Yobu 28 - Baibuli I Leb Kumam 2013Kakame Rieko Udere Kiye 1 “Ateteni bur kame kokunyo kiye siliba tie, doko kabedo kame kojililo kiye saabu da tie. 2 Kokunyo kide me nyonyo ayon ki lobo, doko kocalaro nyonyo kopa ki kide. 3 Jo akunyo kide me nyonyo tio kede etala i dud lobo kakacol cucucuc, di kiko mono kide tuno kakabor, kiko kunyo gi ki kakacol cucucuc kuno. 4 Gin kikunyo bure me mono kide me nyonyo di bor kede kakame jo bedo iye, kikunyo gi kakame jo likame beo iye, gin kileedo kede aunoi i bure nogo. 5 Cam wok ki lobo; do dud lobo piny ineno bala mac olokoloko kiye gi dedede. 6 Kide mege tie kede sapir, doko apua mere tie kede saabu. 7 Likame tie winyo moro acamo ringo angeo yongayo nono, doko likame tie wang acut moro kotieko nene. 8 Leini awakere me obar da pwodi likame olubo yongayo nono; engu da pwodi likame obeo iye. 9 “Dano kunyo lela atek, doko emuko kide adongo ki dud gi piny. 10 Gin kiroko yote i lela, doko likame tie kidi moro me wel amalo kame kato wang gi. 11 Kikunyo kiton tuno kakame icileta cakere kiye; kiko kelo kakaler jamini kalikame oudo neeno. 12 Do rieko kara kobino udo ki tuai? Doko niang kara tie tuai? 13 “Jo likame ngeo yongayo aoto iye, doko likame eudere i lobo me jo akuo. 14 Nam me dud lobo waco be, ‘Likame etie buta,’ doko nam me wi lobo da waco be, ‘Likame etie keda.’ 15 En likame kokaruno wile kede saabu, doko da likame kokaruno pimo siliba me wile. 16 En likame kokaruno poro wel mere kede saabu me Opir, arabo kede kide me wel, onik amoto sapir. 17 Wel me saabu kede gilasi likame rom kede, doko likame kokaruno sese kede mwolere kame kotimo kede saabu kame kojililo kiber. 18 En wel mere likame kokaruno poro kede me kide me wel, karol arabo kidi amilimili bala akako; wel me rieko kalamo me bira me wel. 19 Kidi topas kame udere Abisinia likame kokaruno poro kede rieko, akadi saabu acil odocon wel mere likame kokaruno poro kede. 20 “Kara rieko do wok ki tuai? Doko niang kara tie tuai? 21 Kokane likame tie wang giakuo moro kame karuno nene, doko koume likame tie winyo moro apor i malo kame karuno nene. 22 Abadon kede to da waco be, ‘Wan owinyo rwonge mere kede yit wa kenekene.’ 23 “Rubanga kene en kame ngeo yongayo aoto iye, en engeo kakame rieko bedo iye. 24 Piento en wange neno ajikini me lobo, doko en eneno gi dedede kame tie i dud ceng. 25 Kakame en emio kede yamo teko, di eko moko rom me pii; 26 kakame en eketo kede iswil amako kot, di eko cibo yongayo kame mwoc me kot lubo; 27 en di do eko neno rieko, di eko udo bero mere; en engie odocon di eko moke. 28 “En di eko waco ne dano be, ‘Ateteni lworo Rwot en rieko; doko pokere kede gikareco en niang.’ ” |
Baibuli I Leb Kumam © Bible Society of Uganda, 2013.
Bible Society of Uganda