Yobu 26 - Baibuli I Leb Kumam 2013

Yobu Owaco be Dwongo ka Rubanga likame Niangere

¹ Di Yobu oko dwoko be,

² “Itieko mino kony adwong tin benyo but dano ateko mere li! Itieko lako dano agoro tin benyo!

³ Itieko mino tam aber tin benyo but dano aming, di iko mine acora atot abeco!

⁴ Ngai okonyi waco kope go, doko ngai omi cuny me yamo kamanono?

⁵ Tipo me jo oto atie piny i dud lobo kom gi miel amiela, pii kede jamini kame tie iye tie kede lworo.

⁶ Kabedo me jo oto tie ilererei i nyim Rubanga, doko likame tie gi koume.

⁷ Rubanga opeto edou me tetu malo i wi yamo, doko en eliero lobo da i wi yamo.

⁸ Nakanaka en ebo pii i edou mere apek, di pii nono likame ko belo edou.

⁹ En epeto edou mere, di eko umo wang duwe.

¹⁰ En etieko giro ikor i wi nam, pi poko ajikini me lero kede colpiny.

¹¹ Ka en ecoko ipirin kame gango malo, kom gi to pi lworo.

¹² En bin eko mino nam okwei pi twer mere; doko rieko mere en komio bin koneko Rakab.

¹³ Wei mere en komio malo odoko ler; doko en eko neko twol kame oudo mito bwot kede cinge.

¹⁴ Ateteni magi obedo wie wie me twer mere; gikame wan owinyunu i kome tin nonok benyo! Do ngai kame karuno niang rom me twer mere?”