Yobu 21 - Baibuli I Leb Kumam 2013

Yobu Owaco be Rubanga likame Mio Jo Areco Alola

¹ Yobu oko dwoko be,

² “Cikunu yitu iwinyunu kope na, manono bino mino itwerunu dino cunya.

³ Direnu ber kong ayam kede wu; di do ikounu meede nywara i ngei ango yamo.

⁴ Do koko nango tie i kom Rubanga, manono en omio likame ango atwero dire.

⁵ Kong nenanu, manono bino neko komu, di ikounu uro di iketunu cingu i dogu.

⁶ Ka aparo kop iye, emio lworo maka, di koma ko miel.

⁷ “Pinyo ber kamio jo areco bedo nakanaka, kibedo paka ti di lonyo gi meede ameda?

⁸ Idwe gi sipakin di pwodi gin kikuo, kiton ikwae gi da.

⁹ Lworo moro likame tie i miere gi, doko da likame tie alola moro kame Rubanga mio gi.

¹⁰ Twonin gi kwaro dok likame bwot yac, doko doke gi amon likame bwogo nywal.

¹¹ Idwe gi mol bala ekodet me romini, di kimamano kago di kituko.

¹² Gin kiwero kame kotie gono gita kede arigirigi, doko kitaco kame kotie kuto bilo.

¹³ Gin kitie i lonyo i kare me kuo gi lung, doko da kito to me mulem di kiko ot i kabedo me jo oto.

¹⁴ “Gin kiwaco ne Rubanga be, ‘Wek wa kur ilolo wa! Wan likame omito ngeno gikame in imito ne jo lubo.

¹⁵ Won Twer kara obedo ngai kame mio wan owore? Bero nyo kame wan oudo ka olego bute?’

¹⁶ Mam lonyo gi tie i cing gi? Ango adagi tam me jo areco.

¹⁷ “Tien adi kame itiekunu neno kede di jo areco ngole to? Tien adi kame itiekunu neno kede di can poto i kom gi? Tien adi kame itiekunu neno kede di Rubanga doko ger di eko mino jo areco alola?

¹⁸ Tien adi kame yamo otieko buko gi kede bala gari me kal, arabo tien adi kame apipiru otieko tero gi kede bala cucung?

¹⁹ Wun iwacunu be Rubanga culo raco gi i wi idwe gi; likame kamano, miero cul raco nono i kom gin, me wek kibil mito mere.

²⁰ Poore wang gi nen can kame miero mi gi, poore kiriam kede gero ka Won Twer.

²¹ Pien gin kitwero bobo bedo kede par nyo i kom idwe gi ingei gin to, ka kongolo dwete me kuo gi?

²² Ngai kame twero pwonyo Rubanga, ngat kame ngolo kop ne kiton imalaikan?

²³ Jo mogo bedo paka tuno i to gi di kom gi yot, gin kitie i mulem abongo lworo gimoro.

²⁴ Kicwe mo opong i kom gi, doko isum me cogere gi bedo di nyen.

²⁵ Jo ace to kede cuny akec, abongo gin bilo bero moro.

²⁶ Do gin nogo dedede kibuto piny i apua di kirom aroma, di kudilinge ko mwono kom gi.

²⁷ “Nenunu ba, ango angeo tam wu, doko da angeo iik wu me timo nango raco.

²⁸ Wun ipenyerenu be, ‘Ani bo ot ka ngadwong? Eema me ngat arac oudo bedo iye tie tuai?’

²⁹ Benyo, likame ipenyunu jo aoto i yongayo? Benyo, likame iyeunu kope kame gin kiwaco ne wu be,

³⁰ i kare me can likame tie gimoro amulo jo areco, doko da kolako gi i ceng me lilo ka Rubanga?

³¹ Ngai twero waco ne jo areco raco gi i wang gi, arabo culo i kom gi raco kame kitimo?

³² Kame koyiko gi i ates, kobedo daro atesin gi adara.

³³ Lobo kame oonyo i kom gi i ates kom ber negi abera; jo dedede sirito ot yiko gi, doko jo atelo negi anyim likame marere.

³⁴ “Nan do benyo benyo kame itwerunu dino cunya kede kope akony gi li? Kope dedede kame itienu dwoko na obedo kope me abe kenekene.”