Yobu 32 - Baibuli I Leb Kumam 2013

Eliku Obunano Jowot Yobu

¹ Di do cuo adek nogo oko weko dwoko yamo ka Yobu, piento en oudo eparo i tam mere kene be en likame etimo gimoro arac.

² Di cuny Eliku oko wang kede Yobu pien oudo etie ronkino Rubanga di ewaco be en gire likame etimo gimoro arac. Eliku bin obedo wot ka Barakel dano me ekeko ka Bus; en oudo ebedo dano me ot ka Ram.

³ En bin bobo da cunye oudo owang kede jowot Yobu adek nogo, pien gin likame bin kiko karuno udo kop kame kidwoko ne Yobu, bed bala gin oudo kironkino en.

⁴ Pien Eliku oudo titidi kibut gin, en kong eko daro jo dedede otieko yamo.

⁵ Do kakame Eliku oneno kede be likame oudo tie kop moro kame cuo adek nogo tie dwoko ne Yobu, cunye oko wang.

⁶ Eliku wot ka Barakel dano me Bus oko dwoko be, “Ango atitidi, do wun idongodongunu; pi mano, ango oudo abedo kede lworo me waco ne wu tam na.

⁷ Ango oudo aparo i cunya be, ‘Wek jo kocato yami, jo amwakini gi odoko totot mi pwony me rieko.’

⁸ Do ateteni tipo kame tie i yi dano, wei kame Won Twer mio en kame mio jo niang.

⁹ Likame tio en kame mio jo doko riek, arabo jo oti en kame ngeo gikame poore.

¹⁰ Pi mano, ango awaco ne wu be, ‘Winyunu kop na; ber kong ada ami tam na.’

¹¹ “Nenunu, ango abedo dire winyo kop kame wun oudo itienu waco, abedo ciko yita winyo kope wu me rieko di wun oudo imounu kop me ayama.

¹² Ango abedo ciko yita butu, do ateteni likame tie ngatamoro kame oko nyuto rac ka Yobu, likame tie ngatamoro kikomu kokaruno dwoko kope mege.

¹³ Kur wun iwacunu be, ‘Wan otieko udo rieko; Rubanga en kame bino bwone, do weko dano.’

¹⁴ Yobu likame oudo otika kede kop mege, doko ango likame abino dwoko ne kop iepone kame wun idwokunu ne kede.

¹⁵ “Yobu, kom gi otieko to, kili kede kop me adwoka; kili kede kop me ayama akadi acel.

¹⁶ Benyo, ango abed daro gin di likame kitie yamo, di gin kitie kicungo kano abongo kop moro me adwoka?

¹⁷ Ada abino mino dwok na; ada abino waco tam na.

¹⁸ Pien ango atot kede kope; cunya likame yei na ling.

¹⁹ Ateteni cunya cal bala bwini akuao di koumo wie; ecal bala isau me lau me bwini kodeng mito mwoc.

²⁰ Ango miero ayami, tetekeny cunya kwei; ango miero agam doge.

²¹ Ango likame abino bedo kede apokapoka but ngatamoro; arabo yamo kop me eede i kom ngatamoro.

²² Pien ango likame angeo yamo kope me eede, koto Ngat kocwea oudo otieko mina adoko li.