Yobu 29 - Baibuli I Leb Kumam 2013

Kop kame Yobu Owaco me Ajikini me Pido mere

¹ Yobu bobo oko meede kede yamo mere be,

² “Okwe, koto oudo ango atie iepone angoce ca, bala i kare kame bin Rubanga gwoka kede ca;

³ i kare kame etala mere bedo rieny kede i wia malo, di eko menyo na yongayo kame beo kakacol.

⁴ Manono en oudo kare kame ango pwodi atek kede, doko oudo Rubanga gwoko paco na.

⁵ Rubanga Won Twer oudo tie keda, doko idwe na da oudo tie i ngeta.

⁶ I kare nono yongayo kame ango oudo alubo obedo cak kenekene, doko mo oudo bwote na ki wi lela kakame kobiye kiye.

⁷ Kame oudo ango aoto i erute me bomba, di ako bedo piny kacokere,

⁸ awobe bin nena di kiko nyiko tenge, do joadongo yai malo pi mina wor;

⁹ jo kame koworo jiko yamo gi di kiko ling titi di kiketo cing gi i dog gi;

¹⁰ jopug oudo ling, di leb gi ko moko i dan gi.

¹¹ “Jo kame bin winyo yamo na oudo pwoya, doko jo koudo neno gikame atimo, oudo yamo kiber i koma,

¹² pien ango bin alako jocan kame oudo kok, doko akonyo idwe kic kalikame oudo tie kede ngat akonyo gi.

¹³ Jo kame bin oudo iyapi to oudo lamo nango winyo, doko ango oudo amio cuny apuserun obedo kede kilel.

¹⁴ Ango oudo angapo poore bala egoe; ateni na oudo cal bala ekanso, kede bala egoe kame kododolo i wic.

¹⁵ Kibut imuduka, ango oudo acal bala wang gi, doko kibut ingwalasa da ango oudo acal bala tien gi.

¹⁶ Kibut jocan, ango oudo acal bala papa gi, doko oudo ango acungo ne jokumbor i kope amako gi.

¹⁷ Ango oudo atieko teko me jo areco, di ako mino gi kijalakino jo kame oudo kimako.

¹⁸ Ango oudo aparo i cunya be, ango abino bedo kuo pi kare alac, di ako bino to i oda.

¹⁹ Ango oudo acal bala yat kame aliasin mege oliao kiton i pii, di ajange mege toyo bedo tie iye iwor kiakia.

²⁰ Jo oudo mia dwongo nakanaka, doko teko na oudo likame dok cen.

²¹ Jo oudo ling titi pi mito winyo tam kame ango amio, di kiko ciko yit gi daro.

²² Kame ango oudo atieko yamo, gin likame bobo oudo kiyamo. Kop nango oudo donyo negi bala kot kame donyo piny.

²³ Gin oudo kidara bala jo kame daro dwogo me kot; gin oudo kigamo tam na bala kame jo gamo kede kot me iporo.

²⁴ I kare kame gin oudo kidoko li kede gen, ango ako nyuto negi yomcuny; doko alakar me nyima oko mino gi teko.

²⁵ Ango en kame bin abedo ejakait gi, ngat kame nyuto negi yongayo me aluba, ango oudo abedo bala abaka kame tie i diere me isirikalen mege, di ango ako kweno cuny gi bala dano akweo cuny jo akoko dano gi oto.