobu, in iparo be kop nin tie kakare? In iwaco be, ‘Ango ali kede raco moro i nyim Rubanga.’

³ Ka in ipenyere be, ‘Bero nyo kame ango atie kede? Bero nyo kame ango atie kede kame kalamo ka koto oudo atimo dub?’

⁴ Ango ayaro dwoko dogi karacel kede dog jowoti.

⁵ Ngoloro kong malo; ngii idoun kame tie malo kalamo in.

⁶ Ka in itimo dub, nyo kame dub nin timo ne Rubanga? Doko ka dub nin meede ameda, nyo kame manono timo ne?

⁷ Ka in ipoore, nyo kame udo in imie; arabo nyo kame udo en egamo kibuti?

⁸ Gikareco nin mio jo icegun neno can, doko poore nin da konyo jo icegun.

⁹ “Jo kok pi adiadia atek kame koketo i kom gi; gin kilwongere pi mito be kony gi ki cing wegi twer.

¹⁰ Do likame tie ngat kame penyere be, ‘Rubanga Ngacwec na kara tie tuai, en ngat kame emio jo wero i kare me peko,

¹¹ ngat kame pwonyo wa kalamo leini me wi lobo, doko emio wan obedo riek kalamo winy me wi yamo?’

¹² Gin kikok pi mito kony, do Rubanga likame gamo koko gi pi ewaka gin me jo kame timo gikareco.

¹³ Ateteni koko me nono nono Rubanga likame winyo; Rubanga Won Twer likame paro pire.

¹⁴ Do do merin bino kalamo mano tien adi, in ngat kame iwaco be in likame inene, be itie dare pien pido ni tie i nyime!

¹⁵ Medo i wi mano, in iparo be ka Rubanga olilo likame emio jo alola, doko en likame eparo twatwal pi gikareco.

¹⁶ Yobu, in ingamo dogi yamo atatai, iduro yamo abongo ngec moro.”