Yobu 31 - Baibuli I Leb Kumam 2013

¹ “Ango atieko timo isikan kede wanga, pi weko neno nyako moro kede wang me mit.

² “Iner nyo kame ango abino udo kame wok ki malo but Rubanga? Doko nyo kame Rubanga Won Twer me i malo bino poko na pi doko mera?

³ Mam peko poto ne jo kalikame opoore da? Doko winyo arac mam mako jo atimo tim areco?

⁴ Mam Rubanga neno yote nango? Doko mam en kame emaro tien dedede kame ango alato?

⁵ Ka abedo timo tim me angalo, arabo koma obedo mit waco ne jo kope me abe,

⁶ wek Rubanga pima i misani atie kakare, di eko bino ngeno bero na.

⁷ Ka tiena oparao tenge ki yongayo kopoore, di cunya oko lubo gikarac kame wanga oneno; doko ka cinga opwokere kede dub moro,

⁸ wek ango acui kodi di ngat apat en ako camo, doko wek kopuputo kodere na kame apuro.

⁹ “Ka dako moro otieko wano cunya, di ako ot kiire i ekeko me ngakio,

¹⁰ mito dako na rieg alos ne icuo apat, doko wek cuo apat but kede.

¹¹ Pien manono udo atimo gikarac twatwal; manono udo aturo iswil.

¹² Adote koto oudo owanga bala mac paka to, doko koto oudo ewango jamini na dedede.

¹³ “Ka epasoit arabo apasoit na moro oudo okelo ingungur mere kame etie kede i koma, di koto ango ako dagi winyo kop mere,

¹⁴ koto ango abino timo benyo i nyim Rubanga? Koto ango abino waco ne benyo kakame en ebino pepenyo ango kede?

¹⁵ Mam Rubanga ngat kocweo ango i yi toto na en kocweo gida? Mam en ngat acel nono en kame elulungo wa i yi toti wa?

¹⁶ “Ango pwodi likame atieko dagi mino ngacan gimoro kame cunye mito, arabo mino apuserun bedo abongo gen,

¹⁷ amoto camo cam na atitidi moro kena, di likame ako mino idwe kic da ocamo.

¹⁸ Pien cako di pwodi ango eponga abedo gwoko idwe kic bala papa gi, cako nywala ango abedo konyo apuserun.

¹⁹ “Ka ango atieko neno dano moro di to pi li me giangapa, arabo ngacan kalikame tie kede egoe me umo kome,

²⁰ di en likame eko pwona, pien likame amie egoe aliet kame kotimo kede yer me romini na,

²¹ kede ka ango atieko tingo cinga cimo atin kic, di oudo angeo be abino lone i ekiko, pien oudo aneno be jo aganga tie i kacokere,

²² poore bada turi, doko poore cogo me epepet na pakar pot tenge.

²³ Pien ango oudo abedo lworo peko kame Rubanga mio, doko pi dwongo mere omio likame ango oudo akaruno timo gikame cal kamano.

²⁴ “Ka ango atieko keto gen na i kom saabu, arabo ka awaco ne saabu kame kojililo kiber be en ngagwok na;

²⁵ ka ango atieko ilel pien abar na oudo dwong, arabo pien lonyo na onyai;

²⁶ ka ango atieko neno ceng di erieny, arabo duwe di eoto kede deyo mere,

²⁷ di cunya oko wana woro gi i mung, doko ako luro wia pi woro gi,

²⁸ dub noni da oudo jongolkop poore ngingico di kiko mina alola iye, pien udo angalo Rubanga atie malo.

²⁹ Ango likame atieko neno jo adaga di tie neno can ako kilel, arabo bedo kede yomcuny kame peko opoto negi;

³⁰ ango likame ayei ne doga timo dub me lamo kuo gi.

³¹ Jo na da waco be, ‘Jo dedede otieko bilo cam i ot ka Yobu?’

³² Ango atieko gamo jo aoto i yongayo i paco na, likame aweko ngakumbor obuto i gudo.

³³ Ango likame abedo mungo dub na bala kame jo ace timo; likame abedo kano gi,

³⁴ pi lworo kop kame jo bino yamo i koma. Ango likame bin abedo ling alinga, doko likame adonyo bedo i ot, be pi lworo acae me jo.

³⁵ Okwe koto oudo atie kede dano kame karuno winyo kop na! Ango kikoma adio cinga! Akwao Rubanga Won Twer gam doga! “Okwe koto di oudo ngakwor na owandiko awandik kop kame etie pida iye!

³⁶ Ateteni koto oudo ango angapo gi i epepet na; doko koto oudo aketo gi i wia bala ocoro me ajakanut.

³⁷ Koto atatamo ne Rubanga gi dedede kame ango oudo abedo timo; doko koto oudo aoto i nyime bala ngapug.

³⁸ “Ka lobo na oudo obedo kede koko i koma, di bot mere da oudo kok karacel kede en i koma;

³⁹ ka oudo ango abedo camo cam acek iye abongo culo gimoro, di ako mino jo koudo puro gi oto kec;

⁴⁰ akwao do be poore okuto bwangun i lobo nono akaka engano, kede doi akaka mawele.” Kope ka Yobu ojik kan.