Yobu 30 - Baibuli I Leb Kumam 2013

¹ “Do nataman joatino kibuta do nyera kede acae, jo kame ango oudo likame akaruno yei ne papi gi konyo igwogin na gwoko romini na.

² Teko gi oudo otiek dedede. Kony nyo kame oudo ango koto akaruno udo kibut gi?

³ Can kede kec oudo odio gi, omio oudo kimwodo aliasin kotuo iwor, i itela kakoling.

⁴ Gin oudo kingwedo pote me yen awac i amoniek pi camo, doko oudo kiputo aboce da me acama.

⁵ Oudo koriamo gi tenge ki kakame jo bedo iye; jo oudo riamo gi di kilelemo i dud gi bala riamo jokuo.

⁶ Gin kiko donyo bedo i bure me bad mori, i bure me piny kede i abo.

⁷ Gin oudo kikok i amoniek bala le; kidole karacel i dud okuti.

⁸ Gin oudo kibedo ekodet me jo amiming, jo akony gi li kalikame ngere! Jo oudo obungo gi di oko riamo gi tenge ki lobo wa.

⁹ “Nan do idwe gi wero were me nywara; ango adoko gituko gi.

¹⁰ Gin kiringa; likame kimito bedo i ngeta, doko likame kilworo ngulo lau i wanga.

¹¹ Pien Rubanga otieko gonyo tol me emal na di eko mina adoko mwol, likame tie do gi agengo gi timo na gikame cuny gi mito.

¹² Gin kibino ekodet pi sura i kateko na; kimia aringo, doko kitimo iik me muducaro ango.

¹³ Kicego na yote me bwot, gin kimedo peko nango ameda; likame tie dano agengo gi.

¹⁴ Gin kibwote na bala jo kotuco arora i apama, di kiko ony i koma.

¹⁵ Lworo obwona; wor kame bin jo mia odoko li bala gikame yamo okutaro. Doko lonyo na da orwenyo wir bala edou.

¹⁶ “Nan do kuo na tie yai; kare me neno can do otieko tuno na.

¹⁷ Iwor cogere me koma mwoda, doko lito kame awinyo likame jik.

¹⁸ Rubanga omako ngut ekanso na, emako egoe na kede gero.

¹⁹ En etieko reta i cwoto, ango atieko doko cal bala apua kede buru.

²⁰ Ango akok buti, Okwe Rubanga, do in likame igamo; ango alego buti, do in iko nena anena.

²¹ In itieko doko ger nango; in itidilo ango kede twer ni.

²² In itinga malo i yamo di iko mino eringo keda; in imio yamo ager olokoloko ango.

²³ Ango angeo be in ibino tera paka tuno i to, i ot kame kotieko iiko ne jo akuo dedede.

²⁴ Ateteni dano likame lokere suro ngacan, ngat kame koko kony kame etie i peko.

²⁵ Mam ango oudo akok pi jo koudo tie i kuo atek? Mam oudo cunya cwer pi jocan?

²⁶ Do kakame ango oudo amo kede bero, raco bobo en alunyo bino; doko kame oudo atie kuro lero, colo en kame bino.

²⁷ Tam na orubere doko likame ekwei; atieko riamo kede kare me neno can.

²⁸ Ango atururo abongo dano moro kame mia kweicuny; ayai malo i kacokere di ako koko kony.

²⁹ Koko omia adoko cal bala omin me ikween, kede ngaupa me ikululun.

³⁰ Del me koma otieko yuikino, doko epacere di epoto tenge, doko da cogere na liel aliela bala mac.

³¹ Nataman do arigirigi na olokere odoko me gono were me iturur, doko bilo na kok winyere bala dwan jo atie koko.