Yobu 23 - Baibuli I Leb Kumam 2013

Yobu bobo Omedo Yamo

¹ Di Yobu oko gamo be,

² “Tin pwodi ango atie kede koko atek i kom Rubanga; akadi di ango atie cur, cinge pwodi tie toja.

³ Okwe, koto di oudo ango angeo kakame akaruno ude iye, tetekeny koto akaruno tuno akadi kakame ebedo iye!

⁴ Ango koto atero koko na i nyime, di ako mine pido na.

⁵ Koto ako ngeno kop kame en ebino dwoko, doko ako niang gikame en koto ewaco na.

⁶ Benyo, en koto epiemo keda di etio kede twer mere lung? Li, do en koto eciko yite winyo kop na.

⁷ Dano kame ikiteso mege beco koto romo piem kede ki kuno, di ngangolkop nango koto oko mina alo pido atwal.

⁸ “Ka ango aoto tetu kide, aude eli ki kuno; akadi ka adok tetu tim da, likame akaruno nene.

⁹ Ango aoto mone tetu malo, di likame ako karuno nene; alokere tetu piny da, do pwodi likame akaruno nene.

¹⁰ Do en engeo yongayo kame ango alubo; ka en etieko tama, ango abino wok di ameny bala saabu.

¹¹ Tiena otieko moko baba i yongayo mere; ango abedo lubo yongayo mere di likame aparao tenge kiye.

¹² Ango likame aweko lubo cik kame en ewaco kede doge; ango akano i cunya kop kame doge owaco.

¹³ Do en ka etieko mito timo gimoro, ngai kame karuno loko tam mere? Gikame cunye omito, manono en kame en etimo.

¹⁴ En ebino cobo timo gikame en eiko nango; doko iik atot kacal kamago tie i tam mere.

¹⁵ Pi mano, ango lworo atek maka i nyime; kame ango atamo kop i kome, lworo atek maka.

¹⁶ Rubanga otieko mino cunya lworo; Rubanga Won Twer otieko mino lworo atek omaka.

¹⁷ Akadi kamanono da, colpiny likame oko karuno mina aling, bed bala colpiny acucucuc ouma.