Yobu 24 - Baibuli I Leb Kumam 2013

Yobu Omio Koko pi Gero Atie i Lobo

¹ “Pinyo bo komio Rubanga Won Twer likame cibo kare me ngolo kop, doko pinyo komio jo agene likame neno ceng nogo?

² “Jo areco nyiko apokini me ikor; kimao leini me jo icegun di kiko donyo kwano gi.

³ Gin kitero punda me idwe kic, kimako twon me apuserut pi banya.

⁴ Gin kiremoro jocan tenge ki yongayo; jocan dedede me wi lobo pwono negi apwona.

⁵ Jocan bedo bala pundan me obar, kioto timo tice gi, kimoo ne idwe gi giacama ki wi tim.

⁶ Gin kiraro cam ki poti kalikame obedo megigi, doko kidepo olok ki poti me jo areco.

⁷ Gin kibuto nono iwor kiakia, abongo egoe, doko kili kede gi me um kame galao koyo.

⁸ Kot angic awok ki wi mori nyongo kom gi, di gin kiko gwako moru pi mito kagwok.

⁹ Tie jo kame mao atin kic ki kor toto mere, di kiko tero atin me ngacan bala giamaka me banya.

¹⁰ Jocan bedo ot nono abongo igoen i kom gi; kiute yeno arita me engano akadi di kec oneko gi.

¹¹ Gin kibio mo ki olibeti kede bwini ki olok, do gin kikom gi kikanyo orio.

¹² Jo kame tie to ngururo ki bomba, doko jo kame kowano kok kimito be kony gi; do Rubanga likame paro pi winyo i lega gi.

¹³ “Tie jo adagi lero, gin likame kingeo yote mege, akadi lubo gi.

¹⁴ Nganek yai iwor, di eko ot neko ngacan kame li kede gimoro, doko iwor en etie bala ngakuwo.

¹⁵ Ngadote da daro piny doko amumus; en ewaco be, ‘Likame tie ngatamoro kame bino nena’; di eko bono wange.

¹⁶ Iwor gin kituro ude; do iceng gin kipwono likame kimito lero.

¹⁷ Pien piny acol cucucuc cal bala odiko ne gin; gin kitieko nao kede lworo kame piny acol cucucuc kelo.

¹⁸ “Gin kiwekeweke pii molo gi tenge awakawaka; Rubanga olamo lobo gin kirac; likame tie ngatamoro aoto timo tic i poto olok gi.

¹⁹ Bala kame lieto me ceng mio kede akako loi di eko rwenyo, kamanono da jodubo rwenyo kioto i kabedo me jo oto.

²⁰ Toti gi da likame doko yutuno gi; kudilinge acamo kom gi udo kom gi mit; wi jo wil kede gi atwal; epone nono en kame komuducaro kede jo areco bala yen kame kotongo.

²¹ Etimere negi kamano pien gin kitero mon kalikame nywal kirac, doko likame tie gimoro aber kame gin kitimo ne apuserun.

²² Do Rubanga pi twer mere emedo ne wegi twer kare me kuo; ka Rubanga oyai negi malo, gin likame kigeno kuo gi.

²³ En egwoko mulem gi, doko ekonyo gi; en eciko wange i gikame gin kitimo.

²⁴ Gin kotingo gi malo pi kare moro atitidi di kiko rwenyo; kodwoko gi piny kiko ner di kiko rwenyo bala ature, kiner bala wi kal kame kokao.

²⁵ Ka likame kamanono, ngai kame karuno nyuto be ango atie ngalo, di eko nyuto be kop kame ango ayamo tie me abe?”