Yobu 3 - Baibuli I Leb Kumam 2013

Ingungur ka Yobu but Rubanga

¹ I cen mere, Yobu oko woto dwane di eko lamo ceng kame bin konywale iye.

² En ewaco be:

³ “Ilam mak ceng kame konywala iye; doko da ilam mak iwor kame koyaca iye!

⁴ Poore ceng nono dok colo! Akwao Rubanga atie malo kur eyutuno ceng nono, doko da kur lero bed tie iye.

⁵ Poore colo acucucuc mukakino ceng nono; poore idoun ume, doko poore colo nono kel ne ceng nono lworo.

⁶ Poore colo acucucuc um iwor nono! Kur mare i kom ceng me mwaka, doko da kur mare i kom ceng me duwe.

⁷ Poore iwor nono bed adonge, kur yac atin moro iye, kur ilelem moro me kilel bed tie iwor nono.

⁸ Joilam poore lam iwor nono, jo kame tie kede diru me twaruno Lebiatan.

⁹ Poore acerin me obai kur wok iwor kame konywala iye; poore edar awalar me piny kwekwe; kom kur piny rui ne,

¹⁰ piento en likame egengo toto na yaca, di koto eko genga neno peko.

¹¹ “Pinyo komio bin likame ato i esawa me nywala, arabo wok ki yi toto na di cunya ko cot?

¹² Pinyo bin kotinga i tien? Pinyo bin komia adoto tuno?

¹³ Koto nan atie gira buto piny aling; koto nan atie gira nino; di koto ako wei

¹⁴ karacel kede abakai kede jopug me wi lobo, gin jo konyogao gero amejeko me miere me abakai pirgi;

¹⁵ arabo kede jopug kopong kede saabu, jo kame pongo nyonyo siliba i ude gi.

¹⁶ Arabo pinyo komio bin likame koyika bala atin kame konywalo di otieko to, arabo bala atin kalikame obilo neno wang ceng?

¹⁷ Jo areco jiko tim areco i ates kuno, doko da jo ool udo wei ki kuno.

¹⁸ Ki kuno mabus bedo i mulem karacel, likame doko kiwinyo redo me ngadar mabus.

¹⁹ Jo me ruom amalo kede me ruom apiny tie kuno, doko ipasoi da otieko gonyere ki cing jodongo gi.

²⁰ “Pinyo en kamio komio lero but ngat ali kede yomcuny, pinyo en kamio komio ngat atie kede cwercuny kuo?

²¹ En edaro to, do likame to bino, en emoe kalamo abar kame kokano.

²² En elelo kitek, doko etie kede yomcuny kame edonyo i ates.

²³ Pinyo kamio komio ngat kame anyim mere col lero, ngat kame Rubanga otieko lukaro ki bad dedede?

²⁴ Pien iturur odoko bala cam na, doko acur nakanaka bala pii aony.

²⁵ Ateteni gikame ango alworo timere na, gikame ango alworo kalamo poto i koma.

²⁶ Ango ali kede mulem amoto wei, ali kede wei moro, do peko tie meede ameda.”